ស.ស.យ.ក ចុះMOUជាមួយ អ.វ.ត.ក បង្កើនកិច្ចសហការ​ផ្សព្វផ្សាយ​ចំណេះដឹ​ង​​ពី​របប​ប្រល័យ​ពូជសាសន៍ ប៉ុល ពត

សហភាពសហព័ន្ធយុវជនកម្ពុជា (ស.ស.យ.ក.) និងអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៅថ្ងៃទី០៩ខែកក្កដានេះ បានចុះអនុស្សារណៈនៃការយោគយល់គ្នា (MOU) ក្រោម​អធិបតីភាពរបស់ឯកឧត្តម សុះ មុះសិន អនុប្រធានសហភាពសហព័ន្ធយុវជនកម្ពុជា និង​ជា​តំណាងដ៏ខ្ពង់ខ្ពស់របស់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និង ឯកឧត្តម ក្រាញ់ តូនី រដ្ឋលេខាធិការទីស្តីការគណៈរដ្ឋមន្ត្រី និងជាប្រធានរដ្ឋបាលស្តីទី អ.វ.ត.ក.។ ពិធីនេះ រៀបចំធ្វើឡើងនៅមជ្ឈមណ្ឌលធនធាន អ.វ.ត.ក. រាជធានីភ្នំពេញ។

នៅ​ក្នុង​ពិធីឯកឧត្តម ក្រាញ់ តូនី បានផ្តល់បទសម្ភាសជាមួយBTVថា អ.វ.ត.ក. មានគោល​ដៅអប់រំ​ឲ្យ​បានទូលំទូលាយបន្ថែមទៀតទៅដល់យុវជន ក្រៅពីបណ្ណាសារ អ.វ.ត.ក. មានរថយន្ត​ចល័ត​ទៅ​តាម ២៥ខេត្តក្រុង ហើយដើម្បីសម្រេចបានគោលដៅមួយនេះ អ.វ.ត.ក. នឹង​សហការ​ជាមួយ ស.ស.យ.ក. ដែលបានចុះMOUក្នុងពេលនេះ។

ឯកឧត្តម សុះ មុះសិន អនុប្រធានសហភាពសហព័ន្ធយុវជនកម្ពុជា បានថ្លែងថា ក្រោយពី​បញ្ចប់​ការងារ​កាត់សេចក្តីសាលាក្តីខ្មែរក្រហមមក អ.វ.ត.ក. មានកេរដំណែល​មួយ​ដែល​ត្រូវ​ផ្ទេរ​ដល់​យុវជន​ជំនាន់ក្រោយជាទំពាំងស្នងឬស្សី អាចសិក្សាស្វែងយល់ពីអតីតកាលដ៏ខ្មៅងងឹត ដើម្បី​ឈាន​ដល់​ការអភិវឌ្ឍប្រសើរឡើង។ លើសពីនេះ ឯកឧត្តម សុះ មុះសិន បានថ្លែង​អំណរ​គុណ​ទៅ​ដល់​ អ.វ.ត.ក. ដែលបានអនុញ្ញាតឲ្យ ស.ស.យ.ក. ចូលរួមសហការជាមួយ ដើម្បី​សម្រេច​បាន​គោល​ដៅ​រួម និងសមស្របទៅតាមចក្ខុវិស័យរបស់ ស.ស.យ.ក. ដែលផ្តោត​សំខាន់​ទៅ​លើ​ការ​ប​ណ្តុះ​បណ្តាលទៅដល់យុវជន សិស្សានុសិស្ស ដែលនឹងក្លាយជាបញ្ញវន្ត ឲ្យបានសិក្សា​ស្វែង​យល់​ពី​ផ្លូវ​ច្បាប់ និងប្រវត្តិសាស្រ្តដែលបានកើតឡើង ដើម្បីកុំឲ្យក្លាយជាអ្នកវង្វេងប្រវត្តិសាស្រ្ត។

គួរបញ្ជាក់ដែរថា ការចុះ MOU រវាងសហភាពសហព័ន្ធយុវជនកម្ពុជា (ស.ស.យ.ក.) និង​អង្គ​ជំនុំ​ជម្រះ​វិសាមញ្ញក្នុងតុលាការកម្ពុជា (អ.វ.ត.ក.) ធ្វើឡើងក្នុងគោលបំណងចែករំលែកចំណេះដឹង បទ​ពិសោធច្បាប់ និងសច្ចធម៌​ប្រវត្តិសាស្រ្ត​នៃ​របប​កម្ពុជា​ប្រជាធិប​តេយ្យ​ពី​អង្គ​ជំនុំ​ជម្រះ​វិសាមញ្ញ​ក្នុង​តុលាការកម្ពុជា តាមរយៈកម្មវិធីរួមគ្នានៃកម្មវិធីបណ្តុះបណ្តាលនានា មានដូចជា សិក្ខាសាលា ការ​បង្កើតកម្មវិធីរួមគ្នា ការស្រាវជ្រាវ ផ្នែកច្បាប់ និងប្រវត្តិសាស្ត្រ ទស្សនកិច្ចសិក្សា កម្មវិធី​រថយន្ត​ចល័ត​ក្នុង​ការផ្សព្វផ្សាយឯកសារពាក់ព័ន្ធនឹងចំណេះដឹងច្បាប់ និងប្រវត្តិសាស្ត្រ៕ អត្ថបទ៖ទូច សោភ័ណ