ក្រសួងមហាផ្ទៃ និងស.ស.យ.ក រៀបចំកម្មវិធីបរិច្ចាកឈាម ដើម្បីគាំទ្រដល់សមរភូមិមុខ

ភ្នំពេញ៖ ក្រសួងមហាផ្ទៃ បានសហការជាមួយសហភាពសហព័ន្ធយុវជនកម្ពុជា (ស.ស.យ.ក) រៀបចំកម្មវិធីបរិច្ចាកឈាម ដើម្បីជូនដល់មជ្ឈមណ្ឌលផ្ដល់ឈាមកម្ពុជា ទុកសម្រាប់គាំទ្រដល់កងកម្លាំងការពារជាតិនៅសមរភូមិមុខ ។

កម្មវិធីផ្ដល់ឈាមនេះ គឺត្រូវបានឲ្យឈ្មោះថា តំណក់ឈាមការពារជាតិយើង ក្នុងបុព្វហេតុមនុស្សធម៌ និងទឹកចិត្តស្នេហាជាតិមាតុភូមិ រួមទាំងគាំទ្រដល់យុទ្ធជនកម្ពុជា ដែលកំពុងការពារបូរណភាពទឹកដី ដើម្បីត្រៀមនៅពេលបន្ទាន់ណាមួយ ហើយកម្មវិធីនេះ បានធ្វើឡើងនៅថ្ងៃទី៣ ខែសីហា ឆ្នាំ២០២៥ នាក្រសួងមហាផ្ទៃ ដែលមានការចូលរួមបរិច្ចាកពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ រួមទាំងថ្នាក់ដឹកនាំក្រសួងមហាផ្ទៃ កងកម្លាំងនគរបាល ព្រះសង្ឃ កីឡាករ និងពលរដ្ឋយ៉ាងច្រើនកុះករ ។

ក្នុងពេលទៅនិមន្ត និងទៅបរិច្ចាកឈាម ព្រះសង្ឃ និងកងកម្លាំងនគរបាល បានបង្ហាញនូវការដឹងគុណ ចំពោះវីរកងទ័ពដែលនៅសមរភូមិមុខ ឈរជើងដើម្បីការពារបូរណភាពទឹកដី ដោយនៅសមរភូមិក្រោយ បានរងចាំជានិច្ច ក្នុងការគាំទ្រ និងការលើកទឹកចិត្ត ។

ព្រះសង្ឃ និងកងកម្លាំងនគរបាល បានបន្តថា ការផ្ដល់ឈាមនេះ គឺជាចំណែកដ៏តិចតួច ក្នុងនាមជាអ្នកស្នេហាជាតិ ដើម្បីផ្ដល់ជូនបងប្អូនកងទ័ពនៅសមរភូមិមុខ ហើយសកម្មភាពនេះ គួរកើតឡើង ចំពោះប្រជាជាតិខ្មែរទាំងមូល ចូលរួមបរិច្ចាកឈាមទាំងអស់គ្នា ។

គួរបញ្ជាក់ថា កម្មវិធីផ្ដល់ឈាម ដើម្បីគាំទ្រដល់កងទ័ពការពារបូរណភាពទឹកដីនេះ គឺបានផ្ដួចផ្ដើមឡើងពីលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ហើយសកម្មភាពបរិច្ចាកឈាមនេះ កំពុងផុលផុសឡើងនៅទូទាំងប្រទេស ដែលសកម្មភាពនេះ គឺបានបង្ហាញថា ប្រជាពលរដ្ឋខ្មែរ ពិតជាមានសាមគ្គីភាពរឹងមាំ ក្នុងការពូតដៃគ្នាជាធ្លុងមួយ ដើម្បីការពារទឹកដីមិនឲ្យបាត់បង់ ៕ អត្ថបទ បាន សុខរិទ្ធិ