រដ្ឋសភាកម្ពុជា ចូលរួមកិច្ចប្រជុំគណៈកម្មាធិការអចិន្ត្រៃយ៍ស្ដីពី សន្តិភាព និងសន្តិសុខអន្តរជាតិ នៅទីក្រុងហ្សឺណែវ

ឯកឧត្តម ទី សុគន្ធ លេខាធិការ គណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា ព្រះរាជាណាចក្រកម្ពុជា នាថ្ងៃទី២០ ខែតុលា ឆ្នាំ២០២៥ បាន អញ្ជើញចូលរួម កិច្ចប្រជុំគណៈកម្មាធិការអចិន្ត្រៃយ៍ ស្ដីពី សន្តិភាព និងសន្តិសុខអន្តរជាតិ ដែលជាកិច្ចប្រជុំស្របជាមួយនឹង មហាសន្និបាតសហភាពអន្តរសភាលើកទី១៥១ (151st IPU Assembly) នាទីក្រុងហ្សឺណែវ ប្រទេសស្វីស។ នេះបើតាមការផ្ដល់ព័ត៌មានពី រដ្ឋសភា នៅរសៀល ថ្ងៃទី២១ ខែតុលា ឆ្នាំ២០២៥ នេះ។

កិច្ចប្រជុំនេះ ការត្រួតពិនិត្យដោយសភាលើការចំណាយលើវិស័យការពារជាតិ ការការពារការគេចពន្ធ សាជីវកម្ម និងការការពារកុមារពីការស្មុំកូនខុសច្បាប់។ ឯកឧត្តម ក៏បានចូលរួមថ្លែងសុន្ទរកថា លើប្រធានបទទាក់ទងនឹង “គោលនយោបាយគ្រប់គ្រង និងការមិនរីកសាយភាយនៃអាវុធ ការទប់ស្កាត់ការប្រកួតប្រជែងប្រដាប់អាវុធនាពេលអនាគត”។

បន្ទាប់មកថ្ងៃដដែល ឯកឧត្តម ទី សុគន្ធ បានអញ្ជើញចូលរួម កិច្ចប្រជុំ វេទិកាសមាជិកសភាវ័យក្មេងនៃ មហាសន្និបាត សហភាពអន្តរសភាលើកទី១៥១ (151st IPU Assembly) នាទីក្រុងហ្សឺណែវ ប្រទេសស្វីស។ វេទិកានេះធ្វើការពិភាក្សាលើមូលបទ នៃមហាសន្និបាត IPU លើក ទី ១៥១« ប្រកាន់ខ្ជាប់ នូវបទដ្ឋាន មនុស្សធម៌ និងគាំទ្រសកម្មភាពមនុស្សធម៌ក្នុងគ្រាមានវិបត្តិ» និងការពិភាក្សាលើ ការការពារកុមារ ពីការស្មុំកូនខុសច្បាប់។ ឯកឧត្តម បានចូលរួមថ្លែងសុន្ទរកថា លើប្រធានបទ “ការទូតសភា៖ ការកសាងស្ពានដើម្បីសន្តិភាព និងការយល់ដឹង”៕