ប្រជាកសិករខេត្តស្វាយរៀងសម្រេចផលិតស្រូវរដូវវស្សាបានជាង៩%នៃផែនការផលិតស្រូវប្រចាំឆ្នាំ ១៦៧ពាន់៥០០ហិចតា

ស្វាយរៀង ៖ លោកសុខ សុទ្ធាវុធ ប្រធានមន្ទីរកសិកម្មរុក្ខាប្រមាញ់និងនេសាទខេត្តស្វាយរៀង នៅរសៀលថ្ងៃទី២ ខែមិថុនា​ ឆ្នាំ២០២៥នេះបានប្រាប់ទូរទស្សន៍ BTV តាមសារតេឡេក្រាម អោយដឹងថាចាប់ពីដើមរដូវរស្សារហូតមកដល់នៅថ្ងៃទី១ ខែមិថុនា ឆ្នាំនេះ កសិករនៅក្នុងខេត្តសម្រេចធ្វើស្រែបានចំនួន ១ម៉ឺន៥ពាន់ ៦៨៨ហិចតា ក្នុងនោះស្រូវស្រាលចំនួន១ម៉ឺន១ពាន់៤៤៨ហិចតា ស្រូវកណ្ដាលចំនួន ៤ពាន់ ៣៦ហិចតា និងស្រូវធ្ងន់ចំនួន ២០៤ហិចតា ស្មើនិង៩.៣៦% នៃផែនការផលិតស្រូវប្រចាំឆ្នាំ ១៦៧ពាន់៥៥០ហិចតា  និងភ្ជួរដាស់ដីបន្ថែមបាន២ម៉ឺន៨ពាន់៣៦៧ហិចតា ។

លោកបានបញ្ជាក់បន្ថែមថាស្រុកដែលក្រុមកសិករសម្រេចផលិតស្រូវ តាមរយៈអំណោយទឹកភ្លៀង និងតាមប្រពន្ធ័សាស្ត្រ បានច្រើន រួមមានស្រុករមាសហែក ចំនួន១ម៉ឺន១២៧ហិចតា  ស្វាយជ្រំ បានចំនួន៣ពាន់១៤៤ហិចតា និងស្រុកកំពង់រោទ៏បានចំនួន៥ពាន់ ២៧៨ហិចតា  ឯស្រុក ក្រុង ចំនួន៥ទៀត ក្រុមកសិករបាននិងកំពុងតែសម្រុកធ្វើការងារបង្កើនផលបន្ទាប់ពីភ្លៀងបានបង្អុរជាបន្តបន្ទាប់នៅប៉ុន្មានថ្ងៃចុងក្រោយនេះ។

តាមរបាយការណ៍របស់មន្ទីរធនធានទឹកនិងឧតុនិយម បានបញ្ជាក់ថា នៅរដូវវស្សាឆ្នាំនេះខេត្តស្វាយរៀងបានទទួលអំណោយទឹកភ្លៀងគ្រប់គ្រាន់នៅគ្រប់ ៦៩០ភូមិ ក្នុងឃុំ/សង្កាត់ទាំង៨០ គួបផ្សំទៅនឹងការប្រើប្រាស់ទឹកនៅតាមប្រព័ន្ធធារាសាស្ត្របន្ថែមផងនោះក្រុមកសិករបានធ្វើការងារបង្កបង្កើនផលមានសន្ទុះល្អប្រសើរជាងឆ្នាំមុនបន្តិច។ ដោយ ៖ ភា សារិទ្ធ

​