ព័ត៌មាន

កិច្ចប្រជុំជ្រើសរើសបេក្ខភាពចូលរួមប្រកួតប្រជែងជាអង្គភាពផ្តល់សេវាសាធារណៈ គំរូក្នុងវិស័យអប់រំ និងវិស័យសុខាភិបាល សម្រាប់ឆ្នាំ២០២៥

បន្ទាយមានជ័យ ៖ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បាន អញ្ជើញក្នុងកិច្ចប្រជុំជ្រើសរើសបេក្ខភាពចូលរួមប្រកួតប្រជែងជា អង្គភាពផ្តល់សេវាសាធារណៈ គំរូ ក្នុងវិស័យអប់រំ និងវិស័យសុខាភិបាល សម្រាប់ឆ្នាំ២០២៥ ដែលពិធីនេះ បានប្រារព្ធ ធ្វើឡើង នៅសាលប្រជុំធំ សាលាខេត្តបន្ទាយយមានជ័យ នាព្រឹកថ្ងៃទី៣០ ខែឧសភា ឆ្នាំ ២០២៥។

ឯកឧត្តម អ៊ុំ រាត្រី អភិបាលខេត្តបន្ទាយយមានជ័យ បានលើកឡើងថា អង្គភាពជាបេក្ខភាពដែលបានចូលរួមដាក់ពាក្យប្រកួតប្រជែងជាអង្គភាពផ្តល់សេវាសាធារណៈគំរូ នៅឆ្នាំ២០២៥ សម្រាប់ខេត្តបន្ទាយមានជ័យ គឺមានចំនួនសរុប ៥៣១ អង្គភាព ក្នុងនោះវិស័យអប់រំមាន សាលាបឋមសិក្សាសាធារណៈចំនួន ៤០៩ សាលា,អនុវិទ្យាល័យ ចំនួន ៥៤ ។ចំពោះវិស័យសុខាភិបាលមាន មណ្ឌលសុខភាព ចំនួន ៦៨ មណ្ឌល ចំពោះការវាយតម្លៃ និងទទួលស្គាល់អង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាល ត្រូវបានអនុវត្តដោយផ្អែកលើចនាករលម្អិត ដែលមានកំណត់នៅក្នុងលក្ខណៈវិនិច្ឆ័យរង នៃលក្ខណៈវិនិច្ឆ័យគោលសំខាន់ៗចំនួន៨។

ឯកឧត្ដម ក៏បានបញ្ជាក់ លក្ខណៈវិនិច្ឆ័យគោលទាំង៨នោះរួមមាន៖ ១.ស្តង់ដាសេវាសាធារណៈ ២.ស្តង់ដា ឬនិយាម នៃការផ្តល់សេវាតាមវិស័យរបស់ក្រសួងអប់រំ យុវជន និងកីឡា ឬក្រសួងសុខាភិបាលផ្អែកលើករណីពាក់ព័ន្ធ ៣.ការគ្រប់គ្រងហិរញ្ញវត្ថុសាធារណៈនៅក្នុងអង្គភាព ក្នុងនោះ ការរៀបចំផែនការថវិកា, ការគ្រប់គ្រងចំណូល, ការអនុវត្តចំណាយទ្រព្យសម្បត្តិរដ្ឋ និងលទ្ធកម្មសាធារណៈ ៤.ការគ្រប់គ្រង និងអភិវឌ្ឍន៍ធនធានមនុស្សនៅក្នុងអង្គភាព ៥.ការរៀបចំ និងកែលម្អបរិស្ថានអង្គភាព ៦.ទំនាក់ទំនងល្អជាមួយប្រជាពលរដ្ឋ សហគមន៍ និងដៃគូអភិវឌ្ឍន៍ ព្រមទាំងការចូលរួមវាយតម្លៃពីអ្នកប្រើប្រាស់សេវាសាធារណៈ ៧.ការដោះស្រាយបញ្ហាប្រឈមនានាជាមួយមន្ត្រី ប្រជាពលរដ្ឋ ឬសហគមន៍ និង ៨.ការផ្តួចផ្តើមគំនិតថ្មីៗ និងនវានុវត្តន៍ ដើម្បីធ្វើឱ្យអង្គភាពមានដំណើរការកាន់តែប្រសើរឡើង៕ដោយ ៖ឃិន សារិទ្ធ