កងកម្លាំងប្រដាប់អាវុធ ប្រឆាំងដាច់ខាត រាល់អំពើទុច្ចរិតទាំងឡាយណា មានចេតនា​ប៉ុនប៉ង​ផ្តួល​រំលំរដ្ឋាភិបាលស្របច្បាប់

កងកម្លាំងប្រដាប់អាវុធ បានត្រៀមលក្ខណៈសម្បត្តិរួចរាល់១០០ភាគរយ ក្នុងការការពារ និង ប្រឆាំង​ដាច់ខាតរាល់អំពើទុច្ចរិតទាំងឡាយណា មានចេតនាប៉ុនប៉ងផ្តួលរំលំរដ្ឋាភិបាលស្របច្បាប់ ។

លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានប្រាប់ឱ្យដឹងថា ៖ ដោយ​ទទួល​បាន​បទ​បញ្ជា​ពីឯកឧត្តម ឧត្តមសេនីយ៍ឯកជួន ណារិន្ទ អគ្គស្នងការរងនគរបាលជាតិ និងជា​ស្នង​ការ​នគរបាលរាជធានីភ្នំពេញ កងកម្លាំងនគរបាលនៅទូទាំងខណ្ឌរបស់ដង្កោ បានត្រៀម​ជា​ស្រេច​១០០​ភាគ​រយហើយ ដើម្បីត្រៀមបង្ក្រាបរាល់ជនអគិតិ និងជនឧទ្ទាមក្រៅច្បាប់ទាំងឡាយណា ដែល​រៀប​ចំគម្រោងប៉ុនប៉ុងផ្តួលរំលំរាជរដ្ឋាភិបាល ដោយយក​កិច្ច​សហប្រតិបត្តិការ​តំបន់​ត្រីកោណ​អភិវឌ្ឍន៍ CLV – DTA មកធ្វើជាលេស ហើយញ៉ុះញ៉ុងពលរដ្ឋស្លូតត្រង់ឱ្យក្រោកបះបោរ ប្រឆាំងរដ្ឋាភិបាលស្របច្បាប់ នាពេលបច្ចុប្បន្ន ។

លោកអធិការបន្ថែមថា ប្រសិនបើមានការប្រមូលផ្តុំណាមួយ ក្នុងចេតនារៀបកម្លាំងប៉ះបោរ កម្លាំង​នគរបាល នឹងបង្ក្រាបភ្លាមៗតែម្តង ពោលគឺមិនឱ្យកើតមានឡើងក្នុងមូលដ្ឋាននោះឡើយ ។ លោក​ប្តេជ្ញា ការពារដាច់ខាត មិនបណ្តោយឱ្យជនមួយក្តាប់តូច ធ្វើឱ្យប្រទេសជាតិ​ដែល​កំពុង​ជួប​សុខ​សន្តិភាព វិលទៅរកភាពចលាចល ឬឈានទៅជួបសង្គ្រាមស៊ីវិលជាលើកទី២ទៀតនោះទេ ។

អធិការដដែលបញ្ជាក់ថា គិតចាប់តាំងពីរាជរដ្ឋាភិបាលអាណត្តិសម្តេចតេជោ ហ៊ុន សែ ន បន្ត​ដល់​អាណត្តិសម្តេចធិបតី ហ៊ុន ម៉ាណែត កម្ពុជាមិនទាន់មានការ​បាត់បង់​ទឹក​ដីសូម្បី១​មីលីម៉ែត្រ​នៅ​ឡើយ​នោះ​ទេ ។ ហើយពាក់ព័ន្ធនឹងកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV – DTA គឺ​ជា​អភិវឌ្ឍន៍ជាតិ មិនមែនជាការកាត់ទឹកដីដែលជាអធិបតេយ្យភាពរបស់ខ្លួន ទៅឱ្យជាតិសាសន៍ ឬ​ប្រ​ទេសដទៃជាអ្នកគ្រប់គ្រង ដូចក្រុមប្រឆាំងក្រៅច្បាប់លើកឡើងនោះឡើយ ។

គួរបញ្ជាក់ថា កងកម្លាំងប្រដាប់អាវុធទាំង២ប្រភេទ មានកម្លាំងនគរបាល និងកម្លាំងកង​រាជ​អាវុធ​ហត្ថ​ បានត្រៀមលក្ខណះរបស់ខ្លួនរួចរាល់ជាស្រេច ក្នុងបុព្វហេតុការពារ​សន្តិសុខ​សុវត្ថិភាព​ជូន​ប្រជាជន និងសង្គមជាតិទាំងមូល ពិសេស គឺត្រៀមដើម្បីប្រឆាំង និងបង្ក្រាប រាល់ក្រុម​ជន​ទុច្ចរិត​ទាំង​ឡាយ ដែលប៉ងផ្តួលរំលំរាជរដ្ឋាភិបាលរបស់កម្ពុជា ដោយមិនបណ្តែត​បណ្តោយ​ឱ្យ​សង្គម​ជាតិ​ធ្លាក់​ចូល​ទៅ​រកភាពវឹកវរក្នុងមួយវិនាទីណាមួយនោះឡើយ ៕ លីហេង