មន្ត្រីសុខាភិបាលរាជធានីភ្នំពេញ បន្តអំពាវនាវពលរដ្ឋ អញ្ជើញមក​ចាក់​វ៉ាក់​សាំង​កូវីដ-១៩ ដូសជំរុញ ដើម្បីការពារសុខភាព

លោកស្រីវេជ្ជបណ្ឌិត ទេព ចិន្តា អនុប្រធានមនី្ទរពេទ្យបង្អែកចតុមុខ ការិយាល័យ​សុខាភិបាល​ស្រុក​ប្រតិបតិ្ត​ចតុមុខ មនី្ទរសុខាភិបាល នៃរដ្ឋបាលរាជធានីភ្នំពេញ តាមរយៈBTV ព័ត៌មាន នាព្រឹក​ថ្ងៃទី៣ ខែមិថុនា ឆ្នាំ២០២៥ បានអំពាវនាវដល់បងប្អូនប្រជាពលរដ្ឋ អញ្ជើញ​មក​ចាក់​វ៉ាក់​សាំង​កូវីដ-១៩ ដូសជំរុញ ដើម្បីការពារសុខភាពទាំងអស់គ្នា។

លោកស្រីវេជ្ជបណ្ឌិត បន្តថា សព្វថ្ងៃនេះ មានបងប្អូនប្រជាពលរដ្ឋ ក្មេង ចាស់ ប្រុស ស្រី ចន្លោះ​ពី​៧០ ទៅ១០០នាក់ បានអញ្ជើញមកចាក់វ៉ាក់សាំងបង្ការជំងឺកូវីដ-១៩ ដូសជំរុញ ប្រភេទ ភីហ្វាយហ្សឺ (Pfizer) នៅក្នុងមនី្ទរពេទ្យបង្អែកចតុមុខ ហើយភាគច្រើន​នៃ​ប្រជាពលរដ្ឋ​មក​ទទួលវ៉ា​ក់សាំងនេះ គឺចាក់ពីដូសទី៣ រហូតដល់ដូសទី៦។ ជាពិសេសសូមលើក​ទឹក​ចិត្តមក​ទទួល​វ៉ាក់សាំង ដើម្បីការពារជំងឺកូវីដ១៩ សម្រាប់ជនវ័យចាស់ ជនចាស់ជរា អ្នកមានជំងឺរ៉ាំរ៉ៃ និងមាន​ភាព​ស៊ាំ​ថយ​ចុះជាដើម។

ទន្ទឹមគ្នានោះ ប្រជាពលរដ្ឋ បានមកចាក់វ៉ាក់សាំងកូវីដ១៩ បានលើកឡើងស្រដៀងគ្នាថា ពួកគាត់មានទំនុកចិត្តជាខ្លាំង ដែលព្រឹកនេះបានមកចាក់វ៉ាក់សាំងបង្ការជំងឺកូវីដ-១៩ ពីក្រុមការងារគ្រូពេទ្យនៃមនី្ទរពេទ្យបង្អែកចតុមុខ។

សូមរំលឹកឡើងវិញថា ក្រសួងសុខាភិបាល នៃព្រះរាជាណាចក្រកម្ពុជា សូមអំពាវនាវដល់សាធារណៈជន បងប្អូនប្រជាពលរដ្ឋ បុគ្គល គ្រួសារ និងសហគមន៍ ស្ថាប័ន អង្គភាពពាក់ព័ន្ធទាំងផ្នែកសាធារណៈ និងឯកជន អាជ្ញាធរមូលដ្ឋានគ្រប់លំដាប់ថ្នាក់ បន្តពួតដៃរួមគ្នា ក្នុងការការពារសុខភាពរបស់ខ្លួន និងទីកន្លែងធ្វើការរបស់ខ្លួន ដោយមានការប្រុងប្រយ័ត្នខ្ពស់ និងមានភាពទទួលខុសត្រូវ បន្តអនុវត្តនូវវិធានការសុខាភិបាលឲ្យបានខ្ជាប់ខ្ជួន និងគ្រប់ៗគ្នា ក្នុងនោះពាក់ព័ន្ធនឹងការការពារ និងការចាក់វ៉ាក់សាំងកូវីដ១៩ នូវដូសជម្រុញបន្ថែមទៀត ដើម្បីបញ្ចៀសនូវការរីករាលដាលក្នុងសហគមន៍ ក្នុងគ្រួសារ និងស្ថាប័ននានា ដែលអាចកើតមានជាយថាហេតុ៕ អត្ថបទ៖ រដ្ឋា