ពលរដ្ឋ២០១គ្រួសារ នៅស្រុកពញាឮ សប្បាយចិត្ត បានចូលសមាគមអ្នកផលិតចម្លាក់ប្រាក់ស្ពាន់ ស្រួលរកទីផ្សារជាងមុន

ប្រជាពលរដ្ឋ២០១គ្រួសារ ចំនួនបីឃុំ មានឃុំកោះចិន ឃុំកំពង់លួង និងឃុំវិហារលួង នៃស្រុកពញាឮ ខេត្តកណ្តាល សប្បាយចិត្តរីករាយ បានចូលជាសមាគមអ្នកផលិតចម្លាក់ប្រាក់ស្ពាន់ខេត្តកណ្តាល ផលិត និងកែច្នែបានហើយ មានតម្លៃខ្ពស់ ងាយស្រួលរកទីផ្សារ ។

ពួកគាត់បានលើកឡើងបែបនេះ នៅក្នុងពិធីសម្ពោធទីស្នាក់ការរបស់សមាគមអ្នកផលិតចម្លាក់ប្រាក់ ស្ពាន់ខេត្តកណ្តាល នៅថ្ងៃទី២៧ ខែមិថុនា ឆ្នាំ២០២៥ ​ពួកគាត់ និយាយថា ការប្រកបមុខ​របរ​ចម្លាក់ប្រាក់ ស្ពាន់នេះ ម្នាក់ៗជិត៣០ឆ្នាំ ហើយ ហើយការផលិត និងកែច្នៃជាលក្ខណៈគ្រួសារ និងរកទីផ្សារខ្លួនឯង ។ពួកគាត់ បានបន្តថា ចាប់តាំពីបានបង្កើត សមាគមអ្នកផលិតចម្លាក់ប្រាក់ ស្ពាន់នេះមក ពួកគាត់បានចូលជាសមាជិក ធ្វើឧ្យពួកគាត់ខិតខំផលិត និងកែច្នៃបន្ថែមទៀត ហើយពួកគាត់ក៏បានស្នើឱ្យប្រជាពលរដ្ឋ និងភ្ញៀវទេសចរណ៍​ជួយគាំទ្រ​ការផលិតចម្លាក់ប្រាក់ ស្ពាន់នេះផងដែរ ។

ចំណែកឯកឧត្តម កឹម សុខុន រដ្ឋលេខាធិការក្រសួងពាណិជ្ជកម្ម បញ្ជាកថា ក្រសួងពាណិជ្ជកម្ម បាន សហការជាមួយក្រសួងពាណិជ្ជកម្ម ខេត្តកណ្តាល រៀបចំឯកសារចុះបញ្ជីសមាគម​នៅ​ក្រសួងមហាផ្ទៃ និងចុះបញ្ជី ​ម៉ាកសមូហភាព​នៅក្រសួងពាណិជ្ជកម្ម បានរួចរាល់​ហើយ​នាពេលថ្មីៗកន្លងមកនេះ ​ហើយ​នាយកដ្ឋាន​កម្មសិទ្ធិបញ្ញា ​នៃក្រសួងពាណិជ្ជកម្ម ក៏បានរៀបចំ​ពិធីសម្ពោធដាក់ ឱ្យប្រើប្រាស់ជាផ្លូវការនូវម៉ាកសមូហភាព “ចម្លាក់ប្រាក់ស្ពាន់ខេត្តកណ្ដាល” នៅ​ទីរួមខេត្តសៀមរាប រួចហើយ។

ឯកឧត្តម សង្ឃឹមជឿជាក់ថា បងប្អូន​ប្រជាពលរដ្ឋខ្មែរយើង​ នឹងជួយ​គាំទ្រ​អស់គ្នា និង​ជួយ​ផ្សព្វផ្សាយ​និង​ការពារ​អភិរក្ស​ទាំងអស់គ្នា ដើម្បីកូនចៅជំនន់ថ្ងៃក្រោយ។

សូមបញ្ជាក់ថា បច្ចុប្បន្ននេះ​ដោយ​មានការ​ចូលរួម​សហការពីថ្នាក់ដឹកនាំ ​និងមន្ត្រី ​នៃមន្ទីរពាណិជ្ជកម្ម ខេត្ត និងអាជ្ញាធរមូលដ្ឋាន សមាគម បានចុះធ្វើបច្ចុប្បន្នភាពគ្រួសារ​ដែលប្រកបមុខរបរចម្លាក់ប្រាក់ ស្ពាន់ក្នុងឃុំកោះចិន ឃុំកំពង់លួង និងឃុំវិហារលួង នៃស្រុកពញាឮ ​ដែលមានសរុបចំនួន ២០១ គ្រួសារ ​ក្នុងនោះមានសមាជិកចំនួន ៤៤៧នាក់ (ស្រី ២២៦នាក់)​ ជាមួយគ្នានេះផងដែរ ។ គិតមកដល់​ពេលនេះ ប្រជាពលរដ្ឋដែលប្រកបមុខរបរចម្លាក់ប្រាក់ស្ពាន់ ​បាន​ដាក់ពាក្យស្នើសុំចូល ជា​សមាជិកសមាគម មានចំនួន ១១៨គ្រួសារ ៕ អត្ថបទ ៖ Dy Paoyi-So Pros