ព័ត៌មាន
សម្ដេចធិបតីកំពុងដឹកនាំគណៈប្រតិភូកម្ពុជាចូលរួមកិច្ចប្រជុំកំពូលអាស៊ាន លើកទី៤៩ និងកិច្ចប្រជុំពាក់ព័ន្ធ
នៅព្រឹកថ្ងៃទី១៧ ខែវិច្ឆិកា ឆ្នាំ២០២៦នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា កំពុងបន្តដឹកនាំគណៈប្រតិភូកម្ពុជា ដើម្បីចូលរួម កិច្ចប្រជុំកំពូលអាស៊ានលើកទី៤៩ និងកិច្ចប្រជុំពាក់ព័ន្ធ នៅទីក្រុងម៉ានីល សាធារណរដ្ឋហ្វីលីពីន តបតាមការអញ្ជើញរបស់ឯកឧត្តម ហ្វឹឌីណាន់ រ៉ូម៉ូលដេស ម៉ាកូស ជូញៀ ប្រធានាធិបតីនៃសាធារណរដ្ឋហ្វីលីពីន ក្នុងនាមជាប្រធានអាស៊ានឆ្នាំ២០២៦។

នៅព្រឹកថ្ងៃទី១៧ វិច្ឆិកា ២០២៦នេះ បន្ទាប់ពីអញ្ជើញចូលរួមកិច្ចប្រជុំកំពូលអាស៊ាន បូក៣ (អាស៊ាន បូក ចិន, ជប៉ុន និងកូរ៉េខាងត្បូង)ហើយនោះ សម្តេចធិបតី ហ៊ុន ម៉ាណែត នាយករដ្ឋមន្រ្ដី បន្តដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា អញ្ជើញចូលរួមកិច្ចប្រជុំថ្នាក់ដឹកនាំសហគមន៍បំភាយឧស្ម័នកម្រិតសូន្យអាស៊ីលើកទី៤។
សហគមន៍បំភាយឧស្ម័នកម្រិតសូន្យអាស៊ី (Asia Zero Emission Community – AZEC) គឺជាវេទិកាសហប្រតិបត្តិការថ្នាក់តំបន់មួយ ដែលផ្តួចផ្តើមឡើងដោយប្រទេសជប៉ុន ដើម្បីជួយជំរុញឱ្យបណ្តាប្រទេសនៅអាស៊ី សម្រេចបាននូវគោលដៅកាត់បន្ថយការបំភាយឧស្ម័នកាបូនឱ្យដល់កម្រិតសូន្យ (Net-Zero Emissions) ស្របពេលដែលនៅតែរក្សាបាននូវកំណើនសេដ្ឋកិច្ច និងសន្តិសុខថាមពល។ គំនិតផ្តួចផ្តើមនេះ ត្រូវបានប្រកាសជាលើកដំបូងដោយអតីតនាយករដ្ឋមន្ត្រីជប៉ុន ឯកឧត្តម ហ្វូមីអូ គីស៊ីដា (Fumio Kishida) នៅខែមករា ឆ្នាំ២០២២ ហើយកិច្ចប្រជុំថ្នាក់រដ្ឋមន្ត្រីលើកដំបូងត្រូវបានធ្វើឡើងនៅខែមីនា ឆ្នាំ២០២៣ នៅទីក្រុងតូក្យូ។ សហគមន៍នេះ មានសមាជិកចំនួន១១ រួមមាន៖ ប្រទេសសមាជិកអាស៊ានចំនួន៩ (ប្រ៊ុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី ហ្វីលីពីន សិង្ហបុរី ថៃ វៀតណាម) បូករួមជាមួយ ជប៉ុន និង អូស្ត្រាលី។

នៅកិច្ចប្រជុំថ្នាក់ដឹកនាំសហគមន៍បំភាយឧស្ម័នកម្រិតសូន្យអាស៊ីលើកទី៤ ព្រឹកថ្ងៃនេះ បានបន្តដឹកនាំរួមដោយប្រធានាធិបតីហ្វីលីពីន ឯកឧត្តម ហ្វែឌីណាន់ រ៉ូម៉ាអល់ដេស ម៉ាកូស វិន័យ (Ferdinand R. Marcos Jr.) និងនាយករដ្ឋមន្ត្រីជប៉ុន លោកជំទាវ តាកាអិជិ សាណាយ៉ិ (Sanae Takaichi)។ កិច្ចប្រជុំលើកទី៤នេះ នឹងផ្តោតលើការពន្លឿនការផ្លាស់ប្តូរថាមពលស្អាត ការធានានូវសន្តិសុខថាមពលក្នុងតំបន់ និងភាពធន់នៃខ្សែច្រវាក់ផ្គត់ផ្គង់ថាមពល និងការជំរុញទីផ្សារកាបូនជាដើម។
ក្នុងកិច្ចប្រជុំនៅពេលនេះ ជប៉ុន នឹងស្នើបង្កើត «ស្ថាប័នថាមពលអន្តរជាតិកំណែទម្រង់អាស៊ី (Asian version of the IEA)» ដែលមានវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA) ធ្វើជាលេខាធិការដ្ឋាន ដើម្បីសម្របសម្រួលការស្តុកទុកប្រេងបន្ទាន់ និងសហការការពារវិបត្តិថាមពល៕





-
កម្សាន្ដ1 week agoកញ្ញា សុគា គីមលាង ប្តេជ្ញាបង្ហាញសក្តានុពលទេសចរណ៍ និងវប្បធម៌កម្ពុជាលើឆាក Miss International នៅជប៉ុន
-
ព័ត៌មាន1 week agoសម្ដេចធិបតី៖ កីឡាករមានពិការភាព គឺជានិម្មិតរូបនៃភាពអត់ធ្មត់ ឆន្ទៈមោះមុត និងការតស៊ូឆ្ពោះទៅរកគោលដៅ
-
កីឡា1 week agoក្រសួងមហាផ្ទៃ និងខេត្តកណ្ដាល កំពុងនាំមេដាយកីឡាជាតិ និងកីឡាជាតិជនពិការ ឆ្នាំ២០២៦
-
កីឡា1 week agoNOCC និង វឌ្ឍនៈ ហ្គោល រីហ្សត ជួបប្រជុំត្រៀមរៀបចំពានវាយកូនគោលលំដាប់ពិភពលោក ក្រោយទទួលការគាំទ្រពីរាជរដ្ឋាភិបាល
-
ព័ត៌មាន1 week agoសម្ដេចធិបតី លើកទឹកចិត្តដល់យុវជនមិនទាន់ជាប់ចូលរួមកាតព្វកិច្ចយោធា សូមបន្តដាក់ដាក់ពាក្យនៅឆ្នាំក្រោយ
-
ព័ត៌មាន1 week agoការរៀបចំការប្រកួតកីឡាជាតិ ជាការត្រៀម កម្ពុជាធ្វើជាម្ចាស់ផ្ទះរៀបចំ ការប្រកួតកីឡាអន្តរជាតិចំនួន៣
-
ព័ត៌មាន1 week agoសម្ដេចធិបតី៖ កីឡាជាសាលារៀនអប់រំមនុស្សឱ្យចេះ គោរពច្បាប់ គោរពគូប្រកួត ទទួលស្គាល់លទ្ធផល និងក្រោកឈរឡើងវិញ
-
ព័ត៌មាន1 week agoរាជរដ្ឋាភិបាលបន្តយកចិត្តទុកដាក់ជួយសង្គ្រោះប្រជាពលរដ្ឋរងគ្រោះដោយទឹកជំនន់