មន្ត្រីចូលនិវត្តន៍អរគុណរដ្ឋាភិបាលដែលបន្តយកចិត្តទុកដាក់ និងដំឡើងប្រាក់​របប​សន្តិសុខ​សង្គមជាប្រចាំ

មន្ត្រីចូលនិវត្តន៍ រាប់បញ្ចូលទាំងមន្ត្រីស៊ីវិល ក៏ដូចជា អតីតយុទ្ធជន បង្ហាញនូវក្ដីរីករាយ ដែលរាជរដ្ឋាភិបាល នៅតែបន្តយកចិត្តទុកដាក់ ថែមទាំងបន្តដំឡើងប្រាក់របបសន្តិសុខសង្គមជូនពួកគាត់ជាប្រចាំ។ ជាក់ស្ដែងចាប់ពីខែ មេសា ឆ្នាំ ២០២៥នេះ រាជរដ្ឋាភិបាល បានសម្រេចដំឡើងប្រាក់សោធនជូនអតីតមន្ត្រីរាជការស៊ីវិល និងអតីតយុទ្ធជនទូទាំងប្រទេស។

រាជរដ្ឋាភិបាលកម្ពុជា បានសម្រេចដំឡើងប្រាក់របបសន្តិសុខសង្គមប្រចាំខែ ជូនគ្រប់អតីតមន្ត្រីរាជការស៊ីវិល និងអតីតយុទ្ធជន។ ការដំឡើង គឺចំនួនថវិកា ២០ ០០០រៀល សម្រាប់អតីតមន្ត្រីរាជការស៊ីវិល និងអតីតយុទ្ធជន ដែលចូលនិវត្តន៍មុនឆ្នាំ ២០២៤។ សម្រាប់អតីតមន្ត្រីរាជការស៊ីវិល និងអតីតយុទ្ធជន ដែលទទួលបានថវិកាប្រចាំខែទាបជាង ៨៤៥ ០០០រៀល នឹងត្រូវដំឡើងឱ្យដល់ ៨៤៥ ០០០រៀល ក្នុងមួយខែ។ ការសម្រេចថ្មីនេះ គឺត្រូវអនុវត្តចាប់ពីថ្ងៃទី ១ ខែមេសា ឆ្នាំ ២០២៥។

ការសម្រេចថ្មីរបស់រាជរដ្ឋាភិបាលនេះ ផ្ដល់ជាស្នាមញញឹមដល់គ្រប់អតីតមន្ត្រីរាជការស៊ីវិល និងអតីតយុទ្ធជន។ ពួកគាត់បង្ហាញនូវក្ដីរីករាយ ដោយលើកឡើងថា រាជរដ្ឋាភិបាល ក្រោមការដឹកនាំដោយសម្ដេចតេជោ ហ៊ុន សែន នាពេលអតីតកាល ក៏ដូចជារាជរដ្ឋាភិបាលក្រោមការដឹកនាំដោយសម្ដេចធិបតី ហ៊ុន ម៉ាណែត នាពេលបច្ចុប្បន្ន តែងមានការយកចិត្តទុកដាក់ ដល់សុខទុក្ខមន្ត្រីចូលនិវត្តន៍ និងដំឡើងប្រាក់របបសន្តិសុខសង្គមជាប្រចាំជូនពួកគាត់ដើម្បីសម្រួលដល់ជីវភាពរស់នៅ។

ជាការសម្រួលដល់ការប្រើប្រាស់ថវិការបស់អតីតមន្ត្រីរាជការស៊ីវិល និងអតីតយុទ្ធជន រាជរដ្ឋាភិបាលកម្ពុជា ក៏ផ្ដល់ការបើកប្រាក់របបសន្តិសុខសង្គម ចំនួនពីរដងក្នុងមួយខែ ដូចមន្ត្រីរាជការដែលកំពុងបំពេញការងារផងដែរ។ សម្រាប់ក្របខណ្ឌរាជធានីភ្នំពេញ ត្រូវទៅបើកសាច់ប្រាក់នៅធនាគារនៅ កាណាឌីយ៉ា  រីឯនៅតាមបណ្ដាខេត្តត្រូវទៅបើកសាច់ប្រាក់ ដោយត្រូវភ្ជាប់ជាមួយសៀវភៅគណនី អត្តសញ្ញាណប័ណ្ណសញ្ជាតិខ្មែរ ឬកាតអេធីអឹម៕

ចំពោះនៅតាមបណ្ដាខេត្ត ត្រូវទៅបើកសាច់ប្រាក់នៅធនាគារអេស៊ីលីដា៕ អត្ថបទ៖ គឹម ហុក