គណៈប្រតិភូមកពីស្ថានទូតអង់គ្លេស និងក្រុមហ៊ុនឯកជនប្រមាណ៥០រូប អញ្ជើញ​ទស្សន​កិច្ច​ព្រលាន​យន្ត​ហោះអន្តរជាតិតេជោ

កណ្តាល៖ នៅព្រឹកថ្ងៃទី៣ ខែមិថុនា ឆ្នាំ២០២៥នេះ គណៈប្រតិភូមកពីស្ថានទូតអង់គ្លេស និង​គណៈ​ប្រតិភូតំណាងក្រុមហ៊ុនឯកជនចំនួនប្រមាណ ៥០នាក់ បានអញ្ជើញទស្សនកិច្ច ដើម្បី​ពិនិត្យ​វឌ្ឍនភាព នៃ​ដំណើរការសាងសង់ព្រលានយន្តហោះអន្តរជាតិតេជោ ខណៈគ្រោង​ដាក់​ឲ្យ​ដំណើរ​ការ​នា​ខែកញ្ញាខាងមុខ។

នៅក្នុងដំណើរ​ទស្សនកិច្ចនេះ បានកត់សម្គាល់ឃើញថា ក្រុមគណៈប្រតិភូ​បាន​បង្ហាញ​ទឹក​មុខ​សប្បាយ​រីករាយ និងយល់ឃើញថា ព្រលានថ្មីនេះមានលក្ខណៈទំនើប និងថ្មី ដែលបង្ហាញ​អំពី​ភាព​អស្ចារ្យ​របស់កម្ពុជា និងខណៈដែលប្រទេសកម្ពុជា គឺមានសក្តានុពលជាច្រើនផ្សេងទៀត។

តាម​ការ​លើកឡើងរបស់ លោកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានមានប្រសាសន៍ឱ្យដឹងថា គិតមកដល់ពេលនេះ អាកាស​យាន​ដ្ឋាន​អន្តរជាតិតេជោ ក្រុងតាខ្មៅ សម្រេចការសាងសង់ប្រមាណជាង ៩៦% នឹងគ្រោង​បើក​ឱ្យ​ដំណើរ​ការ គឺនៅថ្ងៃទី៩ ខែកញ្ញា។ ហើយថ្ងៃសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី២០ ខែ​តុលា ឆ្នាំ២០២៥ខាងមុខ ក្រោមអធិបតីភាពដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ព្រលានយន្តហោះអន្តរជាតិតេជោថ្មីនេះ សាងសង់ឡើងលើផ្ទៃដីជាង ២ ៦០០ហិចតា ជាព្រលាន​យន្ត​ហោះ​លំដាប់ F4 ដែលអាចធ្វើអោយយន្តខ្នាតធំចុះចតបានដូចជា ប្រភេទ Airbus A380 និង​ប្រភេទ​ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១។ សូមបញ្ជាក់ទៀតថា គិតរហូតមកដល់ពេលនេះ មន្រ្តី​ជាន់​ខ្ពស់​មក​ពី​បណ្តា​ទូត​ប្រចាំ​ប្រទេសកម្ពុជាជាច្រើនរូប គណៈប្រតិភូមកពីស្ថាប័នរដ្ឋ និងឯកជន រួមទាំងក្រុម​អ្នក​សារព័ត៌មានជាតិ និងអន្តរជាតិជាច្រើន បានអញ្ជើញមកទស្សនា និងស្វែង​យល់​ពី​អាកាស​យាន​ដ្ឋាន​អន្តរជាតិតេជោ ហើយក្រោយពីទស្សនកិច្ចទាំងនោះ មន្រ្តីទូត និងអ្នកសារ​ព័ត៌មាន​ជា​ច្រើន​នាក់​បានវាយតម្លៃ និងយល់ឃើញថា អាកាសយានដ្ឋាននេះល្អទាំងអស់ និងបាន​បង្ហាញ​មិន​នឹក​ស្មាន​ថា ប្រទេសកម្ពុជាមានការវិនិយោគលើព្រលានយន្តហោះថ្មីនេះរហូតដល់ខ្នាត 4F៕ អត្ថបទ៖ ឈិត បូរ៉ាវី