ទេសាភិបាលធនាគារជាតិ ស្វែងយល់សុខភាពប្រព័ន្ធធនាគារ សម្រាប់ជាយន្តការដោះស្រាយបញ្ហានានា

ទេសាភិបាលធនាគារជាតិនៃកម្ពុជា ស្វែងយល់ពីបញ្ហាសុខភាពប្រព័ន្ធធនាគារ និងប្រមូលធាតុចូលពីភាគីពាក់ព័ន្ធ ក្នុងការរៀបចំ យន្តការដោះស្រាយបញ្ហាប្រឈម ដើម្បីរក្សាស្ថិរភាពហិរញ្ញវត្ថុ និងចូលរួមគាំទ្រដល់យុទ្ធសាស្រ្ត និងការអនុវត្តគោលនយោបាយរបស់ រាជរដ្ឋាភិបាល។

លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា ថ្ងៃទី១៧ ខែមិថុនា ឆ្នាំ២០២៥ កន្លងមកនេះ បានអញ្ជើញ ជាគណៈធិបតី នៃកិច្ចប្រជុំពិភាក្សារវាងធនាគារជាតិនៃកម្ពុជា សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងតំណាង មកពីគ្រឹះស្ថានធនាគារនិងហិរញ្ញវត្ថុ ប្រជុំពិភាក្សាស្វែងយល់ពីសុខភាពប្រព័ន្ធធនាគារ និងប្រមូលធាតុចូលសំខាន់ៗពីភាគីពាក់ព័ន្ធ ក្នុងការរៀបចំយន្តការដោះស្រាយបញ្ហាប្រឈម ដើម្បីរក្សាស្ថិរភាពហិរញ្ញវត្ថុ និងចូលរួមគាំទ្រដល់យុទ្ធសាស្រ្ត និងការអនុវត្តគោល- នយោបាយរបស់រាជរដ្ឋាភិបាល។

ជុំវិញសុខភាពគ្រឹះហិរញ្ញវត្ថុនេះដែរ, លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា (CMA) លើកឡើងថា ក្រោយស្ថានភាពនៃវិបត្តិជំងឺកូវីដ-១៩ ស្របពេលភាពមិនទាន់ច្បាស់លាស់ទាំងក្នុង និងក្រៅប្រទេស ជាលទ្ធិផល, កំណើនឥណទាន នៅក្នុងវិស័យក្រូហិរញ្ញវត្ថុនៅកម្ពុជា មិនសូវមានការកើនឡើងខ្លាំងនោះឡើយ ខណៈប្រាក់បញ្ញើនិងសេវាប្រាក់សន្សំ មានការកើនឡើង គួរកត់សម្គាល់ សម្រាប់អាចមានដើមទុនច្រើន សម្រាប់ចាក់សាច់ប្រាក់ចូលទៅក្នុងទីផ្សារ។ លោកបានបន្ថែមឱ្យដឹងថា តែទោះបីយ៉ាង ណា នៅក្នុងត្រីមាសទី១ ឆ្នាំ២០២៥ នេះ ឥណទានដែលផ្តល់ដោយគ្រឹះស្ថានមីក្រូហិរញ្ញវត្ថុ បានងើបឡើងគួរកត់សម្គាល់ ក្នុងនោះ ចំនួនអតិថិជនក៏បានមានកំណើនកើនឡើងខ្លាំងផងដែរ។

លោក កាំង តុងងី បញ្ជាក់ថា ជុំវិញឥណទាននេះ អ្វីដែលជាទីចាប់អារម្មណ៍ខ្លាំង នៅក្នុងត្រីមាសទី១នេះ ឆ្នាំ២០២៥ គ្រឹះស្ថានមីក្រូ ហិរញ្ញវត្ថុ ទទួលបានប្រាក់បញ្ញើររបស់ប្រជាពលរដ្ឋ មានការកើនឡើងខ្លាំង ក្នុងរង្វង់ប្រមាណ ៩,៦ ភាគរយ បើធៀបត្រីមាសទី១ និង ត្រីមាសទី៤ ឆ្នាំ២០២៤ គឺបានកើនឡើងដល់ប្រមាណ ២ ៧៨៨ លានដុល្លារអាមេរិក នៅក្នុងចំណោមគ្រឹះស្ថានចំនួន ៤ ប៉ុណ្ណោះ ដែលមានអាជ្ញាបណ្ណទទួលប្រាក់បញ្ញើ៕ អត្ថបទ៖ សុន រ៉ាឌី,