គណៈប្រតិភូក្រសួងវប្បធម៌ និងវិចិត្រសិល្បៈ នាំយកអំណោយ និង​សាកសួរ​សុខទុក្ខ​កងទ័ព​នៅ​ទិស​យោធភូមិភាគទី៤

លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ នៅថ្ងៃទី២១ ខែ​មិថុនា ឆ្នាំ២០២៥នេះ បានដឹកនាំគណៈប្រតិភូ នាំយកអំណោយសម្ភារៈ គ្រឿងឧបភោគ បរិភោគ និងសាកសួរសុខទុក្ខកងទ័ពនៅ​ទិសយោធភូមិភាគទី៤ ដែលកំពុង​ឈរ​ជើង​ការពារ​បូរណ​ភាព​ទឹក​ដី​តាមព្រំដែនកម្ពុជា ថៃ ។

នៅក្នុងឱកាសនោះលោកជំទាវបណ្ឌិតសភាចារ្យ ភឿង សកុណា បានពាំនាំនូវ​ប្រសាសន៍​ផ្តាំ​ផ្ញើ​សាក​សួរ​សុខទុក្ខ ពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា​ដល់​កង​កម្លាំង​ប្រដាប់​អាវុធ​ទាំង​អស់​ដែល​បាន​លះ​បង់​កម្លាំងចិត្ត និងមានឆន្ទះមុះមុត​ឈរ​ជើង​ការពារ​ដែន​អធិបតេយ្យ​របស់​កម្ពុជា​ប្រកប​ដោយ​ភក្តីភាព និងអង់អាចក្លាហាន ពីសត្រូវឈ្លានពាន។ លោកជំទាវបណ្ឌិតសភាចារ្យរដ្ឋមន្រ្តី ក៏​បាន​បន្ថែមថា ទោះបីជាស្ថិតក្នុងស្ថានភាពបែបណាក៏ដោយ ក្នុងនាមសមរភូមិក្រោយ នៅតែ​បន្ត​ចូល​រួម​យកចិត្តទុកដាក់ គិតគូរពីសុខទុក្ខ លើកទឹកចិត្ត និងជ្រោម​ជ្រែង​ជា​និច្ច​ដល់​កង​កម្លាំង​ប្រដាប់​អាវុធ​តាមបន្ទាត់ព្រំដែន ក្នុងស្មារតីការពារជាតិ និងសាមគ្គីជាតិតែមួយ។

សូមបញ្ជាក់ថា អំណោយដែលបានផ្តល់ជូនកងទ័ពនៅទីបញ្ជាការអង្គរក្ស ប្រចាំទិសទី១ ប្រាសាទ​ព្រះវិហាររួមមាន៖ អង្ករ ១០តោន ទឹកត្រី២៥០យួរ ទឹកស៊ីអ៊ីវ២០០យួរ ត្រីខកំប៉ុង ៥០កេសធំ មី ១០០កេស ទឹកដោះគោខាប់១០០កេសធំ ទឹកបរិសុទ្ធ១០០កេស កាហ្វេ​២០កេស ស័ង្កសី​៥០០​សន្លឹក​ ឧបត្ថម្ភកងទ័ព៦០០នាក់ ក្នុងម្នាក់ទទួលបាន៨ម៉ឺនរៀល និងឧបត្ថម្ភ​គណៈ​បញ្ជាការ​ឯកភាព​សមរភូមិទិសយោធភូមិភាគទី៤ ថវិកា ១៥លានរៀល៕