សម្តេចតេជោ៖ គណបក្សប្រជាជនកម្ពុជាគាំទ្រពេញទំហឹង ចំពោះរាជរដ្ឋាភិបាលយកសំណុំរឿងព្រំដែនជាមួយថៃ ទៅកាន់តុលាការឡាអេ

ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគនបក្សប្រជាជនកម្ពុជា បានថ្លែងថា ​គណបក្សប្រជាជនកម្ពុជា គាំទ្រយ៉ាងពេញទំហឹង​ចំពោះចំណាត់ការ​របស់​រាជរដ្ឋាភិបាល ដែលបានយកសំណុំរឿង​ប្រាសាទតាមាន់តូច តាមាន់ធំ តាក្របី និងតំបន់មុំបី​ទៅកាន់តុលាការយុត្តិធម៌អន្តរជាតិ (ICJ) និងគាំទ្ររាជរដ្ឋាភិបាលដោះស្រាយបញ្ហាព្រំដែន​ដោយសន្តិវិធី។

ក្នុងឱកាប្រារព្ធពិធីអបអរសាទរ ខួបអនុស្សាវរីយ៍លើកទី៧៤ (២៨ មិថុនា ១៩៥១-២៨ មិថុនា ២០២៥) ថ្ងៃបង្កើតគណបក្សប្រជាជនកម្ពុជា នៅព្រឹកថ្ងៃទី២៨ ខែមិថុនា ឆ្នាំ២០២៥នេះ​ សម្តេចតេជោ ហ៊ុន សែន​ បាន​បញ្ជាក់ថា « គណបក្សប្រជាជន​កម្ពុជា ​គាំទ្រ​ពេញទំហឹង​នូវជំហរដ៏ម៉ឺងម៉ាត់​ច្បាស់លាស់ ​របស់រាជរដ្ឋាភិបាល ក្នុងការយកបញ្ហា​ ប្រាសាទតាមាន់ធំ​ ប្រាសាទតាមាន់តូច ប្រាសាទតាក្របី​ និងតំបន់ មុំបីទៅដោះស្រាយនៅ​តុលាការយុត្តិធម៌អន្តរជាតិ(ICJ) និងគាំទ្រជំហរ​របស់​រាជរដ្ឋាភិបាលក្នុងការដោះស្រាយបញ្ហាព្រំដែន​នៅចំណុចផ្សេងទៀត​ក្រៅពីចំណុចទាំងបួន ដោយ​សន្តិវិធីស្របតាមអនុស្សរណៈ នៃការយោគយល់រវាងប្រទេសទាំងពីរ(កម្ពុជា-ថៃ)នៅឆ្នាំ២០០០»។

ជាមួយគ្នានោះដែរសម្តេចតេជោ ហ៊ុន សែន ក៏បានរំលឹកផងដែរចំពោះព្រឹត្តិការណ៍​ដែល​បាន​កើតឡើង​នៅថ្ងៃទី២៨​ ខែឧសភា កន្លងទៅដែលទាហានឈ្លានពានថៃ​លួច​ឆ្មក់បាញ់​ទាហានកម្ពុជា​កំពុងដេក បណ្តាលឲ្យបាត់បង់ជីវិត​យ៉ាងផងដែរ ​ដោយ​សម្តេចតេជោ បានថ្លែង​ថា«យើងត្រូវការ​បំផុត នូវ សន្តិភាព មិត្តភាព កិច្ចសហប្រតិបត្តិការ ​និងអភិវឌ្ឍន៍​ យើងគ្មាននយោបាយ និង​ជំហរ​អមិត្តជាមួយ​ប្រជាជាតិ​ណាមួយឡើយ។ ក្នុងចំណុចនេះ​ខ្ញុំចង់​គូសបញ្ជាក់ថា សកម្មភាព​វាយប្រហារខុសច្បាប់ដោយកង​ទ័ពថៃ​មកលើកងទ័ពកម្ពុជា ​កាលពីថ្ងៃទី២៨ ខែឧសភាកន្លងទៅ​នៅតំបន់មុំបីទឹកដីកម្ពុជា ​គឺជាការរំលោភ បំពានយ៉ាងធ្ងន់ធ្ងរ​មកលើ​អធិបតេយ្យ និងបូរណភាព​ទឹកដី​របស់កម្ពុជា» សម្តេចតេជោ ​បានបញ្ជាក់ទៀតថា ព្រឹត្តិការណ៍នេះ​(ទាហានថៃ​បាញ់ទាហានខ្មែរនៅមុំបី) បាន​ឆ្លុះបញ្ចាំង​អំពី​ភាពច្រំដែល​ នៃ​ប្រវត្តិសាស្រ្ត ទោះបីកម្ពុជា​មានសុឆន្ទៈក្នុងការដោះស្រាយបញ្ហាយ៉ាងណាក្តី៕ អត្ថបទ បាន ចក់