ក្រសួងការងារ៖ លក្ខខណ្ឌ៣ចំណុច ដើម្បីឱ្យសមាជិក ប.ស.ស. មានសិទ្ធិទទួលបានប្រាក់សោធនជរាភាព

ភ្នំពេញ៖ ដើម្បីអាចស្នើសុំប្រាក់សោធនជរាភាព ឬនិយាយបានថា ជាប្រាក់ចូលនិវត្តន៍ ឬប្រាក់រ៉ឺត្រែត ក្រសួងការងារ និងបណ្តុះបណ្តាលវិជ្ជាជីវៈ បានបង្ហាញនូវលក្ខខណ្ឌកំណត់សំខាន់ៗចំនួន០៣ ជូនដល់សមាជិក ប.ស.ស. ដែលមានសិទ្ធិ អាចនឹងទទួលបានដោយស្របច្បាប់។

យោងតាមក្រសួងការងារ និងបណ្តុះបណ្តាលវិជ្ជាជីវៈ សមាជិក ប.ស.ស. ដែលមានសិទ្ធិទទួលបានប្រាក់សោធនជរាភាព (ប្រាក់ចូលនិវត្តន៍ ឬប្រាក់រ៉ឺត្រែត) គឺត្រូវបំពេញលក្ខខណ្ឌកំណត់មួយចំនួន មានដូចជា៖ ១) បានចុះបញ្ជីនៅ ប.ស.ស. ផ្នែកប្រាក់សោធន, ២) បានបង់ភាគទានមក ប.ស.ស. បានយ៉ាងតិច ១២ខែ និង៣) មានអាយុយ៉ាងតិច ៦០ឆ្នាំ។

ដើម្បីអាចស្នើសុំប្រាក់សោធនជរាភាព (ប្រាក់ចូលនិវត្តន៍ ឬប្រាក់រ៉ឺត្រែត) សមាជិក ប.ស.ស. ត្រូវភ្ជាប់ឯកសារសំខាន់ៗដូចខាងក្រោម៖ ១) ប័ណ្ណសមាជិក ប.ស.ស. ច្បាប់ដើម, ២) អត្តសញ្ញាណប័ណ្ណសញ្ជាតិខ្មែរច្បាប់ដើម (មានសុពលភាព) ឬលិខិតឆ្លងដែន (ជនបរទេស) , ៣) សេចក្តីចម្លងសំបុត្រអាពាហ៍ពិពាហ៍ និងសេចក្តីសម្លងបញ្ជាក់សំបុត្រកំណើតកូន (បើមាន) និង៤) លេខគណនីធនាគារអេស៊ីលីដា (មិនមែនលេខអេស៊ីលីដាទាន់ចិត្ត) ឬលេខគណនីធនាគារ កាណាឌីយ៉ា។

ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ទៀតថា ករណីមានចម្ងល់ អាចទំនាក់ទំនងបាន និងដោយឥតគិតថ្លៃ តាមរយៈលេខ ១២៨៦ ឬ១២៩៧ ឬតាមរយៈប្រព័ន្ធផ្សព្វផ្សាយបណ្តាញសង្គមរបស់ក្រសួងការងារ ដើម្បីទទួលព័ត៌មានបន្ថែមពីភ្នាក់ងារ៕