ក្រសួងការងារ និងភាគីពាក់ព័ន្ធនៅថ្នាក់ក្រោមជាតិ បើកសិក្ខាសាលាពិគ្រោះយោបល់លើ “សេចក្តីព្រាងគោលនយោបាយជាតិស្តីពីមុខរបរ និងការងារ ឆ្នាំ២០២៦-២០៣៥”

(សៀមរាប)៖ ឯកឧត្តម គួច សុមាន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានចូលរួមជាអធិបតីក្នុងសិក្ខាសាលាពិគ្រោះយោបល់ថ្នាក់ក្រោមជាតិលើ “សេចក្តីព្រាងគោលនយោបាយជាតិស្តីពីមុខរបរ និងការងារ ឆ្នាំ២០២៦-២០៣៥” នាព្រឹកថ្ងៃទី២១ ខែតុលា ឆ្នាំ២០២៥ ដែលមានអ្នកចូលរួម ១១២នាក់ នៅសណ្ឋាគារសោមាទេវី អង្គរ ខេត្តសៀមរាប។

សិក្ខាសាលានេះ គឺជាព្រឹត្តិការណ៍ដ៏មានសារៈសំខាន់ ដែលបង្ហាញពីយន្តការចូលរួមពីគ្រប់ភាគីពាក់ព័ន្ធមកពី តំណាងអាជ្ញាធរមូលដ្ឋាន រដ្ឋបាលថ្នាក់ក្រោមជាតិ មន្ទីរការងារ និងបណ្តុះបណ្តាលវិជ្ជាជីវៈ មន្ទីរជំនាញ សង្គមស៊ីវិល វិស័យឯកជន និងអ្នកជំនាញការមកពីអង្គការអន្តរជាតិខាងការងារ (ILO) ដើម្បីជួបជុំពិភាក្សា និងប្រមូលធាតុចូលបន្ថែមក្នុងការរៀបចំសេចក្តីព្រាងគោលនយោបាយនេះ ឱ្យបានគ្រប់ជ្រុងជ្រោយ។