តាមភូមិឋាននានា រៀបចំតុបតែងលម្អ ត្រៀមទទួលស្វាគមន៍ពិធីបុណ្យចូលឆ្នាំប្រពៃណីជាតិខ្មែរ

តាមភូមិឋាននានាបានរៀបចំតុបតែងលម្អ រំលេចដោយពណ៌ស្រស់ឆើតឆាយ និង​មាន​ជា​ការ​ចង​គោម​ផ្កាយ និងទង់ជាតិផងដែរ ដើម្បីបង្កើតភាពស្រស់ស្អាតសម្រាប់ភូមិ ក៏ដូចជា​ទទួល​ស្វាគមន៍​ទេវតា​ឆ្នាំ​ថ្មី នាំមកក្ដីសុខសប្បាយរីករាយសម្រាប់ឆ្នាំថ្មី។

ឈានជិត​ចូលមកដល់នៃឱកាសពិធីបុណ្យចូលឆ្នាំប្រពៃណីជាតិខ្មែរ ប្រជាពលរដ្ឋតាម​ភូមិ​ឋាន​នានា ​បានរៀបចំតុបតែងលម្អផ្ទះសម្បែង និងតាមដងផ្លូវក្នុងភូមិឋានរបស់ខ្លួនយ៉ាងស្រស់ស្អាត។ សម្រាប់​ប្រជាពលរដ្ឋនៅភូមិយកបាត្រ សង្កាត់ក្បាលកោះ ខណ្ឌច្បារអំពៅ នៅ​ឆ្នាំ​នេះ​ក៏​ដូច​ជា​រៀង​រាល់​ឆ្នាំ​កន្លងទៅដែរ គឺអ្នកភូមិតែងរៀបចំលម្អផ្ទះសម្បែងរបស់ខ្លួន និងសហការគ្នា រៀបចំ​តុប​តែង​លម្អ​តាម​ដងផ្លូវ។ ចូលមកដល់ភូមិឋានមួយនេះ គឺនឹងឃើញ​មាន​ការ​ចង​ខ្សែ​ពណ៌​ចម្រុះ​ខ្វាត់​ខ្វែង​នៅ​ពី​មុខផ្ទះ នៅពីលើដងផ្លូវ និងភ្ជាប់ជាមួយផ្ទាំងអក្សរ អបអរសាទរឆ្នាំថ្មី។

នៅ​តាម​ដងផ្លូវដដែល ក៏មានការចងទង់ជាតិកម្ពុជា មានក្រមា ការដាក់ភ្លើង​អំពូល​លម្អ​នៅ​ពេល​យប់ ​គោមផ្កាយ និងមានការរៀបចំជាទីតាំងសម្រាប់ល្បែងប្រជាប្រិយខ្មែរ ដែល​ឃើញ​ថា​បាន​ចង​ក្អម​មួយចំ​នួនរួចមកហើយផងដែរ។ សម្រាប់អ្នកភូមិរស់នៅទីនេះ លើកឡើង​ពី​ភាព​សប្បាយ​ចិត្ត​ដែល​ពលរដ្ឋ​ក្នុងភូមិនៅតែរក្សាបាន ការសហការគ្នា និងរក្សាបានការ​តុប​តែង​ភូមិឋា​ន​យ៉ាង​ស្រស់​សោភា រៀងរាល់ឱកាសចូលឆ្នាំប្រពៃណីជាតិខ្មែរម្ដងៗ។ ពួកគាត់ជាអ្នករស់នៅទីនេះផ្ទាល់ ក៏​មាន​អារម្មណ៍​ស្រស់​ស្រាយចំពោះសោភ័ណ្ឌភាពភូមិ និងសូមជម្រាបទៅពលរដ្ឋដទៃ អាចចូលមក​លេង​កម្សាន្ត​នៅ​ឱកាសចូលឆ្នាំខ្មែរខាងមុខផងដែរ។

ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ ជាឱកាសឈប់សម្រាក ដែលប្រជាពលរដ្ឋ​ភាគ​ច្រើន ​ចាកចេញទៅតាមស្រុកកំណើតរៀងខ្លួន ដើម្បីជួបជុំ ធ្វើបុណ្យរួមគ្នាជាមួយក្រុមគ្រួសារ។ តាម​បណ្ដា​ខេត្តនៅក្នុងឆ្នាំនេះ ក៏នឹងមានការ​រៀប​ចំ​ព្រឹត្តិការ​ណ៍​សង្ក្រាន្ត​ដើ​ម្បី​ផ្ដល់​ភាព​សប្បាយ​រីក​រាយ​ជូន​ប្រជាពលរដ្ឋ។ នៅរាជធានីភ្នំពេញវិញ គឺនឹងរៀបចំព្រឹត្តិការណ៍ នគរសង្ក្រាន្ត រយៈពេល ៦ថ្ងៃ ចាប់ពីថ្ងៃទី ១៤ ថ្ងៃទី ១៩ ខែមេសា ឆ្នាំ ២០២៦ខាងមុខនេះ៕ អត្ថបទ៖គឹម ហុក