អភិបាលខេត្តប៉ៃលិន អញ្ជើញ​ជួបសំណេះសំណាល​សួរ​សុខ​ទុក្ខ​ និង​ជូន​ដំណើរ​ពលករ​ខ្មែរ​មក​ពី​ប្រទេស​ថៃ

ប៉ៃលិន៖ លោកជំទាវបណ្ឌិត បាន ស្រីមុំ អភិបាលខេត្តប៉ៃលិន បាន​បន្ត​អញ្ជើញ​ជួប​សំណេះ​សំណាល​សួរសុខទុក្ខ និងជូនដំណើរ​ពលករ​ខ្មែរ​ដែល​វិល​មក​ពី​ប្រទេស​ថៃ​តាម​ច្រក​ទ្វារ​ព្រំដែន​អន្តរ​ជាតិ​ព្រំ ​ខេត្តប៉ៃលិន ដែលក្នុងឱកាសនេះ លោកជំទាវបានមានប្រសាសន៍ណែនាំដល់ក្រុមការងារ និង​សមត្ថកិច្ចចម្រុះ ដែល កំពុងប្រចាំការនៅច្រកទ្វារព្រំដែន ត្រូវយកចិត្តទុក្ខដាក់ និង​ជួយ​សម្រប​សម្រួល​ជូន​ដល់ពលករ ដែលត្រ ឡប់មកពីប្រទេសថៃប្រកបដោយការទទួលខុសត្រូវខ្ពស់។

លោកជំទាវ បានមានប្រសាសន៍ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានធ្វើ ការ​ណែនាំដល់ក្រសួង-ស្ថាប័នពាក់ព័ន្ធ កងកម្លាំងប្រដាប់អាវុធគ្រប់ប្រភេទ និង​រដ្ឋបាល​ខេត្ត​ជាប់​ព្រំដែន​ ថៃទាំង៧ ក្នុងករណីមានការវិលត្រឡប់ក្នុងទ្រង់ទ្រាយធំដោយមូលហេតុណាមួយ របស់​ពលករ​ខ្មែរពីប្រទេសថៃ ត្រូវត្រៀមសម្របសម្រួលការឆ្លងកាត់ព្រំដែន ការស្នាក់នៅបណ្ដោះអាសន្ន ការ​ហូបចុក ការថែទាំ ព្យាបាលសុខភាពបឋម និងដឹកជញ្ជូន​ពី​ព្រំដែន​ត្រឡប់​ទៅ​ស្រុក​កំណើត​វិញ​ដោយ​ឥតគិតថ្លៃ ជាពិសេស ត្រូវជួយស្វែងរកការងារក្នុងស្រុកជូនដល់ពលករផងដែរ។

លោកជំទាវ បាន ស្រីមុំ បានមានប្រសាសន៍បញ្ជាក់ថា ដោយសារ​ស្ថាន​ភាព​ព្រំដែន​កាន់​តែ​តឹង​តែង​ និងដោយមានការអំពាវនាវពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា ឱ្យពលករខ្មែរដែលកំពុងធ្វើការនៅប្រទេសថៃត្រឡប់មកមាតុភូមិវិញ មុនពេល​អាជ្ញាធរ​ថៃ​បណ្តេញ​ចេញ ឬធ្វើការប្រមាថណាមួយ ហើយរាជរដ្ឋាភិបាល​នឹង​រង់ចាំ​ទទួល​ទាំង​អស់​ឱ្យ​តែ​ជា​ជន​ជាតិ​ខ្មែរ ទោះបីជាមានឯក សារគ្រប់គ្រាន់ ឬមិនមានឯកសារគ្រប់គ្រាន់ក៏ដោយ ហើយជាក់​ស្តែង​នៅ​ច្រកទ្វារព្រំដែនអន្តរជាតិព្រំ ខេត្ត ប៉ៃលិន គឺមានពលករ​ខ្មែរ​បាន​ធ្វើ​ដំណើរ​ឆ្លង​ព្រំ​ដែន​ត្រឡប់​មកកម្ពុជាវិញជាបណ្តើរៗ ដោយរដ្ឋបាលខេត្ត បានសហការជាមួយ ក្រសួងការងារ និង​បណ្តុះបណ្តាល វិជ្ជាជីវៈ បានរៀបចំទីតាំងត្រៀមទទួលនៅក្បែរ ព្រំដែន ដើម្បីស​ម្រួល​ទាំង​ការ​ស្នាក់​នៅ​បណ្ដោះអាសន្ន ការហូបចុក ការថែទាំព្យាបាលសុខភាព និងជូនដំ ណើរវិល​ត្រឡប់​ទៅ​ស្រុក​កំណើតវិញដោយឥតគិតថ្លៃ ព្រមទាំងជួយរកការងារជូនពលករផងដែរ៕