កម្មវិធីសប្ដាហ៍ថាមពលស្អាតឆ្នាំ២០២៥ ប្រព្រឹត្តទៅក្រោមប្រធានបទ «ជំរុញសេដ្ឋកិច្ច​ថាមពល​ស្អាត​»

តំណាងរដ្ឋាភិបាលកម្ពុជា អូស្ត្រាលី និងកម្មវិធីអភិវឌ្ឍន៍សហប្រជាជាតិ បាន​ចូល​រួម​ជា​មួយ​អង្គការ​អេននីជីឡេបអាស៊ី ដើម្បីបើក «សប្ដាហ៍ថាមពលស្អាតឆ្នាំ២០២៥» ប្រព្រឹត្ត​ទៅ​ក្រោម​ប្រធាន​បទ «ជំរុញសេដ្ឋកិច្ចថាមពលស្អាត» ដែលចាប់ផ្ដើមពីថ្ងៃទី២ ដល់ថ្ងៃទី៩ ខែតុលា ឆ្នាំ​២០២៥ ផ្តោតលើតួនាទីសំខាន់របស់ថាមពលស្អាត ក្នុងកា​រ​ពង្រឹង​អនាគត​សេដ្ឋកិច្ច​រប​ស់​ប្រទេស​។

កម្មវិធីសប្ដាហ៍ថាមពលស្អាតឆ្នាំ២០២៥ ត្រូវបានអង្គប្រជុំ លើកឡើងថា នឹងជម្រុញវឌ្ឍនភាពនេះ ដោយ​អនុញ្ញាតឱ្យភាគីពាក់ព័ន្ធចែករំលែកគំនិតថ្មីៗ ពិភាក្សាអំពីដំណោះស្រាយគោលនយោបាយ និង​ការ​បង្កើតកិច្ចសហប្រតិបត្តិការបន្ថែម។ កម្មវិធីមួយសប្ដាហ៍នេះ នឹងផ្តោ​ត​លើ​បញ្ហា​សំខាន់​ៗ​នៅ​ក្នុង​អន្តរកាលថាមពលស្អាតរបស់កម្ពុជា ដូចជាការបង្ហាញពីសក្តានុពលជំនាញថាមពលស្អាត និង​ការពង្រឹងសេដ្ឋកិច្ចរបស់ស្ត្រីតាមរយៈ អន្តរកាលថាមពលប្រកបដោយយុត្តិធម៍។

មានប្រសាសន៍បើកកម្មវិធីនេះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេក​វិទ្យា និងនវានុវត្តន៍ បានលើកឡើងថា ថាមពលស្អាត​មាន​សារៈ​សំខាន់​សម្រាប់​កំណើន​ឧស្សាហកម្ម​របស់កម្ពុជា។ អន្តរកាលថាមពលស្អាតនឹងជម្រុញកម្ពុជាធ្វើការបានកាន់តែប្រសើរក្នុងខ្សែសង្វាក់ផ្គត់ផ្គង់ក្នុងថ្នាក់តំបន់ និងពិភពលោក។ ឯកឧត្តមបានបន្តថា កម្មវិធីនេះ នឹងបង្កើតប្រភពថ្មីនៃកំណើនសេដ្ឋកិច្ច និង​ការងារប្រកបដោយគុណភាព។

ឯកឧត្តម ដេរិក យីប ឯកអគ្គរដ្ឋទូតអូស្ត្រាលីប្រចាំកម្ពុជា មានប្រសាសន៍ថា ជាមួយ​នឹង​គោល​នយោបាយ​ដែល​មានប្រសិទ្ធិភាព កម្ពុជាអាចពង្រឹងសេថ្ខកិច្ចរបស់ខ្លួន តាមរយៈការធ្វើឲ្យ​ប្រសើរ​ឡើង​នូវ​ស្ថេរភាពថាមពល កាត់បន្ថយតម្លៃ និងទាក់ទាញការ​វិនិយោគ​ប្រកប​ដោយ​ទំនួល​ខុស​ត្រូវ​។ កិច្ចខិតខំទាំងនេះ នឹងមិនត្រឹមតែជួយទប់ទល់នឹងការប្រែប្រួលអាកាសធាតុប៉ុណ្ណោះទេ តែ​នឹង​បើក​ឱកាស​ក្នុងការចូលទៅកាន់ទីផ្សារអន្តរជាតិ ដែលគិតគូរពីការប្រែប្រួលអាកាសធាតុ។

លោក អេនរីកូ ហ្គាវេលីយ៉ា តំណាងកម្មវិធីអភិវឌ្ឍន៍សហប្រជាជាតិប្រចាំនៅកម្ពុជា បានលើ​ក​ឡើង​ថា ​នៅគ្រប់ប្រទេសដែលកម្មវិធីអភិវឌ្ឍន៍សហប្រជាជាតិធ្វើការ វិស័យថាមពល គឺស្ថិត​នៅ​ជួរ​មុខ​នៃ​របៀបវារៈឆ្នាំ២០៣០។ អន្តរកាលទៅរកអព្យាក្រិតកាបូន គឺជាកត្តាលិក​រ​ដែល​មិន​អាច​ខ្វះ​បាន​នៃ​ការអភិវឌ្ឍន៍ប្រកបដោយនិរន្តរភាពជាមួយនឹងគុណលក្ខណៈដូចជា ភាពធន់នៃសេដ្ឋកិច្ច និង​សង្គម លទ្ធភាពចំណាយ និងសន្តិសុខមនុស្សជាតិ។

នៅក្នុងសេចក្តីប្រកាសព័ត៍មានរបស់កម្មវិធីនេះ បានបញ្ជាក់ឱ្យដឹងថា ក្រោមការ​ដឹក​នាំ​របស់​សម្តេច​ធិបតី ហ៊ុន ម៉ាណែត និងរាជរដ្ឋាភិបាលអាណត្តិទី៧ ប្រទេសកម្ពុជា​បានកំ​ណត់​គោល​ដៅ​យ៉ាង​រឹង​មាំគឺ បង្កើនការប្រើប្រាស់ថាមពលកកើតឡើងវិញឲ្យបាន ៧០% កាត់បន្ថយកា​រ​ប្រើប្រាស់​ថាមពលប្រមាណ ១៩% តាមរយៈប្រសិទ្ធភាពថាមពល និងរនិងបង្កើនចំនួន​យាន​យន្ត​អគ្គិសនី​ឲ្យ​បាន ៧៧ម៉ឺនគ្រឿង លើដងផ្លូវនៅត្រឹមឆ្នាំ២០៣០៕ អត្ថបទ៖ ឈិត បូរ៉ាវី