ក្រសួងព័ត៌មានរៀបចំសន្និសីទសារព័ត៌មានបិទបញ្ចប់បេសកកម្ម «ជិះកង់ដើម្បីកុមារកម្ពុជា» រៃអង្គាសថវិកាបានជាង ២៦ម៉ឺនដុល្លារ

(ភ្នំពេញ)៖ ក្រសួងព័ត៌មាន នៅរសៀលថ្ងៃទី២៧ ខែកក្កដា ឆ្នាំ២០២៦ នេះ បានរៀបចំសន្និសីទសារព័ត៌មានមួយ ដើម្បីផ្សព្វផ្សាយជាផ្លូវការនូវការបិទបញ្ចប់បេសកកម្មដ៏ឧត្តុង្គឧត្តម «ជិះកង់ដើម្បីកុមារកម្ពុជា» ដែលដឹកនាំដោយឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន

ពិធីនេះមានការអញ្ជើញចូលរួមវាគ្មិន គឺលោក ទីវ តារារិទ្ធ អ្នកជិះកង់ជុំវិញពិភពលោក, អគ្គនាយកបន្តវេន នៃក្រុមហ៊ុនខ្មែរប៊ែវើរីជីស រួមជាមួយតំណាងមូលនិធិគន្ធបុប្ផា និងតំណាងមន្ទីរពេទ្យកុមារអង្គរ។ ព្រឹត្តិការណ៍នេះបានប្រព្រឹត្តទៅនៅទីស្តីការក្រសួងព័ត៌មាន។

ក្នុងបេសកកម្មដ៏អស្ចារ្យនេះ លោក ទីវ តារារិទ្ធ បានចំណាយពេលជាង ២ឆ្នាំ ជិះកង់ឆ្លងកាត់ប្រទេសចំនួនជាង ៤០ នៅជុំវិញពិភពលោក ដើម្បីរៃអង្គាសថវិកាជួយដល់កុមារកម្ពុជា។ តាមរយៈកិច្ចខិតខំប្រឹងប្រែងប្រកបដោយការលះបង់ខ្ពស់នេះ លោកបានប្រមូលថវិកាបានចំនួនសរុបជាង ២៦ម៉ឺនដុល្លារអាមេរិក ដែលថវិកាទាំងនេះនឹងត្រូវបរិច្ចាគជូនដល់មូលនិធិគន្ធបុប្ផាកម្ពុជា និងមន្ទីរពេទ្យកុមារអង្គរ ដើម្បីទ្រទ្រង់ដល់ប្រតិបត្តិការផ្តល់សេវាព្យាបាល និងថែទាំសុខភាពដល់កុមារកម្ពុជាដោយឥតគិតថ្លៃ។

វត្តមានរបស់ឯកឧត្តម នេត្រ ភក្ត្រា តំណាងស្ថាប័នពាក់ព័ន្ធនានា បានឆ្លុះបញ្ចាំងពីការគាំទ្រ និងការទទួលស្គាល់យ៉ាងទូលំទូលាយចំពោះបេសកកម្មមនុស្សធម៌ដ៏មានអត្ថន័យនេះ។

ការបិទបញ្ចប់បេសកកម្មនេះ មិនត្រឹមតែជាជោគជ័យផ្ទាល់ខ្លួនរបស់លោក ទីវ តារារិទ្ធ ប៉ុណ្ណោះទេ ប៉ុន្តែក៏ជាគំរូដ៏ល្អមួយនៃការលះបង់ដើម្បីបុព្វហេតុមនុស្សធម៌ និងជាការរួមចំណែកដ៏សំខាន់ក្នុងការលើកកម្ពស់សុខុមាលភាពរបស់កុមារកម្ពុជាផងដែរ៕

រូបបថត៖ ខឹម សុវណ្ណារ៉ា