រដ្ឋបាល ស្រុកជលគិរី បើកសិក្ខាសាលាសមាហរណកម្មកម្មវិធីវិនិយោគ៣ឆ្នាំរំកិល (២០២៦-២០២៨)

កំពង់ឆ្នាំង ៖ សិក្ខាសាលាសមាហរណកម្ម កម្មវិធីវិនិយោគ៣ឆ្នាំរំកិល (២០២៦-២០២៨)នៅរដ្ឋបាលស្រុកជលគិរី បានធ្វើឡើងនៅថ្ងៃទី០៩ ខែតុលា ឆ្នាំ២០២៥ ដោយមានការចូលរួមពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងលោកជំទាវ កែ ចន្ទមុនី តំណាងរាស្រ្តមណ្ឌលកំពង់ឆ្នាំង ព្រមទាំងអាជ្ញាធរស្រុក ថ្នាក់ដឹកនាំមន្រ្តីរាជការមន្ទីរអង្គភាពពាក់ព័ន្ធ និងអង្គការ សមាគម ដៃគូអភិវឌ្ឍន៍នានាផងដែរា ។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានថ្លែងថា: សិក្ខាសាលាដែលបានរៀបចំឡើងនាពេលនេះពិតជាមានសារៈសំខាន់បំផុតសម្រាប់រដ្ឋបាលស្រុកជលគិរី ដែលនឹងអាចចូលរួមជួយ តម្រង់ទិសរាល់សកម្មភាពរបស់រដ្ឋបាលស្រុក ឃុំ មានដំណើរការស្របទៅតាមគោលនយោបាយអភិវឌ្ឍន៍របស់ជាតិ ម្យ៉ាងទៀតសិក្ខាសាលានេះ អាចជួយឱ្យរដ្ឋបាលស្រុកបានរៀនសូត្របន្ថែមពីគ្នាទៅវិញទៅមក ក្នុងការរៀបចំផែនការវិនិយោគទៅឆ្នាំខាងមុខបន្តទៀត។ ហើយតាមរយៈនៃអង្គសិក្ខាសាលានាពេលនេះ ដើម្បីកៀរគនូវរាល់រធនធានពីប្រភពនានា សម្រាប់គាំទ្រគម្រោងវិនិយោគទាំងឡាយដែលបានស្នើរឡើងដោយរដ្ឋបាលនៅស្រុកជលគិរី និងបណ្តាឃុំទាំង៥ ក្នុងគោលដៅសម្របសម្រួលធ្វើអោយមានសង្គតិភាពរវាងគម្រោងនានានៃកម្មវិធីវិនិយោគរបស់ក្រុងជាមួយ គម្រោងវិនិយោគរបស់សង្កាត់និងភាគីពាក់ព័ន្ធនានាផងដែរ។

ឯកឧត្តមបានស្នើដល់អង្គសិក្ខាសាលានាពេលនេះចូលរួមពិភាក្សាដោយយកចិត្តទុកដាក់បំផុត ដើម្បីផ្តល់នូវគំនិត និង បទពិសោធន៍ក្នុងការត្រៀមរៀបចំផែនការអភិវឌ្ឍន៍អោយបានចំគោលដៅនិងតម្រូវការរបស់ពលរដ្ឋ ស្របតាមកម្មវិធីនយោបាយរបស់រាជរដ្ឋាភិបាលនីតិកាលទី៧ នៃយុទ្ធសាស្រ្តបញ្ចកោណដំណាក់កាលទី១ សំដៅធ្វើយ៉ាងឱ្យស្រុកជលគិរី ក្លាយជាស្រុកគោលដៅនៃការអភិវឌ្ឍន៍និងជាស្រុកដែលមានសក្តានុពលលើវិស័យទេសចរណ៍ កសិកម្ម និង ឧស្សាហកម្ម៕ កាំង ហុងវាស្នា