ឯកឧត្ដម ហ៊ុន ម៉ានី អំពាវនាវដល់ពលរដ្ឋទាំងអស់ បន្តរក្សាសេចក្ដីថ្លៃថ្នូរក្នុងភាពជាម្ចាស់ទឹកដីស្របច្បាប់

ភ្នំពេញ ៖ ឯកឧត្ដម ហ៊ុន ម៉ានី នៅយប់ថ្ងៃទី៦ ខែមិថុនា ឆ្នាំ២០២៥ បានសរសេរនៅលើបណ្ដាញសង្គមផ្ទាល់របស់ឯកឧត្ដមអំពាវនាវដល់ពលរដ្ឋទាំងអស់ សូមបន្តរក្សាសេចក្ដីថ្លៃថ្នូរក្នុងភាពជាម្ចាស់ទឹកដីស្របច្បាប់។​

បណ្ដាញសង្គមផ្លូវការរបស់ឯកឧត្ដម ហ៊ុន ម៉ានី នៅយប់ថ្ងៃទី៦ មិថុនានេះបានរំលេចឱ្យឃើញថា ការវិវ ត្តថ្មីៗជាបន្តបន្ទាប់អំពីសភាពការណ៍បញ្ហាជម្លោះព្រំដែនកម្ពុជា-ថៃ ពិតជាបានធ្វើឱ្យយើងទាំងអស់គ្នា ផ្តោតការយកចិត្តទុកដាក់ និងតាមដានជាប់ជាប្រចាំ ជាពិសេសការផុសឡើងកាន់តែខ្លាំងក្លានូវទឹកចិត្តស្នេហាជាតិ ស្នេហាទឹកដី និងស្នេហាសម្បត្តិវប្បធម៌ ដែលជាកេរមរតកដូនតារបស់យើង។ សាររបស់ឯកឧត្ដម ហ៊ុន ម៉ានី ដដែលបន្តថា ខ្ញុំក៏បានកត់សម្គាល់ឃើញមានការអំពាវនាវឱ្យជនរួមជាតិយើងចេ ញធ្វើសកម្មភាពប្រឆាំងតបនឹងទង្វើរបស់ជនជ្រុលនិយមនៃប្រទេសជិតខាង។

ឯកឧត្ដម ហ៊ុន ម៉ានី បន្ថែមថា ក្នុងស្ថានការណ៍នេះ ខ្ញុំសូមអំពាវនាវជាថ្មីម្តងទៀត សូមបងប្អូនប្រជាព លរដ្ឋខ្មែរទាំងអស់គ្រប់និន្នាការ បន្តរក្សាឱ្យបាននូវសេចក្តីថ្លៃថ្នូររបស់យើងក្នុងភាពជាម្ចាស់ស្របច្បាប់ បន្តលើកតម្កើងកិត្តិយស កិត្យានុភាពខ្មែរស្រឡាញ់សន្តិភាព ហើយជឿជាក់លើសមត្ថភាពរបស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការដោះស្រាយបញ្ហាប្រឈមចំពោះមុខនេះ តាមយន្តការច្បាប់ ការទូត និងយោធា ដើម្បីការពារឱ្យបានដាច់ខាតនូវបូរណភាពទឹកដី និងសម្បត្តិវប្បធម៌ជាតិរបស់យើង។

ពិតណាស់បូរណភាពទឹកដី គឺជារឿងរបស់យើងទាំងអស់គ្នា ហើយលើសពីនេះខ្ញុំសូមកោតសរសើរ និងសូមអរគុណដ៏ស្មោះចំពោះបងប្អូនប្រជាពលរដ្ឋទាំងអស់ រួមទាំងយុវជន ដែលតែងតែត្រៀមខ្លួនជានិច្ចក្នុងការចូលរួមក្នុងបុព្វហេតុខឿនការពារជាតិប្រជាជន។

ឯកឧត្ដមបានបន្តអំពាវនាវដល់បងប្អូនទាំងអស់ សូមបន្តយកចិត្តទុកដាក់តាមដានសភាពការណ៍ព្រំដែន រក្សាទំនាក់ទំនង ក៏ដូចជាកិច្ចសហប្រតិបត្តិការប្រចាំថ្ងៃជាមួយប្រទេសជិតខាងឱ្យបានល្អប្រសើរ ដើម្បីការពារបូរណភាពទឹកដីរបស់យើងផង និងភាពរីកចម្រើននៃប្រជាជនរបស់យើងផង៕

​ដោយ៖ គង់ ឌិន​