ព័ត៌មាន

ក្រុមអាជីវករសម្តែងការអរគុណរាជរដ្ឋាភិបាលដែលតែងតែអំពាវនាវពលរដ្ឋគាំទ្រផលិតផលក្នុងស្រុក

ក្រុមអាជីវករដែលជាអ្នកផលិតផលិតផលខ្មែរ បានសម្តែងការអរគុណប្រមុខរាជរដ្ឋាភិបាលកម្ពុជា ក៏ដូចជាមន្រ្តីគ្រប់ជាន់ថ្នាក់ ដែលតែងតែអំពាវនាវប្រជាពលរដ្ឋខ្មែរទាំងអស់ ចូលរួមគាំទ្រផលិតផលក្នុងស្រុកឱ្យកាន់តែច្រើនឡើងថែមទៀត ដើម្បីជួយលើកកម្ពស់ផលិតផលក្នុងស្រុកផង ក៏ដូចជាបង្កើតឱកាសការងារ និងជំរុញសេដ្ឋកិច្ចជាតិកាន់តែរីកចម្រើនទៅមុខបន្ថែមទៀតផងដែរ។

ក្រុមអាជីករមកពីខេត្តសៀមរាប ក្នុងឱកាសចូលរួមតាំងបង្ហាញលក់ផលិតផលនៅក្នុងពិព័រណ៍ផលិតផលខ្មែរ បាននិយាយប្រាប់ ព័ត័មាន ប៊ីធីវី ឱ្យដឹងថា ពិតជាមានសប្បាយរីករាយណាស់ នៅពេលដែលរាជរដ្ឋាភិបាលកម្ពុជាតែងតែគិតគូរ និងយកចិត្តទុកដាក់ជាប់ជានិច្ច ក្នុងការជំរុញនិងផ្សព្វផ្សាយអំពីផលិតផលក្នុងស្រុក ដែលរហូតមកដល់ពេលនេះ បានកត់សម្គាល់ឃើញថា សន្ទុះនៃការគាំទ្រពីសំណាក់អតិថិជន ក៏មានការកើនឡើងដូចគ្នា។ ពួកគាត់ សង្ឃឹមទៀតថា ប្រជាពលរដ្ឋខ្មែរទាំងអស់ នឹងបន្តជួយគាំទ្រផលិតផលក្នុងស្រុកឱ្យកាន់តែច្រើនថែមទៀត ដើម្បីជាកម្លាំងចិត្តដល់ផលិតករ និងជួយលើកស្ទួយកុំឲ្យប្រជាជនចំណាកស្រុកជាដើម។

ក្រុមអាជីវករ បានប្តេជ្ញាថា ដើម្បីជាការឆ្លើយតប និងអរគុណជូនចំពោះអ្នកគាំទ្រទាំងឡាយ ក៏ដូចជាការគិតគូរយ៉ាងខ្ពស់ពីសំណាក់រាជរដ្ឋាភិបាល លោកនឹងខិតខំព្យាយាមយ៉ាងណា ដើម្បីផលិតផលិតផលដែលមានគុណភាព ស្តង់ដារត្រឹមត្រូវ និងមានអនាម័យខ្ពស់ជូនអ្នកប្រើប្រាស់។

កំពុងដើរទស្សនា និងទិញទំនិញដែលជាផលិតផលក្នុងស្រុក ក្រុមប្រជាពលរដ្ឋដែលរស់នៅរាជធានីភ្នំពេញ បាននិយាយថា ជាការមើលឃើញជាក់ស្តែង ពិតជាមានអារម្មណ៍រំភើបចិត្ត នៅពេលដែលឃើញ និងដឹងថាខ្មែរអាចធ្វើបានស្ទើរគ្រប់វិស័យ ទោះបីថាកម្ពុជាដើរយឺត ប៉ុន្តែអាចធ្វើបានទាន់សម័យកាល ដូចជាខាងផ្នែកម្ហូបអាហារកែច្នៃ គ្រឿងទេស និងសម្ភារៈប្រើប្រាស់ជាដើម សុទ្ធសឹងមានគុណភាពមិនចាញ់របស់នាំចូលពីក្រៅស្រុកនោះឡើយ។ ពួកគាត់ បានឱ្យដឹងទៀតថា ពិតជាមានមោទនភាពដែលបានឃើញផលិតផលខ្មែរកាន់តែកើនឡើង អាចផលិតបានស្ទើរគ្រប់វិស័យ ថែមទាំងអាចផលិត និងនាំចេញទៅក្រៅប្រទេសថែមទៀតផង ដែលសបញ្ជាក់ពីគុណភាព ការយកចិត្តទុក ក៏ដូចជាស្តង់ដារអនាម័យជាដើម ដែលធ្វើឲ្យអ្នកប្រើប្រាស់មានទំនុកចិត្តក្នុងការទិញយកទៅប្រើប្រាស់ និងទទួលទាន។

សូមបញ្ជាក់ថា ដើម្បីជំរុញការគាំទ្រផលិតខ្មែរ បង្ហាញទៅកាន់ប្រជាពលរដ្ឋខ្មែរឱ្យបានដឹងពីអ្វីដែលកម្ពុជាបាននឹងកំពុងផលិតបាន សហភាពសហព័ន្ធយុវជនកម្ពុជា (ស.ស.យ.ក.) សហការជាមួយអន្តរក្រសួង បានរៀបចំពិព័រណ៍ផលិតផលខ្មែរ រយៈពេល៣ថ្ងៃ ចាប់ពីថ្ងៃទី២៦ ដល់២៨ ខែកញ្ញា ឆ្នាំ២០២៥ នៅសាលពិព័រណ៍កោះពេជ្រ ដោយបានទាក់ទាញមនុស្សយ៉ាងច្រើនកុះករចូលរួមទស្សនា ក៏ដូចជាគាំទ្រផលិតផលក្នុងស្រុកផងដែរ៕ អត្ថបទ៖ ឈិត បូរ៉ាវី