ពលរដ្ឋរងផលប៉ះពាល់ដោយទឹកជំនន់ទន្លេមេគង្គសរុប ៣២៣គ្រួសារ ក្នុងស្រុកកៀនស្វាយ ទទួលអំណោយមនុស្សធម៌ពីសាខាកាកបាទក្រហមកម្ពុជាខេត្តកណ្ដាល

ប្រជាពលរដ្ឋរងផលប៉ះពាល់ដោយទឹកជំនន់ទន្លេមេគង្គ សរុបចំនួន ៣២៣គ្រួសារ សមាជិក ១,២៦៣នាក់ ,ស្រី ៦៤០នាក់ ក្នុងនេះចាស់ជរា ៣៦នាក់ និងកុមារអាយុក្រោម ១៥ឆ្នាំមានចំនួន ៣១៦​នាក់ នៅភូមិកោះប្រាក់ និងភូមិកោះប្រាក់ចាស់ ឃុំភូមិធំ ស្រុកកៀនស្វាយ ខេត្តកណ្តាល បាន​ទទួលអំណោយមនុស្សធម៌ពីសាខាកាកបាទក្រហមកម្ពុជាខេត្ត នារសៀលថ្ងៃទី០២ ខែតុលា ឆ្នាំ២០២៥។

ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល និងជាប្រធាន​គណៈ​កម្មាធិការ​សាខា​កាក​បាទ​ក្រហម​កម្ពុជាខេត្ត មានមតិសំណេះសំណាល ដោយនាំមកនូវប្រសាសន៍​ផ្ដាំ​ផ្ញើសួ​រសុ​ខ​ទុក្ខ​ពីសំណាក់សម្ដេចកិតិ្តព្រឹទ្ធ​បណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូន​ចំពោះ​គ្រួសាររងគ្រោះទាំងអស់ ដោយក្ដីនឹករលឹក។ ឯកឧត្តមបានបញ្ជាក់ថា កាកបាទ​ក្រហម​កម្ពុជា​ដែល​មាន​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន ជានិច្ចកាលសម្ដេច​តែងគិត​គូរ​ជានិច្ចអំពីសុខទុក្ខរបស់ប្រជាពលរដ្ឋរងគ្រោះដោយគ្រោះមហន្តរាយផ្សេងៗ និង​ជន​ងាយ​រង​គ្រោះបំផុតពិសេសជនចាស់ជរា កុមារ និងជនពិការជាដើម នៅគ្រប់ទីកន្លែង និង​គ្រប់​ពេល​វេលា។​ ជាមួយគ្នានេះ សម្តេចតែងបានណែនាំដល់មន្រ្តីនៅថ្នាក់មូលដ្ឋានទាំងអស់ ត្រូវ​បន្ត​យក​ចិត្ត​ទុកដាក់ខ្ពស់ដោយចុះពិនិត្យផ្ទាល់អំពីជីវភាព និងការរស់​នៅ​របស់​បងប្អូន​ប្រជា​ពលរដ្ឋ​ទូទៅ​នៅគ្រ​ប់មូលដ្ឋាន ដោយគ្មានការរើសអើង ប្រកាន់ពូជសាសន៍ សាសនា ប្រពៃណី ពណ៌​សម្បុរ​ ឬនិន្នាការនយោបាយអ្វីឡើយ។

នៅក្នុងឱកាសនោះដែរ ឯកឧត្តមបានផ្តាំផ្ញើដល់ប្រជាពលរដ្ឋរងគ្រោះ មេត្តាប្រុង​ប្រយ័ត្ន​ថែ​រក្សា​ការ​ពារ​ចំពោះ​កុមារតូចៗដែលពុំទាន់ចេះហែលទឹក គឺចៀសវាងខ្លាចជួប​នូវ​គ្រោះ​ល​ង់​​ទឹក​ស្លាប់​ដោ​យ​យ​ថា​ហេតុ។ ម៉្យាងទៀតបងប្អូនត្រូវអនុវត្តនូវអនាម័យ៣ប្រការគឺៈ (ការហូបស្អាត ការផឹកស្អាត និង​ការរស់នៅស្អាត) ប្រសិនបើបងប្អូនបានអនុវត្តយ៉ាងខ្ជាប់ខ្ជួន នោះ​បញ្ហា​សុខ​ភាព​រប​ស់​ក្រុម​គ្រួសារ ​ប្រាកដនឹងមានសុភមង្គលជាក់ជាពុំខាន។

ប្រតិភូ​សាខាបានឧបត្ថម្ភអំណោយជូនជនរងគ្រោះក្នុង១គ្រួសារទទួលបាន៖ អង្ករ ២៥ គីឡូក្រាម មី ១កេស ទឹកស៊ីអ៊ីវ ១យួរ ទឹកត្រី ១យួរ និងថវិកាចំនួន ៥ម៉ឺនរៀល។ ជាមួយគ្នានេះផងដែរ អនុសាខា កក្រក ស្រុកកៀនស្វាយ បានផ្តល់ជូនបន្ថែមក្នុង ១គ្រួសារ អង្ករ ១០គីឡូក្រាម និង​ថវិកា ២ម៉ឺនរៀល។

សូមបញ្ជាក់ជូនថា បន្ទាប់ពីប្រតិភូសាខា បានចុះ​ពិនិត្យ​ផ្ទាល់​ដល់​លំនៅ​ឋាន​របស់​បង​ប្អូន​រង​គ្រោះ​រួច​មក ​និងមុនពិធីសំណេះសំណាល ប្រតិភូសាខាក៏បានចូលក្រាបថ្វាយបង្គំព្រះចៅអធិការវត្ត និ​ង​ព្រះ​សង្ឃ​នៅក្នុងវត្តកោះប្រាក់ទាំងមូល ដែលកំពុងគង់ស្នាក់នៅសិក្សារៀនសូត្រក្នុងទីអារាមនេះ ប្រមាណ​ជាង ២០០អង្គ ព្រមទាំងបានប្រគេននូវទេយ្យវត្ថុរួមមាន អង្ករ ១០តោន ,មី ១០០កេស ,ទឹកត្រី ២០យួរ ,ទឹកស៊ីអ៊ីវ ២០យួរ និងបច្ច័យ ចំនួន ១០លានរៀលផងដែរ៕