មន្ត្រីរាជការ និងពលរដ្ឋនៅភ្នំពេញបន្តនាំគ្នាមកចាក់វ៉ាក់សាំងកូវីដ-១៩ ដូសជំរុញ ធានា​ភាព​ស៊ាំ​សហគមន៍​ ​ទប់ស្កាត់ការរីករាលដាលនៃជំងឺកូវីដ-១៩

មន្ត្រីរាជការ ប្រជាពលរដ្ឋទូទៅ ក្នុងរាជធានីភ្នំពេញ បានអញ្ជើញមកចាក់វ៉ាក់សាំងកូវីដ-១៩ ដូសជំរុញ ដើម្បីបង្ការជាមុនសំដៅធានាភាពស៊ាំសហគមន៍ ទប់ស្កាត់ការរីករាលដាលនៃជំងឺកូវីដ-១៩ ឆ្នាំ២០២៥ ពីក្រុមការងារគ្រូពេទ្យ នៃមនី្ទរពេទ្យបង្អែកសម្តេចឪ សម្តេចម៉ែ នៃ​មនី្ទរ​សុខាភិបាល នៃរដ្ឋបាលរាជធានីភ្នំពេញ។

បើតាមលោកវេជ្ជបណ្ឌិត ឃី សុខខេង អនុប្រធានមនី្ទរពេទ្យបង្អែកសម្តេចឪ សម្តេចម៉ែ ទទួល​បន្ទុក​បច្ចេកទេស​ តំណាងលោកវេជ្ជបណ្ឌិត អ៊ុន សុភ័ស្ភ នាយកមនី្ទរពេទ្យបង្អែកសម្តេចឪ សម្តេច​ម៉ែ ថ្លែងប្រាប់ BTV ឱ្យដឹងថា ប្រជាពលរដ្ឋរស់នៅក្នុងមូលដ្ឋានខណ្ឌ ឬស្សីកែវ និង​ខ​ណ្ឌ​ជ្រោយ​ចង្រ្វា នៅថ្ងៃនេះបានបន្តមកទទួលថ្នាំបង្ការជំងឺកូវីដ-១៩ ដោយ​ស្ថាន​ភាព​បច្ចុប្បន្ន​មាន​ការ​ផ្ទុះ​រីក​រាល​ដាល​ជំងឺកូវីដ-១៩ បំប្លែងថ្មីនៅតែបន្តកើតមាន។ ដូច្នេះដើម្បីបង្ការការពារជំងឺកូវីដ-១៩ លោក​បានអំពាវនាវដល់ប្រជាពលរដ្ឋ មានអាយុចាប់ពី១២ឆ្នាំឡើងទៅ មកចាក់វ៉ាក់​សាំង​ការ​ពារ​ជំងឺ​កូវីដ​-១៩ ដូសជំរុញ។

ចំណែកមន្ត្រីរាជការ ក៏ដូចជាបងប្អូនប្រជាពលរដ្ឋ មកចាក់វ៉ាក់សាំងកូវីដ-១៩ នៅក្នុងមនី្ទរ​ពេទ្យ​បង្អែក​សម្តេច​ឪ សម្តេចម៉ែ បានយល់ថា ការមកចាក់វ៉ាក់សាំងការពារជំងឺកូវីដ-១៩ ដូសជំរុញ ឬ​ដូស​បន្ថែម គឺបានការពារសុខភាពបានយ៉ាងច្រើន ស្របពេលដែលជំងឺកូវីដ-១៩ កំពុង​រីក​រាល​ដាល​ឡើង​វិញ។

ក្នុងឱកាសនោះ លោកវេជ្ជបណ្ឌិត ឃី សុខខេង បញ្ជាក់ទៀតថា ក្រៅពីផ្តល់ការចាក់វ៉ាក់សាំងកូវីដ-១៩ មនី្ទរពេទ្យបង្អែក ក៏មានផ្តល់សេវាកម្មជាច្រើន ជូនបងប្អូនប្រជាពលរដ្ឋ ដូចជា៖ជំងឺមិនឆ្លង ទឹក​នោមផ្អែម លើសសម្ពាធឈាម ជំងឺកាមរោគ ជំងឺអេដស៍ ផ្នែកជំងឺទូទៅ ផ្នែកសម្ភព និង​ពិនិត្យ​ផ្ទៃ​ពោះ ជាពិសេសចាប់ពីខែឧសភានេះ គឺជារដូវគ្រុនឈាម សូមអំពាវ​នាវ​ដល់​ប្រ​ជាពលរដ្ឋ​ទាំង​អស់​មានការប្រុងប្រយ័ត្ន៕ អត្ថបទ រដ្ឋា