ពលរដ្ឋសរសើររដ្ឋបាលរាជធានីភ្នំពេញ ដែលបានរៀបចំឱ្យមានផ្លូវថ្មើរជើង​សម្រាប់ដើរលេង​កម្សាន្ត​ចុងសប្ដាហ៍

ប្រជាពលរដ្ឋរស់នៅរាជធានី និងមកពីបណ្ដាខេត្ត រួមជាមួយអាជីវករ បានកោត​សរសើរ​រដ្ឋបាល​រាជ​ធានី​ភ្នំពេញ ចំពោះការរៀបចំឲ្យមានផ្លូវថ្មើរជើង (Walk Street) ស្របមាត់​ទន្លេ​ដើម្បី​ជួយ​ឲ្យ​ប្រជាជន​ខ្មែរទាំងអស់សប្បាយរីករាយនាពេលចុងសប្តាហ៍។

បើតាមអ្នកស្រី អ៊ូច សុផាត ពលរដ្ឋរស់នៅរាជធានីភ្នំពេញរួមនិងពលរដ្ឋមកតាមបណ្តាខេត្ត បាន​ប្រាប់ BTV នៅល្ងាចថ្ងៃទី២៧ ខែមេសា ឆ្នាំ២០២៥ថា បន្ទាប់​ពី​បាន​មក​ដើរ​កម្សាន្ត​នៅ​តាម​បណ្តោយ​ផ្លូវ​ថ្មើរជើង រូបគាត់ ក៏ដូចជាប្រជាពលរដ្ឋជាច្រើនទៀត សង្កេតឃើញថា ពិតជា​ប្លែក​ចំពោះ​ការ​រៀបចំនូវកម្មវិធីកម្សាន្តនានា ដូចជា៖ ការប្រគុំតន្រី្តសម័យ បុរាណ ការ​សម្តែង​របាំ​ប្រពៃណី ការចូលរួមរាំកម្សាន្តសប្បាយរបស់បងប្អូនប្រជាពលរដ្ឋនិងល្បែងប្រជាប្រិយខ្មែរ និង​ស្តង់​លក់​ចំណីអាហារ ភេសជ្ជៈ និងវត្ថុអនុស្សាវរីយ៍ជាច្រើននេះ ពិតជាមានសោភណភាពល្អ សណ្តាប់​ធ្នាប់ និងសុខសុវតិ្ថភាព ធ្វើឲ្យពួកគាត់មានភាពកក់ក្តៅ និងពិតជាសប្បាយរីករាយខ្លាំងណាស់។

ជាមួយគ្នានោះពួកគាត់ ក៏បានចូលទិញចំណីអាហារ ភេសជ្ជៈនានា និងវត្ថុអនុវស្សាវរីយ ដែល​មាន​ដាក់​លក់លើផ្លូវថ្មើរជើងទាំងអស់នេះផងដែរ។ ពួកគាត់ក៏សូមគោរពកោតសរសើរចំពោះរដ្ឋបាលរាជធានីភ្នំពេញ ជាពិសេសរាជរដ្ឋាភិបាល ដែល​អនុញ្ញាតបង្កើតឲ្យមានផ្លូវថ្មើរជើងនេះឡើង ដើម្បី​ឲ្យ​ពួក​គាត់​មាន​ពេល​ទំនេរ​សម្រាក​ពី​ការងារ​នា​ថ្ងៃ​សៅរ៍ និងថ្ងៃអាទិត្យ បានអញ្ជើញមកដើរកម្សាន្តលើផ្លូវថ្មើរជើងស្របតាមមាត់ទន្លេ ចាប់ពី​ម៉ោង​៦​ល្ងាច រហូតដល់ម៉ោង១១យប់ ចាប់ពីមុខផ្សាររាត្រី រហូតដល់មុខព្រះបរមរាជវាំង ស្ថិត​នៅ​ក្នុង​ខណ្ឌ​ដូនពេញ រាជធានីភ្នំពេញនេះ។

ចំណែកអាជីវករ សួរ សារី អ្នកចម្លាក់ស្បែកខេត្តសៀមរាប ផលិតផលខ្មែរ ចម្លាក់ស្បែក មក​ដាក់​តាំង​លក់​តាមបណ្តោយផ្លូវថ្មើរជើង ជារៀងរាល់ថ្ងៃសៅរ៍ និងថ្ងៃអាទិត្យ បានលើកឡើងដែរថា ការ​រៀប​ចំ​ឲ្យមានផ្លូវថ្មើរជើងនេះ ពិតជាមានអត្ថប្រយោជន៍យ៉ាងច្រើនដល់អាជីវករ និងអាជីវកម្ម ព្រម​ទាំង​បង​ប្អូន​ប្រជាពលរដ្ឋទាំងអស់។

ជាចុងក្រោយអាជីករនោះ បញ្ជាក់ទៀតថា សម្រាប់ការចូលរួមរបស់អាជីវករ និងអាជីវកម្ម ដែល​មក​តាំង​បង្ហាញរាល់ផលិតផលគ្រប់បែបយ៉ាង លើផ្លូវថ្មើរជើងនេះ ដើម្បីឲ្យប្រជាជនខ្មែរយើង បាន​ស្គាល់ និងបានដឹង ជាពិសេសបានចូលរួមជួយអភិរក្ស និងថែរក្សា ដល់​ផលិត​ផល​របស់​ខ្មែរ​យើង​ទាំ​ង​អស់​គ្នា៕ អត្ថបទ រដ្ឋា