ពលរដ្ឋនៅភ្នំពេញនាំគ្នាចាក់វ៉ាក់សាំងការពារជំងឺកូវីដ-១៩បន្ថែម តាមការអំពាវនាវ​របស់​ក្រសួង​សុខាភិបាល

បងប្អូនប្រជាពលរដ្ឋ ក្មេង ចាស់ ប្រុស ស្រី រស់នៅក្នុងមូលដ្ឋានរាជធានីភ្នំពេញ បាន​នាំ​គ្នា​ទៅ​ទួល​វ៉ាក់​សាំង​ការពារជំងឺកូវីដ-១៩ ដូសជំរុញ និងផ្តល់វ៉ាក់សាំង១១មុខ និងថ្នាំគ្រាប់ជីវជាតិអា (A) និង​ថ្នាំ​គ្រាប់​ទម្លាក់សត្វល្អិត ជូនដល់កុមារ និងស្រី្ត ពីក្រុមគ្រូពេទ្យមនី្ទរសុខាភិបាល នៃរដ្ឋបាល​រាជ​ធានី​ភ្នំពេញ ស្ថិតក្នុងសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

ការផ្ដល់ជូនវ៉ាក់សាំង ការពារជំងឺកូវីដ-១៩ ដូសជំរុញ ទី៥ ទី៦ និងទី៧ ព្រមទាំងកុមារ មក​ទទួល​វ៉ាក់​សាំង​ការពារជំងឺ១១មុខ និងថ្នាំគ្រាប់ជីវជាតិអា (A) ថ្នាំគ្រាប់ទម្លាក់សត្វល្អិត និងស្រី្ត ទទួល​វ៉ាក់​សាំង​ការពារជំងឺតេតាណូស ដែលមានអាយុចាប់ពី១៥ឆ្នាំ រហូតដល់៤៤ឆ្នាំ បានរៀបចំ​ដោយ​មនី្ទរ​សុខាភិបាលនៃរដ្ឋបាលរាជធានីភ្នំពេញ ការិយាល័យសុខាភិបាលស្រុកប្រតិបត្តិសែនសុខ និង​ក្រុម​គ្រូ​ពេទ្យមណ្ឌលសុខភាពក្រាំងធ្នង់។

ក្នុងឱកាសទទួលវ៉ាក់សាំងថ្ងៃនេះ មានទាំងមន្រ្ដីមូលដ្ឋាន ប្រជាពលរដ្ឋ ដោយបង្ហាញ​ក្ដីរីករាយ​ដែល​ក្រុម​ការងារគ្រូពេទ្យ បើកយុទ្ធនាការចុះចាក់វ៉ាក់សាំងបន្ថែម តាមតំបន់គោលដៅ​ក្នុង​សហគមន៍ ពិសេសការចុះផ្តល់វ៉ាក់សាំងនេះបានទាំងពីរមុខតែម្តង សម្រាប់មនុស្សពេញ ចាក់​វ៉ាក់​សាំង​ការពារជំងឺកូវីដ-១៩ ដូសជំរុញ និងសម្រាប់កុមារ ចាក់វ៉ាក់សាំងការពារជំងឺ១១ផងដែរ។

បើតាមលោកវេជ្ជបណ្ឌិត អ៊ុក សាន់ដេ ប្រធានកម្មវិធីផ្តល់ថ្នាំបង្ការ នៃការិយាល័យ​សុខាភិបាល​ស្រុក​ប្រតិបតិ្ត​សែនសុខ (ហៅកាត់ OD សែនសុខ) បានឱ្យដឹងថា មនី្ទរសុខាភិបាល​នៃ​រដ្ឋបាល​រាជ​ធានី​ភ្នំពេញ បានចុះមករៀបចំផ្តល់វ៉ាក់សាំងបន្ថែម ជូនដល់បង​ប្អូន​ប្រជា​ពលរដ្ឋ​ស្ថិត​នៅ​តំបន់​ភូមិ​ក្រាំង​អង្រ្កង ផ្តោតសំខាន់ទៅលើការផ្តល់វ៉ាក់សាំងបង្ការជំងឺ១១មុខដល់កុមារ អាយុចាប់ពី៦ខែ ដល់​ក្រោម១៥ឆ្នាំ និងផ្តល់វ៉ាក់សាំងការពារជំងឺកូវីដ-១៩ ដូសជំរុញ។

ក្នុងឱកាសនោះលោកវេជ្ជបណ្ឌិត ប៉ូ រិទី្ធ អនុប្រធានមនី្ទរសុខាភិបាល នៃរដ្ឋបាលរាជធានីភ្នំពេញ បាន​អំពាវនាវដល់បងប្អូនប្រជាពលរដ្ឋទាំងអស់ ចូលរួមការពារខ្លួនពីការឆ្លងជំងឺកូវីដ-១៩ ដោយ​ពាក់​ម៉ាស់​នៅ​គ្រប់ទីកន្លែង ដែលមានមនុស្សច្រើន លាងស្អាតដៃឲ្យបានញឹកញាប់ ក្នុងករណីដឹង​ថា​ខ្លួន​មាន​អាការៈក្តៅខ្លួន ផ្តាសាយ សូមពាក់ម៉ាស់ ដើម្បីការពារទប់ស្កាត់កុំឲ្យឆ្លងទៅអ្នកដទៃ ក៏​ដូច​ជា​ក្នុង​ក្រុមគ្រួសារ ព្រមទាំងអនុវត្តឲ្យបានខ្ជាប់ខ្ជួន តាមសេចកី្ត​ប្រកាស​ព័ត៌​មាន​របស់​ក្រសួង​សុខាភិបាល ស្តីពីការបង្កើនការពារខ្លួនពីការឆ្លងវីរុសកូវីដ-១៩ផងដែរ៕ អត្ថបទ រដ្ឋា