ក្រសួងការពារជាតិ ផ្សព្វផ្សាយផែនការយុទ្ធសាស្រ្តបញ្ច្រាបយេនឌ័រ​ដល់នៅ​វិទ្យាស្ថាន​នាយទាហាន​ចំរុះ

លោកជំទាវនាយឧត្តមសេនីយ៍ ដាំ ដារីនី រដ្ឋលេខាធិការ និងជា​ប្រធាន​ក្រុម​ការងារ​យេនឌ័រ​ក្រសួង​ការពារ​ជាតិ នៅព្រឹក ថ្ងៃទី២៩ ខែឧសភា ឆ្នាំ២០២៥ បានអញ្ជើញជា​អធិបតី​ភាព​ក្នុង​ពិធី​ផ្សព្វ​ផ្សាយ​សៀវភៅផែនការយុទ្ធសាស្រ្តយេនឌ័រក្រសួងការពារជាតិ ក្នុងកងយោធពលខេមរភូមិន្ទ ដែល​រៀបចំឡើងនៅសាលប្រជុំវិទ្យាស្ថាននាយទាហានចម្រុះ។

ថ្លែងក្នុង​ពិធីផ្សព្វផ្សាយនោះ លោកជំទាវ នាយឧត្តមសេនីយ៍ រដ្ឋលេខាធិការ បានកោតសរសើរនិងវាយតម្លែខ្ពស់ចំពោះកម្មវិធីផ្សព្វផ្សាយសៀវភៅផែនការយុទ្ធសាស្រ្តបញ្ច្រាបយេនឌ័រ ការរៀបចំកម្មវិធីនេះឡើងក្នុងគោបំណង ដើម្បីផ្សព្វផ្សាយបង្កើនការយល់ដឹង និងអភិវឌ្ឍន៍​សមត្ថភាពដល់ថ្នាក់ដឹកនាំ ក្រុមការងារយេនឌ័រ និងយោធិននៃក​ង​យោធពល​ខេមរភូមិន្ទ​អំពី​គោលគំនិតយេនឌ័រ វិធីសាស្ត្រ និងគន្លឹះសំខាន់ៗក្នុងការបញ្រ្ជាបយេនឌ័រ ដើម្បីលើកកម្ពស់សមភាពយេនឌ័រនិងការបង្កើនភាពអង់អាចដល់ស្ត្រីប្រកបដោយប្រសិទ្ធភាព ដល់យោធិននារីនៃកងយោធពលខេមរភូមិន្ទ។

លោកជំទាវ បានបន្ថែមទៀតថា រាជរដ្ឋាភិបាលនីតិកាលទី៧នៃរដ្ឋសភា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ជាកម្មវិធីនយោបាយសម្រាប់ការកសាង និងការពារមាតុភូមិឆ្នាំ២០២៣ ដល់ឆ្នាំ២០២៨។ ក្នុងនោះរាជរដ្ឋាភិបាលក៏បានកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្រ្តីនិងក្មេងស្រី នៅគ្រប់វិស័យជាអាទិភាពក្នុងរបៀបវារៈគោលនយោបាយ តាមរយៈការពង្រឹងភាពជាពលរដ្ឋ ក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន ដែលក្នុងនោះស្រ្តីគឺជាស្នូល។

លោកជំទាវ នាយឧត្តមសេនីយ៍ រដ្ឋលេខាធិការ ក៏បានលើកឡើងបន្ថែមទៀតថា ក្រសួងការពារជាតិក្រោមការដឹកនាំ របស់នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ជានិច្ចជាកាលតែងតែទទួលបានការយកចិត្តទុកដាក់ក្នុងការលើកម្ពស់សមភាពយេនឌ័រ តាមរយៈការគាំទ្រដល់ការចូលរួមក្នុងការអនុវត្តការងាររបស់យោធិននារីក្នុងគ្រប់កិច្ចការ។

លោកជំទាវ បានបន្តទៀតថាក្រសួងការពារជាតិបានរៀបចំផែនការយុទ្ធសាស្រ្តបញ្រ្ជាបយេនឌ័រក្រសួងការពារជាតិ តំណាក់កាលទី២ ឆ្នាំ២០២៤-២០២៨ បានបង្ហាញពីទស្សនៈ វិស័យរយៈពេល៥ឆ្នាំ ខាងមុខដោយផ្តោតសំខាន់លើការពង្រឹងសមត្ថភាព ចំណេះដឹង ជំនាញ ការទទួលបាននូវតួនាទី ភារកិច្ច និងរបៀបនៃការអនុវត្តការងារ ដើម្បីអោយយោធិននារីអាចចូលរួមបានដូចជាបុរស ក្នុងពេលបច្ចុប្បន្ននេះ សមត្ថភាព និងការចូលរួមអនុវត្តការងាររបស់យោធិននារី គឺមានភាពល្អប្រសើរគួរឱ្យកត់សម្គាល់ ក្នុងនោះក៏មានយោធិននារីដែលមានជំនាញបើករថក្រោះ ជំនាញកំាភ្លើងធំ ជំនាញការពារអាកាស ជំនាញសង្រ្គោះ ជំនាញនគរបាលយុត្តិធម៌ និងជំនាញផ្សេងៗជាច្រើនទៀត ក្នុងនោះការចូលរួមរបស់យោធិននារីក្នុងកងកម្លាំរក្សាសន្តិភាពបោសសំអាតមីននិងកាកសំណាល់សង្រ្គាម ក្រោមឆ័ត្រអង្កការសហប្រជាជាតិគឺមានចំនួនកើនឡើង និងមានការវាយតម្លៃក្នុងលទ្ធផលល្អប្រសើរផងដែរ៕ អត្ថបទ៖ បាន ចក់