ស៊ុតមាន់ចំនួនជិត២ម៉ឺនគ្រាប់ នាំចូលពីប្រទេសវៀតណាម ត្រូវបាន​មន្រ្តីជំនាញ​ធ្វើការឃាត់ និង​ដកហូត

ភ្នំពេញ៖ ក្រុមអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និង​ផលិត​កម្ម​សត្វ បានស្រាវជ្រាវស៊ើបអង្កេតរហូតកំណត់ ភិនភាគអត្តសញ្ញាណ រថយន្តមួយគ្រឿង បាន​ដឹក​ស៊ុត​មាន់​ចេញ​ពី​ប្រទេស​វៀតណាម ត្រូវបានឃាត់ និងដកហូតស៊ុតមាន់ចំនួន ៦០ដុំ ស្មើ​នឹង​១៨០០០​គ្រាប់។

ប្រតិបត្តិការនេះ បានធ្វើឡើងនៅវេលាម៉ោង២៣ និង៣៥នាទីយប់ នាថ្ងៃទី២១ ខែឧសភា ឆ្នាំ​២០២៥ ក្រុមអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និង​ផលិតកម្ម​សត្វ បានចុះឃាត់ចាប់រថយន្តមួយគ្រឿង ម៉ាកSSANGYONG ISTANA ដឹក​ស៊ុត​មាន់​លើ​ផ្លូវ​ជាតិ​លេខ១ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។

មន្រ្តីជំនាញបានឲ្យដឹងថា រថយន្តម៉ាកSSANGYONG ISTANA ពាក់ស្លាកលេខ ភ្នំពេញ 2I-0231 បាន​ដឹកស៊ុតមាន់ចេញពីប្រទេសវៀតណាម តាមច្រករបៀងស្រុកព្រះស្ដេច ខេត្តព្រៃវែង ឆ្ពោះ​មក​លក់​ចែក​ចាយ​នៅរាជធានីភ្នំពេញ ដោយគ្មានលិខិតអនុញ្ញាតអ្វីទាំងអស់ ត្រូវបាន​កម្លាំង​អន្ត​រាគមន៍​បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ ធ្វើការ​បង្ក្រាប​។

ក្រោយឃាត់រថយន្ត និងដកហូតស៊ុតមាន់ទាំងនេះ ត្រូវបាន ក្រុមអន្ត​រាគមន៍​បង្ក្រាប​បទ​ល្មើស​ចលនា​សត្វ នាំយកទៅរក្សាទុកនៅចត្តាឡីស័ក របស់អគ្គនាយកដ្ឋាន​សុខភាព​សត្វ និង​ផលិត​កម្ម​សត្វ​ ដើម្បីចាត់ការទៅតាមនីតិវិធីច្បាប់៕ អត្ថបទ៖ កុម្ភៈ