កម្ពុជា ត្រៀមខ្លួនរួចជាស្រេចក្នុងការធ្វើជាម្ចាស់ផ្ទះរៀបចំសន្និសីទប្រធានសភា នៃ​អន្តរសភា​លើកទី២

ភ្នំពេញ៖ កម្ពុជាបានត្រៀមខ្លួនរួចជាស្រេចក្នុងការធ្វើជាម្ចាស់ផ្ទះរៀបចំ​សន្និសីទប្រធានសភា នៃ​អន្តរ​សភាលើកទី២ ដែលនឹងប្រព្រឹត្តទៅចាប់ពីថ្ងៃទី២៦-២៨ ខែសីហា ឆ្នាំ២០២៦ ខាងមុខនេះ។ ហើយ​បណ្តាមេដឹកនាំប្រទេសជាច្រើន និងអង្គការអន្តរជាតិនានា នឹងអញ្ជើញ​មក​ចូល​រួម​សន្និសីទ​នេះ​។ មូលបទដែលបានកំណត់គឺ “សាមគ្គីភាពដើម្បីសន្តិភាព និងវិបុលភាពរួម ពង្រឹង​នៅ​ការ​អនុវត្ត​ច្បាប់​អន្តរជាតិ និងការដោះស្រាយបញ្ហាដោយសន្តិវិធី” ដែលនេះគឺជាមូលបទ​ដ៏​មាន​សារ​សំខាន់ និងមានការប្រទាក់ក្រឡាគ្នាស្របទៅនឹងស្ថានការណ៍ពិភពលោកនាពេលបច្ចុប្បន្ន មាន​ភាព​មិន​គោរព​ច្បាប់អន្តរជាតិ និងការដើរចេញពហុភាគីនិយម។

ឯកឧត្តម ជា ធីរិទ្ធ អ្នកនាំពាក្យព្រឹទ្ធសភាបានថ្លែងប្រាប់ BTV ថា សម្រាប់ស្ថាប័ននីតិប្បញ្ញតិ រួម​ទាំង​ស្ថាប័ន​នីតិប្រតិបត្តិ គឺបានត្រៀមខ្លួនរួច​រាល់​អស់​ហើយ​ក្នុង​ការ​ធ្វើ​​ជា​ម្ចាស់​ផ្ទះ​រៀប​ចំ​សន្និសីទ​ប្រធានសភា នៃអន្តរសភាលើកទី២ ដែលនឹងប្រព្រឹត្តទៅចាប់ពីថ្ងៃទី២៦-២៨ ខែសីហា ឆ្នាំ​២០២៦ខាងមុខនេះ។ ហើយ​សម្រាប់​ប្រទេស​កម្ពុជា​ដែល​ជា​ប្រទេស​មួយ​ដែល​ធ្លាប់​​តែ​ឆ្លង​កាត់​នៅ​ភ្លើង​សង្គ្រាម​ដ៏រ៉ាំរ៉ៃ ប៉ុន្តែ​កម្ពុជាបានក្លាយជាប្រទេសមួយដែលមានសន្តិភាពនៅឆ្នាំ១៩៩៨ ពេល​នោះ​ជា​ឱកាសដែលកម្ពុជាបានពង្រីកខ្លួនទៅកាន់អន្តរជាតិជាបន្តបន្ទាប់ ចូលក្នុងអង្គការតំបន់ អង្គការ​អន្តរជាតិនានា និងរៀបចំជាធ្វើ​ជា​ម្ចាស់​ផ្ទះ​នៃ​កិច្ច​ប្រជុំ​កំពូល​ៗ​នានា​ដែ​ល​បាន​ធ្វើ​កន្លង​មក​។ តាមរយៈព្រឹត្តិការណ៍នៃសន្និសីទប្រធានសភា នៃអន្តរសភាលើកទី២ គឺជា​ឱកាស​បន្ថែម​ទៀត​សម្រាប់​កម្ពុជា​ក្នុងការបង្ហាញទៅកាន់ពិភពលោកទាំងមូលថា កម្ពុជាគឺជាប្រទេស​មួយ​ដែល​មាន​ស្ថេរភាព​ ហើយអាចចូលរួមចំណែកនៅក្នុងការដោះស្រាយបង្ហាញរបស់ពិភាពលោកបាន ពោល​គឺ​ពី​ប្រទេស​ដែលធ្លាបតែពិភពលោកចូលរួមដោះស្រាយបញ្ហារបស់កម្ពុជា ក៏ប៉ុន្តែកម្ពុជា​ប្រែ​ក្លាយ​ពី​ប្រទេស​មួយ​ដែល​ចូល​រួម​ចំណែក​យ៉ាង​សកម្ម​នៅ​លើ​ឆាក​អន្តរជាតិ​ក្នុង​ការ​ចូលរួម​ចំណែក​ដោះ​ស្រាយ​បញ្ហា​ពិភពលោក ជាពិសេសគឺការលើកកម្ពស់នៅការអនុវត្តពហុភាគីនិយម និងច្បាប់​អន្តរជាតិ​ដែល​កម្ពុជាតែងតែប្រកាន់ភ្ជាប់ ហើយក៏ទទូចឲ្យបណ្តា​ប្រទេស​នានា​ប្រកាន់​នៅ​ជំហរ​អនុវត្ត​ច្បាប់​អន្តរជាតិឲ្យបានជាក់លាក់ និងការលើកកម្ពស់នៅពហុភាគីនិយម ដែល​នា​ពេល​បច្ចុប្បន្ន​ពិភលោកកំពុងតែមានបញ្ហាដោយសារតែការដើរទៅរកឯកតោភាគីនិយម និងការ​មិន​ផ្តល់​តម្លៃ​ដល់ច្បាប់អន្តរជាតិ។ ដូច្នេះវេទិកាសន្និសីទប្រធានសភា នៃអន្តរសភាលើកទី២ គឺ​ជា​ឱកាស​ដែល​បណ្តាថ្នាក់ដឹកនាំនៃស្ថាប័ននីតិប្បញ្ញត្តិជួបប្រជុំគ្នាផ្តល់ជាគំនិត និងផ្តល់ជាទឡ្ហីករណ៍ និង​អំពាវនាវឲ្យមានការគោរពទៅលើច្បាប់អន្តរជាតិ ក៏ដូចជាពហុភាគីនិយម។

អ្នកនាំពាក្យព្រឹទ្ធសភាបានបញ្ជាក់ថា មូលបទដែលបានកំណត់គឺ “សាមគ្គីភាពដើម្បីសន្តិភាព និង​វិបុល​ភាព​រួម ពង្រឹងនៅការអនុវត្តច្បាប់អន្តរជាតិ និងការដោះស្រាយបញ្ហាដោយសន្តិវិធី” ដែល​នេះ​​​គឺ​ជាមូលបទដ៏មានសារសំខាន់ និងមាន​ការ​ប្រទាក់​ក្រឡា​គ្នា​ស្រប​ទៅ​នឹង​ស្ថាន​ការណ៍​ពិភព​លោក​នាពេ​លបច្ចុប្បន្ន មានភាពមិនគោរពច្បាប់អន្តរជាតិ និងការដើរចេញពហុភាគីនិយម។ ហើយ​មូលបទដ៏សំខាន់នេះ ធ្វើយ៉ាង​ណាឲ្យ​បណ្តា​ប្រទេស​ទាំង​អស់​នាំគ្នា​ពង្រឹង​ច្បាប់​អន្តរ​ជាតិ​ឡើង​វិ​ញ ហើយបើមិនដើរតាមច្បាប់អន្តរជាតិទេ គឺពិភពលោកនឹងជួបបញ្ហាអស្ថេរភាព ឬក៏គ្មាន​សណ្តាប់​ធ្នាប់​។ ពិភពលោកនាពេលបច្ចុប្បន្នជួបបញ្ហាច្រើនដូចជាសង្គ្រាមកើតឡើងនៅអ៊ុយក្រែនរវាងរុស្ស៊ី សង្គ្រា​ម​នៅ​មជ្ឈឹមបូព៌ា សហរដ្ឋអាម៉េរិក អ៊ីស្រាអែល ជាមួយនឹងអ៊ីរ៉ង់ និងបញ្ហាផ្សេងៗទៀត រួមទាំង​បញ្ហា​សង្គ្រាម​រវាងកម្ពុជាជាមួយនឹងថៃ ដែលថៃឈ្លានពានមកលើកម្ពុជា។ ហើយកម្ពុជា​ក៏​កំពុង​រង​ផល​ប៉ះពា​ល់ពីពិពលោកផង ហើយក៏រងផលប៉ះពាល់​ដែល​កើត​ឡើង​ចេញ​ពី​សង្គ្រាម​ព្រំដែន​ជា​មួយ​នឹង​ថៃ​ដែរ​៕ អត្ថបទ៖ វង្ស សុភាព