មនុស្សប្រមាណ២០០០នាក់ រួមគ្នាផ្សព្វផ្សាយពីរមណីយដ្ឋាន ទឹកធ្លាក់អូរដា ក្នុងស្រុកភ្នំក្រវាញ

ពោធិ៍សាត់៖ នៅថ្ងៃទី៤ ខែឧសភា ឆ្នាំ២០២៥នេះ ក្រុមយុវជន ក៏ដូចជាមន្ត្រីរាជការ និងបងប្អូនប្រជាពលរដ្ឋមកពីតាមបណ្តាក្រុងស្រុកនានាក្នុងខេត្តពោធិ៍សាត់ ប្រមាណ២០០០នាក់ បានរួមគ្នាធ្វើដំណើរកំសាន្តទៅកាន់ រមណីយដ្ឋាន ទឹកធ្លាក់អូរដា ស្ថិតក្នុងភូមិវាលវង់ ឃុំរកាត ស្រុកភ្នំក្រវាញ ក្រោមការផ្តួចផ្តើមនិងដឹកនាំដោយ ឯកឧត្តមបណ្ឌិត ទី ថានី សមាជិករដ្ឋសភានិងជាអ្នកតំណាងរាស្ត្រខេត្តពោធិ៍សាត់ និងដោយមានការអញ្ជើញជាអធិបតីភាពពី ឯកឧត្តម ខូយ រីដា អភិបាលនៃគណៈអភិបាលខេត្ត តំណាងក្រុមការងារចុះជួយស្រុកភ្នំក្រវាញ ព្រមទាំងមានការចូលរួមពីថ្នាក់ដឹកនាំខេត្ត និងអាជ្ញាធរក្រុងស្រុកផងដែរ ។

ឯកឧត្តមបណ្ឌិត ទី ថានី បានឲ្យដឹងថាគោលបំណងនៃដំណើរកំសាន្តរួមគ្នានេះ គឺដើម្បីចូលរួមផ្សព្វផ្សាយពីតំបន់រមណីយដ្ឋានទឹកធ្លាក់អូរដា ស្រុកភ្នំក្រវាញ ក្រោមប្រធានបទ «រួមគ្នាការពារថែរក្សាបរិស្ថាន ដើម្បីលើកស្ទួយទេសចរណ៍ធម្មជាតិ ខេត្តពោធិ៍សាត់» ដោយក្នុងដំណើរកំសាន្តនេះរួមមាន កម្មវិធីបំបួសដើមឈើ កម្មវិធីចាក់នំបាញ់ឆែវ១៥០០បន្ទះ និងអាហារសាមគ្គី កម្មវិធីប្រកួតហូបនាំបាញ់ឆែវខ្នាតយក្ស កម្មវិធីប្រកួតបាលទះមិត្តភាពរវាង បណ្តាក្រុងស្រុក រួមនិងកម្មវិធីសប្បាយៗជាច្រើនទៀត ។

ឯកឧត្តម ខូយ រីដា អភិបាលខេត្ត មានប្រសាសន៍លើកឡើងថា ស្របពេលផ្លូវចូលមកកាន់រមណីយដ្ឋាន ទឹកធ្លាក់អូរដា ត្រូវបានស្ថាបនាឡើងវិញ ធ្វើឲ្យបងប្អូន​ប្រជាពលរដ្ឋក៏ដូចជាអ្នកទេសចរណ៍មានភាពងាយស្រួលធ្វើដំណើរមកកំសាន្តនៅរមណីយដ្ឋានមួយនេះ ដូចនេះសូមយុវជន និងគ្រប់ភាគីពាក់ព័ន្ធទាំងអស់ត្រូវរួមគ្នា ផ្សព្វផ្សាយពីរមណីយដ្ឋាន ទឹកធ្លាក់អូរដាឲ្យបានទូលំទូលាយជាពិសេសគឺតាមបណ្តាញសង្គមនានា ស្របតាមពាក្យស្លោក «ប្រជាជនម្នាក់ ជាអ្នកផ្សព្វផ្សាយទេសចរណ៍កម្ពុជាម្នាក់ » ដើម្បីទាក់ទាញអ្នកទេសចរណ៍​ទាំងក្នុង​ខេត្តនិងក្រៅខេត្តឲ្យបានដឹងបានលឺនិងចូលមកកំសាន្ត ដែលនឹងផ្តល់អត្ថប្រយោជន៍ជាច្រើន​ដល់បងប្អូនប្រជាពលរដ្ឋក្នុងមូលដ្ឋានស្រុកភ្នំក្រវាញ ។

ជាមួយគ្នានោះឯកឧត្តម អភិបាលខេត្ត សូមឲ្យអាជ្ញាធរស្រុកភ្នំក្រវាញ រួមនិងមន្ទីរជំនាញ់ពាក់ព័ន្ធ​ត្រូវរួមគ្នាអភិវឌ្ឍន៍រមណីយដ្ឋាន ទឹកធ្លាក់អូរដា ឡើងវិញទាំងសោភ័ណ្ឌភាពបរិស្ថានអនាម័យ សន្តិសុខសណ្តាប់ធ្នាប់ និងការផ្តល់សេវាកម្មផ្សេងៗ ។

លោក ធាម សុផាត អភិបាលស្រុកភ្នំក្រវាញ បានឲ្យដឹងថា ទឹកធ្លាក់អូរដា មានចម្ងាយ២៦គីឡូម៉ែត្រ​ពីទីរួមស្រុកភ្នំក្រវាញ គឺជារមណីយដ្ឋានធម្មជាតិ មួយកន្លែងដែលធ្លាប់​មានឈ្មោះល្បីល្បាញ​ក្នុងខេត្តពោធិ៍សាត់ តែជាអកុសលរមណីយដ្ឋាន​មួយនេះត្រូវបានគេទុកចោលអស់​រយៈពេល​ប្រមាណ១៥ឆ្នាំ មិនមានអ្នកទៅលេងកំសាន្តដោយសារកត្តាផ្សេងៗជាពិសេស​គឺផ្លូវធ្វើដំណើរ​មានភាពពិបាកខ្លាំង តែក្នុងឆ្នាំ២០២៥នេះ ដោយក្នុងស្រុកភ្នំក្រវាញ ខេត្តពោធិ៍សាត់ ទទួលបាន​គម្រោងខ្នាតយក្សពីរាជរដ្ឋាភិបាលកម្ពុជា គឺគម្រោងទំនប់ស្ទាក់ទឹកទី២ ដែលមានទីតាំងនៅផ្នែក​ខាងលើ រមណីយដ្ឋានធម្មជាតិអូរដានេះ ហើយដើម្បីចូលទៅសាងសង់ទំនប់នេះបានគឺ ត្រូវត្រួសត្រាយស្ថាបនាផ្លូវចូលជាមុនសិន ដូចនេះធ្វើឲ្យរមណីយដ្ឋានអូរដា មានជីវិតរស់ឡើងវិញ មានអ្នកមកកំសាន្តជាបន្តបន្ទាប់ឡើងវិញដោយសារមានផ្លូវស្រួលធ្វើដំណើរ ៕