ស្នងការខេត្តបន្ទាយមានជ័យ ដាក់បទបញ្ជាដល់កម្លាំងនគរបាលទូទាំងខេត្ត ត្រូវចាត់វិធានការបង្ក្រាបមុខសញ្ញាក្មេងទំនើង និងទីតាំងលក់បារីអេឡិចត្រូនិច

បន្ទាយមានជ័យ៖ ដើម្បីធានាបាននូវ សន្តិសុខ សណ្តាប់ធ្នាប់ សុវត្ថិភាពសង្គម នៅថ្ងៃទី០២ ខែឧសភា ឆ្នាំ២០២៥ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានដាក់ចេញនូវបទបញ្ជា ដល់កម្លាំង​នគរបាលទូទាំងខេត្ត កម្លាំងនគរបាលជំនាញ និងបណ្តាអធិការដ្ឋាននគរបាលក្រុង-ស្រុក ត្រូវចាត់វិធានការពង្រឹងការយាមល្បាត​ ប្រចាំការ២៤ម៉ោង ​រឹតបន្តឹងសន្តិសុខ បង្ការ ទប់ស្កាត់ បង្ក្រាបរាល់បទល្មើសគ្រប់ប្រភេទក្នុងភូមិសាស្រ្តខេត្តបន្ទាយមានជ័យ ពិសេសបទល្មើសក្រុមក្មេងទំនើង។

លោកឧត្តមសេនីយ៍ទោ សិទ្ធ ឡោះ បានដាក់ចេញបទបញ្ជា និងវិធានការដល់កម្លាំង​នគរបាល​តាមបណ្តាអធិការដ្ឋាននគរបាលគ្រប់ក្រុង-ស្រុក ធ្វើយ៉ាងណាត្រូវបង្ការ ទប់ស្កាត់ បង្ក្រាប បទល្មើស​គ្រប់ប្រភេទ ឲ្យបានខាច់ខាតពិសេសបទល្មើសក្មេងទំនើង និងទីតាំងធ្វើអាជីវកម្មលក់​ចែកចាយ​បារីអេឡិចត្រូនិច ត្រូវឃាត់យកមកសួរនាំ និងមានចំណាត់ការតាមនីតិវិធីច្បាប់។

ទន្ទឹមគ្នានេះលោកឧត្តមសេនីយ៍ទោ ​សិទ្ធិ ឡោះ ​ក៏បានដាក់ចេញផែនការដល់កម្លាំងជំនាញ និង​កម្លាំងអធិការដ្ឋានគ្រប់ក្រុងស្រុក ១-ពង្រឹងការចុះផ្សព្វផ្សាយគោលនយោបាយ ភូមិ ឃុំ-សង្កាត់ មានសុវត្ថិភាព -ផលប៉ះពាល់នៃគ្រឿងញៀន និងបារីអេឡិចត្រូនិច -ពង្រឹងការត្រួតអាវុធគ្រឿងផ្ទុះ -ច្បាប់ចរាចរណ៍ផ្លូវគោក និងទប់ស្គាល់​អ្នកបើកបរមានជាតិស្រវឹង(ជាតិអាល់កុលលើសកម្រិត) ពេលរាត្រីផងដែរ៕ឃិនសារិទ្ធ