ឯកឧត្តម ទេសរដ្ឋមន្រ្តី គន់ គីម ចុះពិនិត្យស្ថានភាពមណ្ឌលសុវត្ថិភាពជនភៀសសឹក ក្នុងស្រុកចុងកាល់ ខេត្តឧត្តរមានជ័យ

ឧត្តរមានជ័យ៖ នារសៀលថ្ងៃទី១០ ខែធ្នូ ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញចុះពិនិត្យស្ថានភាពប្រជាពលរដ្ឋភៀសសឹកតាមមណ្ឌលសុវត្ថិភាពចំនួនពីរកន្លែងផ្សេងគ្នា ក្នុងស្រុកចុងកាល់ ដែលជម្លៀសមកពីតាមព្រំដែន។

អំឡុងពេលចុះពិនិត្យទីតាំងទីមួយ ស្ថិតនៅវត្តបាត់ថ្កូវ ឯកឧត្តម ទេសរដ្ឋមន្រ្តី បានកោតសរសើរចំពោះការរៀបចំកំណត់មណ្ឌលសុវត្ថិភាពនៅទីតាំងខាងលើ ដែលជាទីតាំងអំណោយផលគ្រប់គ្រាន់សម្រាប់រៀបចំការស្នាក់នៅបណ្តោះអាសន្នជូនជនភៀសសឹក។

ក្នុងរសៀលថ្ងៃដដែល ឯកឧត្តម ទេសរដ្ឋមន្រ្តី បានអញ្ជើញចុះពិនិត្យទីតាំងទីពីរ ដែលជាទីតាំងមួយក្នុងចំណោមទីតាំងជាច្រើនផ្សេងទៀត ឯកឧត្តម ទេសរដ្ឋមន្រ្តី សង្កេតឃើញថា អាជ្ញាធរខេត្ត ស្រុក និងមូលដ្ឋាន បានកំណត់ទីតាំងមណ្ឌលសុវត្ថិភាពដែលមានសុវត្ថិភាពខ្ពស់ដល់ជនភៀសសឹកបានស្នាក់នៅបណ្តោះអាសន្ន។

ឯកឧត្តម ទេសរដ្ឋមន្រ្តី កោតសរសើរដល់ការសម្របសម្រួលរបស់អាជ្ញាធរ និងសមត្ថកិច្ចគ្រប់ជាន់ថ្នាក់ ដែលបានជួយចាត់ចែង និងផ្គង់ផ្គង់ជាសម្ភារៈដោះស្រាយការស្នាក់នៅបណ្តោះអាសន្នទៅប្រជាពលរដ្ឋជាបន្តបន្ទាប់តាមរយៈអំណោយរបស់កាកបាទក្រហមកម្ពុជា ដូចជា អង្ករ តង់ និងសម្ភារៈចាំបាច់ជាច្រើនមុខទៀត។

ជាមួយគ្នានេះ ឯកឧត្តម ទេសរដ្ឋមន្រ្តី ណែនាំដល់អាជ្ញាធរត្រូវតាមដានឱ្យបានម៉ត់ចត់រាល់តម្រូវការចាំបាច់ ដូចជា ស្បៀង សម្ភារៈប្រើប្រាស់ ឬថ្នាំសង្កូវឱ្យបានគ្រប់គ្រាន់សម្រាប់ចែកជូនប្រជាពលរដ្ឋ ហើយក្នុងករណីមានការខ្វះខាតត្រូវស្នើទៅកាន់រដ្ឋបាលខេត្ត ឬមន្ទីរជំនាញ ដើម្បីចាត់ចែងភ្លាមជូនប្រជាពលរដ្ឋ។

សូមជម្រាបថា តបតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ ក្នុងការឆ្លើយតបចំពោះសុខទុក្ខ និងសុវត្ថិភាពរបស់ប្រជាពលរដ្ឋភៀសសឹកដែលជម្លៀសរហូតដល់រាប់ម៉ឺនគ្រួសារ ចាំបាច់ត្រូវរៀបចំមណ្ឌលសុវត្ថិភាពស្នាក់នៅបណ្តោះអាសន្នសមស្រប និងមានសុវត្ថិភាពខ្ពស់ជូនប្រជាពលរដ្ឋ ព្រមទាំងមានការផ្គត់ផ្គង់នូវអំណោយចាំបាច់ជូនប្រជាពលរដ្ឋភៀសសឹកផងដែរ៕