ក្រុមប្រឹក្សារាជធានី-ខេត្ត កំពុងពង្រឹងច្បាប់ទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ

ភ្នំពេញ៖ ក្រុមប្រឹក្សារាជធានីភ្នំពេញ និងតាមបណ្ដាខេត្តនានា កំពុងពង្រឹង​ការអនុវ​ត្ត​ច្បាប់​ទប់​ស្កាត់​អំពើ​ហិង្សា​នៅក្នុងគ្រួសារ និងកិច្ចការពារជនរងគ្រោះ តាមរយៈការលើកកម្ពស់ការយល់ដឹង ដល់​សមាជិក​ក្រុម​ប្រឹក្សារាជធានី-ខេត្តដែលជាស្ត្រី លើការងារអភិបាលកិច្ចមូលដ្ឋាន ។

នៅ​ក្នុងពិធីបើកវគ្គបណ្ដុះបណ្ដាលស្តីពី “ច្បាប់ទប់ស្កាត់អំពើហិង្សាក្នុងគ្រួសារ និង​កិច្ច​ការពារ​ជន​រង​គ្រោះ”​ ថ្ងៃទី១ ខែតុលា ឆ្នាំ២០២៥ ឯកឧត្តម ម៉ប់ សារិន ប្រធានសមាគមជាតិក្រុមប្រឹក្សារាជធានី-ខេត្ត មានប្រសាសន៍ថា ផែនការយុទ្ធសាស្រ្ត នារីរតនៈទី៦ ឆ្នាំ២០២៤-២០២៨ មាន​យុទ្ធសាស្រ្ត​ស្នូល​៦ ​ក្នុងនោះមានយុទ្ធសាស្រ្តពីរ ដែលសមាគមជាតិក្រុមប្រឹក្សារាជធានី-ខេត្ត ផ្តោត​ការ​យកចិត្ត​ទុក​ដាក់​គឺ​ យុទ្ធសាស្រ្តទី៤ កិច្ចការពារផ្លូវច្បាប់សម្រាប់ស្រ្តី និងកុមារ និង យុទ្ធសាស្រ្តទី៥ ស្រ្តីក្នុងភាព​ជា​អ្នក​ដឹក​នាំ និងអភិបាលកិច្ច ។

ឯកឧត្តមបន្តថា វគ្គបណ្តុះបណ្តាលនេះ រៀបចំឡើងមានការគាំទ្រ ពីសមាគម​អន្តរជាតិ​អភិបា​ល​ក្រុង​ប្រើ​ប្រាស់​ភាសាបា​រាំង (AIMF) ក្នុងគោលបំណងលើកកម្ពស់ការយល់ដឹងរបស់ សមាជិកក្រុម​ប្រឹក្សា​រាជ​ធានី​-ខេត្ត ជាស្រ្តីនៅទូទាំងប្រទេស លើការងារអភិបាលកិច្ចមូលដ្ឋាន ដោយផ្តោតសំខាន់​លើ​ច្បាប់​ស្តីពី​ ការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ដែលត្រូវ​បាន​ប្រកាស​ឱ្យ​ប្រើដោយ​ព្រះ​រាជ​ក្រមលេខ១០០៥/០៣១ ចុះថ្ងៃទី២៥ ខែតុលា ឆ្នាំ២០០៥ និងការចែករំលែក​បទ​ពិសោធន៍​អំពី​ការ​អនុវត្តការងារលើសេវាសង្គម ។

ឯកឧត្តមប្រធានសមាគម បានបន្ថែមថា សម្រាប់ប្រធានបទនេះ គឺអនុលោម​តាម​យុទ្ធ​សាស្រ្ត​បញ្ចកោណ​ ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧ ដើម្បីកំណើន ការងារ សមធម៌ ប្រសិទ្ធ​ភាព និងចីរភាព កសាងមូលដ្ឋានគ្រឹះ ឆ្ពោះទៅសម្រេចបានចក្ខុវិស័យកម្ពុជាឆ្នាំ២០៥០ ដែល​ក្នុង​នោះ រាជរដ្ឋាភិបាល បានបន្តកំណត់ការលើកកម្ពស់សមភាពយេនឌ័រ និងការបង្កើន​ភាពអង់​អាច​របស់​ស្រ្តី នៅគ្រប់វិស័យ ជាអាទិភាព តាមរយៈ ការពង្រឹងភាពជាពលរដ្ឋក្នុងសង្គម ដែលមា​ន​អារ្យធម៌​ខ្ពស់​ ប្រកបដោយសីលធម៌ សមធម៌ និងបរិយាបន្ន ដែលក្នុងនោះស្រ្តីគឺជាស្នូល ។

ឯកឧត្តម ម៉ប់ សារិន បានគូសបញ្ជាក់ថា ជាក់លាក់ជាងនេះទៅទៀត សមាគមជាតិ​ក្រុម​ប្រឹក្សា​រាជ​ធានី​-ខេត្ត តែងតែបានសហការជាមួយក្រសួងកិច្ចការនារី ក្នុងការពងឹ្រង​សមត្ថភាព​សមាជិក​ក្រុម​ប្រឹក្សា​រាជ​ធានី​-ខេត្ត​ជាស្រ្តី ដោយផ្អែកទៅលើផែនការយុទ្ធសាស្រ្តនារីរតនៈ គឺផែនការយទ្ធសាស្រ្ត ដើម្បីលើក​កម្ពស់​សមភាពយេនឌ័រ និងការបង្កើនភាពអង់អាចដល់ស្រ្តី និងក្មេងស្រី។

គួរបញ្ជាក់ថា តាមរយៈគោលនយោបាយវិមជ្ឈការ និងវិសហមជ្ឈការរបស់រាជរដ្ឋាភិបាលកម្ពុជា សមាគម​ជាតិ​ក្រុមប្រឹក្សារាជធានី-ខេត្ត ត្រូវបានបង្កើតឡើងកាលពីឆ្នាំ២០១៣ ។ ១២ឆ្នាំ​ជាង​មក​ហើយ​ ជា “នីតិបុគ្គល” ធ្វើជាតំណាងឱ្យក្រុមប្រឹក្សារាជធានី-ខេត្ត ក្នុងគោលបំណងចំនួនបី ដូច​កំណត់​ក្នុង​លក្ខន្តិកៈ ទី១. លើកកម្ពស់ឋានៈ និងអភិវឌ្ឍសមត្ថភាពដល់ក្រុមប្រឹក្សារាជធានី-ខេត្ត, ទី២. ការពារ​ផល​ប្រយោជន៍ និងគុណប្រយោជន៍ស្របច្បាប់ របស់សមាជិក និង ទី៣. កសាងភាព​ជាដៃ​គូ​ជា​មួយ​ក្រសួងស្ថាប័នពាក់ព័ន្ធ ដើម្បីអភិវឌ្ឍមូលដ្ឋាន ពង្រឹងនីតិរដ្ឋ និងជំរុញ​លទ្ធិ​ប្រជាធិប​តេយ្យ​នៅ​កម្ពុជា​៕ អត្ថបទ បាន សុខរិទ្ធិ