លោកជំទាវបណ្ឌិត ពេជ ចន្ទមុន្នី៖ គិតត្រឹមព្រឹកនេះ យុទ្ធនាការ “១ម៉ឺនរៀល ១ម៉ឺននាក់” ទទួល​បានថវិកា​បរិច្ចាគជាង ៣,៥លានដុល្លារ ខណៈយុទ្ធនាការនេះនឹងបន្ដ​រហូត​ដល់​ដំណាច់​ខែ​មិថុនា

ភ្នំពេញ៖ នៅព្រឹកថ្ងៃទី៦ ខែមិថុនា ឆ្នាំ២០២៥នេះ លោកជំទាវបណ្ឌិត ពេជ ចន្ទមុន្នី ហ៊ុន​ម៉ាណែត​ ប្រធានកិត្តិយសនៃមូលនិធិគន្ធបុប្ផាកម្ពុជា បានបញ្ជាក់ថា យុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៥ របស់មូលនិធិគន្ធបុប្ផាកម្ពុជា ទទួល​បានថវិកា​បរិច្ចាគ​សរុប​ប្រមាណជាង​ ៣,៥លានដុល្លារពីសប្បុរសជន ២៤ម៉ឺននាក់ ខណៈយុទ្ធនាការនេះ នឹងបន្ដ​រហូត​ដល់​ដំណាច់​ខែ​មិថុនា​ ឆ្នាំ២០២៥។ 

លោកជំទាវបណ្ឌិត ពេជ ចន្ទមុន្នី ហ៊ុន​ម៉ាណែត តាមរយៈបណ្ដាញសង្គមផ្លូវការបានបញ្ជាក់ថា គិត​ត្រឹម​ព្រឹក​ថ្ងៃទី​៦ ខែមិថុនា ឆ្នាំ២០២៥ នេះ, យុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៥ របស់មូលនិធិគន្ធបុប្ផាកម្ពុជា ទទួល​បានថវិកា​បរិច្ចាគ​សរុប​សមមូល​ជាប្រាក់ដុល្លារចំនួន ៣ ៥១៧ ១៩៨ ដុល្លារអាម៉េរិក ពីសប្បុរសជនចំនួន ២៤១ ៨៣២ នាក់។ លោកជំទាវបណ្ឌិតបន្តថា យុទ្ធនាការ​នេះ នឹងបន្ដរហូតដល់ដំណាច់ខែមិថុនា ឆ្នាំ២០២៥។

លោកជំទាវបណ្ឌិត ពេជ ចន្ទមុន្នី បាន​ថ្លែង​អំណរ​គុណ​ដល់​ពុក​ម៉ែ​បង​ប្អូន និង​សប្បុរស​ជន​ទាំង​អស់​ដែល​បាន​បរិច្ចាគ ដើម្បីរួមគ្នានាំក្ដីសង្ឃឹម និង​ភាព​ញញឹម​ដល់​ទារក និងកុមារនៅកម្ពុជា។

សូមជម្រាបជូនថា យុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៥ បានប្រកាស​បើក​កាល​ពី​ថ្ងៃ​ទី​១ ខែមិថុនា ឆ្នាំ២០២៥ ​ក្រោមអធិបតីភាព​លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធាន​កិត្តិយស​នៃ​មូល​និធិ​គន្ធបុប្ផា​កម្ពុជា។

យុទ្ធនាការ «១ម៉ឺនរៀល ១ម៉ឺននាក់» នេះ មានរយៈពេលពេញ ១ខែមិថុនា ត្រូវ​បាន​មូល​និធិ​គន្ធ​បុប្ផា​កម្ពុជា​បង្កើត​ឡើង ក្នុងគោលបំណងជំរុញចលនាកៀរគរថវិកាសប្បុរសធម៌ ឱ្យ​កាន់​តែ​ផុស​ផុល និងសកម្មបន្ថែមទៀត ក្នុងចំណោមសិស្ស, និស្សិត, យុវជន, មន្រ្តីរាជការ, ថ្នាក់ដឹកនាំ, ពាណិជ្ជ​ករ, សាធារណជន, ភរិយាថ្នាក់ដឹកនាំ, ម្ចាស់ក្រុមហ៊ុន-សហគ្រាស, គណៈ​កម្មការ​ទ្រទ្រង់​មូល​និធិ​គន្ធបុប្ផាកម្ពុជាប្រចាំក្រសួង-ស្ថាប័ន, រដ្ឋបាលរាជធានី-ខេត្ត និង​សមាជិក​សមាគម​ឧកញ៉ា​កម្ពុជា​ ក្នុងមហាចលនាមនុស្សធម៌របស់ជាតិ និងក្នុងស្មារតី “ខែ្មរជួយខ្មែរ”។

សូមរម្លឹកផងដែរថា មូលនិធិគន្ធបុប្ផាកម្ពុជា ត្រូវបានបង្កើត​ឡើង​ក្រោមគំនិតផ្ដួចផ្ដើម ដ៏​ខ្ពង់​ខ្ពស់​ថ្លៃ​ថ្លា​​របស់​សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងបាន​សម្ពោធដាក់ឱ្យដំណើរការជាផ្លូវការ «មូលនិធិគន្ធបុប្ផាកម្ពុជា» កាលពីថ្ងៃទី១១ ខែ​មេសា ឆ្នាំ២០១៨ ក្នុងបុព្វហេតុសង្គ្រោះជីវិតទារក និងកុមារ ព្រមទាំងស្រ្តីមានផ្ទៃពោះ ដែ​ល​ត្រូវ​ការ​ចាំបា​ច់​នូវសេវាពិនិត្យ ព្យាបាល និងសម្ភព នៅមន្ទីរពេទ្យគន្ធបុប្ផា៕