សម្តេច ឃួន សុដារី ណែនាំឱ្យចលនាស្រ្តីគណបក្សចូលរួមលើកិច្ចការគាំពារសង្គម ដើម្បីគាំទ្រយេនឌ័រ

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បានណែនាំឱ្យចលនាស្រ្តី គណបក្សចុះមូលដ្ឋានស្រុកមុខកំពូលចូលរួមលើកិច្ចការគាំពារសង្គមដើម្បីគាំទ្រយេនឌ័រ។

ការណែនាំរបស់សម្តេចមហារដ្ឋសភាធិការធិបតី ឃួន សុដារី សមាជិកគណៈអចិន្រ្តៃយ៍នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមចលនាស្រ្តីនៃក្រុមការងារគណបក្សចុះមូលដ្ឋានខេត្តកណ្តាល ធ្វើឡើងនាឱកាសអញ្ជើញ​ជាអធិបតីភាព ក្នុងពិធីសំណេះសំណាល និងប្រកាសទទួលស្គាល់សមាសភាពក្រុមការងារចលនាស្រ្តី នៃក្រុមការងារគណបក្សចុះមូលដ្ឋានស្រុកមុខកំពូល ខេត្តកណ្តាល នាថ្ងៃទី២៦ ខែមេសា ឆ្នាំ២០២៥ និងមានការអញ្ជើញចូលរួមពីថ្នាក់ដឹកនាំក្រុមចលនាស្រ្តីថ្នាក់ខេត្ត ស្រុក ឃុំ និងភូមិ សរុប្រមាណ២០០នាក់។

នាឱកាសនោះ សម្តេច ឃួន សុដារី បានពាំនាំនូវការផ្តាំផ្ញើសួរសុខទុក្ខពីសម្តេចតេជោ ហ៊ុន សែន ប្រធានគណក្សប្រជាជនកម្ពុជា ស្ថាបនិកមគ្គុទេសក៍ឯក និងប្រតិបត្តិករនយោបាយឈ្នះ ឈ្នះ ក៏ដូចជាការបន្តដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី។

សម្តេច ឃួន សុដារី ក៏បានសម្តែងក្តីរីយរាយ និងវាយតម្លៃខ្ពស់ចំពោះការខិតខំរបស់ចលនា ស្រ្តីពីអាណត្តិកន្លងទៅរហូតមកដល់ពេលបច្ចុប្បន្ន ។

សម្តេច មានប្រសាសន៍ទៀតថា កម្ពុជាមានភព្វសំណាងដែលមានសម្តេចតេជោ ហ៊ុន សែន មិនត្រឹមជាវាវីរជនលះបង់ចំពោះជាតិប៉ុណ្ណោះទេ សូម្បីប្រទេសជាច្រើនមានការគោរពសម្តេច តេជោ ហ៊ុន សែន ដោយផ្អែកលើកត្តាដែលកម្ពុជាក្រោមការដឹកនាំរបស់សម្តេច តេជោ បានស្វែងរកសុខសន្តិភាពពេញលេញ ក្រោយកម្ពុជាឆ្លងកាត់របបជាច្រើន។

ក្នុងពិធីសំណេះសំណាលនោះ សម្តេច ឃួន សុដារី ថ្លែងថា ដើម្បីសម្រេចការងារទូទៅ ប្រកបដោយជោគជ័យ គឺទាមទារត្រូវចូលរួមទាំងស្រ្តី និងបុរស ដើម្បីជំរុញ និងធានាថាការអនុវត្តការងារទាំងឡាយមិនប្រឈមសមភាពយេនឌ័ររវាងបុរសនិងស្រ្តី។

សម្តេច ថ្លែងទៀតថា កម្លាំងស្រ្តីមានសារសំខាន់ ព្រោះស្រ្តី មានភាពបត់បែនគ្រប់កាល:ទេស: និងមានសមត្ថភាពវិវឌ្ឍន៍រីកចម្រើនជាងអតីតកាល ខណៈបច្ចុប្បន្នក្នុងចំណោមប្រជាពលរដ្ឋសរុប​នៅទូទាំងប្រទេសកម្ពុជា ក្នុងនោះ ស្រ្តី មានចំនួន ជាង៥០ភាគរយ។

ឆ្លៀតក្នុងពិធីនេះដែរ សម្តេច បានលើកឡើងថា ក្រុមចលនាស្រ្តីដែលប្រកាសទទួលស្គាល់​សមាសភាពនាថ្ងៃនេះ ជាសេនាធិការជូនគណបក្សថ្នាក់ស្រុក ឃុំ ភូមិ ដោយដើរតួនាទីជាបណ្តាញ​ស្រ្តីឃុំ ជាក្រុមត្រូវស្វែងយល់ពីសុខទុក្ខ និងជីវភាពរស់នៅឱ្យបានជាប់​ជាប្រចាំជាមួយប្រជាពលរដ្ឋ សំដៅចូលរួមដោះស្រាយបញ្ហានានាក្នុងមូលដ្ឋាន ។

ជាមួយគ្នា សម្តេច ឃួន សុដារី សង្កត់ធ្ងន់ថា ការងារសំខាន់ដែលជាការពេញចិត្ត និងជំនឿចិត្តពី​ប្រជាពលរដ្ឋគាំទ្រមកលើ​រាជរដ្ឋាភិបាល គឺចាប់តាំងពីយុទ្ធសាស្រ្តដំណាក់កាលចតុកោណ មកដំណាក់កាលយុទ្ធសាស្រ្តបញ្ចកោណ នាពេលបច្ចុប្បន្ន បានកំណត់បន្តអាទិភាពលើមនុស្ស ជាកត្តាចំបងរបស់រាជរដ្ឋាភិបាល នីតិកាលទី៧នៃរដ្ឋសភា ដើម្បីធានាតម្កល់ប្រយោជន៍ជូនប្រជាជន។

បន្ថែមលើនេះ សម្តេច ឃួន សុដារី បានណែនាំដល់ក្រុមចលនាស្រ្តីត្រូវយកសមត្ថភាព ចូលរួមពង្រឹង និងដឹកនាំ ហើយ​សហការ ដោយកំណត់មុខសញ្ញាប្រជាពលរដ្ឋជាស្រ្តី និងក្មេងស្រី ដេីម្បីរួមចំណែកក្នុងកិច្ចការមនុស្សធម៌ ​ការងារសង្គម ពិសេសកិច្ចការរបស់រាជរដ្ឋាភិបាលលើ​ការគាំពារសង្គម ដូចជា ប័ណ្ណសមធម៌ជាដើម​ដែលទាំងនេះតបតាមអនុសាសន៍របស់សម្តេចតេជោ ចុះ ជួប ចុះជួយ ព្រមទាំងដោះស្រាយភ្លាមៗជូនពួកគាត់៕