ក្នុងថ្ងៃទិវាបរិស្ថាន អាជ្ញាធរ អង្គការដៃគូ ពលរដ្ឋ និងសិស្សរួមគ្នាសំអាតសំរាមតាមដងទន្លេ

ភ្នំពេញ៖ អង្គការសំអាតទន្លេ-សមុទ្រ សហការជាមួយអាជ្ញាធររាជធានីភ្នំពេញ ដោយ​មាន​ការ​ចូល​រួ​ម​ពី​ប្រជាពលរដ្ឋ និងសិស្សានុសិស្ស បានប្រារព្ធទិវាបរិស្ថានជាតិ និងទិវាបរិស្ថានពិភពលោក លើក​ទី២៩ នៅថ្ងៃទី៥ ខែមិថុនា ឆ្នាំ២០២៥ និងរួមគ្នាសំអាតសំរាមតាមដងទន្លេ រួមទាំង​ផ្សព្វ​ផ្សាយ​ពី​ការទុកដាក់សំរាមឲ្យបានត្រឹមត្រូវ ជាពិសេសសំណល់ប្លាស្ទិក ។

ក្នុងពេលចូលរួមសកម្មភាពសំអាតសំរាម តាមដងទន្លេ ក្នុងថ្ងៃទិវាបរិស្ថានជាតិ និង​ទិវា​បរិស្ថាន​ពិភព​លោក ៥មិថុនា លោក ហុង គីបូរ៉ា ប្រធានបេសកកម្មអង្គការសំអាតទន្លេ-សមុទ្រ បង្ហាញ​នូវ​ការ​សប្បាយ​រីករាយ ដែលបច្ចុប្បន្ន ប្រជាពលរដ្ឋបានយល់ដឹងកាន់តែច្រើន ពីការទុក​ដាក​សំរាម​ឲ្យ​បាន​ត្រឹម​ត្រូវ ទោះបីជាមិនទាន់បាន ១០០ភាគរយ ក៏ល្អប្រសើរជាងមុនច្រើន។

លោកបន្តថា ចំពោះថ្ងៃប្រារព្ធទិវាបរិស្ថាននេះ ក៏មានសកម្មភាពផុលផុសពីប្រជាពលរដ្ឋ និង​សិស្សា​នុសិស្សតូ​ចៗ ដោយមានការគាំទ្រពីអាជ្ញាធរ បានរួមគ្នាចូលរួមសំអាតសំរាមតាមដងទន្លេ ដែល​ជា​ប្រភពទឹកសម្រាប់ប្រើប្រាស់ និងបរិភោគប្រចាំថ្ងៃ ហើយជឿជាក់ថា សកម្ម ភាព​នេះ​នឹង​មាន​បន្តបន្ទាប់ និងជាប្រចាំ ដើម្បីឲ្យកម្ពុជាគ្មានសំរាមបោះចោលពាស់វាលពាស់កាលតទៅទៀត ។

សម្រាប់នាយកសាលា និងសិស្សនៃសាលាបឋមសិក្សា វត្តមង្គលសិរីគៀនឃ្លាំង បានឲ្យដឹងថា សកម្ម​ភាព​សំអាតសំរាមនេះ គឺមិនមែនធ្វើតែនៅពេលថ្ងៃទិវាបរិស្ថាននោះទេ គឺបានធ្វើ​ជា​ប្រចាំ​ទាំង​នៅ​ក្នុង​សាលារៀន ផ្លូវ និងទីសាធារណៈផ្សេង ជាពិសេសគឺផ្ទះសម្បែងផ្ទាល់ ដើម្បីធ្វើ​យ៉ាង​ណា​ឲ្យ​បរិស្ថានស្អាត គ្មានសំរាមចោលផ្ដេសផ្ដាស់ និងទុកដាក់បានត្រឹមត្រូវ ។

គួរបញ្ជាក់ថា នៅឆ្នាំ២០២៥នេះ ទិវាបរិស្ថានជាតិ និងទិវាបរិស្ថានពិភពលោក ៥ មិថុនា ក្រោម​ប្រធាន​ “ប្រយុទ្ធប្រឆាំងការបំពុលដោយប្លាស្ទិក” ហើយចំពោះបញ្ហាសំណល់ប្លាស្ទិកនេះ កម្ពុជា​ក៏​បាន​ប្ដេជ្ញា​ចិត្តចូលរួមជាមួយពិភពលោក ក្នុងការប្រឆាំងការបំពុលដោយប្លាស្ទិក និងការ​ការពារ​បរិស្ថាន តាមរយៈការដាក់ចេញនូវផែនការ និងយុទ្ធនាការផ្សេងៗ ដូចជាយុទ្ធនាការ កាត់​បន្ថយ​ការ​ប្រើ​ប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើ ថង់ប្លាស្ទិកទេ», យុទ្ធនាការ “ដាំដើម​ឈើ​យ៉ាង​តិច ១លានដើម” និងយុទ្ធនាការ “ផ្ទៃមេឃពណ៌ខៀវ” ជាដើម៕ អត្ថបទ បាន សុខរិទ្ធិ