សម្ដេចធិបតី លើកទឹកចិត្តដល់យុវជនមិនទាន់ជាប់ចូលរួមកាតព្វកិច្ចយោធា សូមបន្តដាក់ដាក់ពាក្យនៅឆ្នាំក្រោយ

សម្ដេចធិបតី ហ៊ុន ម៉ាណែត នាយករដ្ឋមន្រ្ដីកម្ពុជា បានលើកទឹកចិត្តដល់យុវជនដែលស្ម័គ្រដាក់ពាក្យចូលរួមកាតព្វកិច្ចយោធា ហើយមិនទាន់ជាប់ សូមបន្តនាំគ្នាដាក់នៅឆ្នាំក្រោយបន្ថែមទៀត ខណៈក្រសួងការពារជាតិនឹងធ្វើការបញ្ជាក់លម្អិតបន្ថែមលើការងារដាក់ពាក្យនេះ។

ក្នុងឱកាស អញ្ជើញជាអធិបតីក្នុង ពិធីបើកវគ្គហ្វឹកហ្វឺនយោធិនកាតព្វកិច្ច ជំនាន់ទី១ ឆ្នាំ២០២៦ ដែលរៀបចំនៅបញ្ជាការដ្ឋានការពារកោះឆ្នេរ ក្នុងខេត្តកំពង់ស្ពឺ នៅរសៀល ថ្ងៃទី៩ ខែវិច្ឆិកា ឆ្នាំ២០២៦នេះ សម្ដេចមហាបវរធិបតី ហ៊ុន ម៉ាណែត បានបង្ហាញក្ដីរំពឹងយ៉ាងមុតមាំថា យុវជនដែលចូលបំពេញកាតព្វកិច្ចយោធា នៅឆ្នាំដំបូងនាឆ្នាំ២០២៦នេះ ត្រូវខិតខំប្រឹងប្រែងធ្វើការហ្វឹកហាត់លុតដំរហូតដល់រយៈពេលកំណត់២៤ខែ ដើម្បីធ្វើជាគំរូដល់យោធិនកាតព្វកិច្ចជំនាន់ក្រោយៗទៀត។

សម្ដេចមហាបវរធិបតី មានប្រសាសន៍ថា សម្រាប់អ្នកដែលដាក់ពាក្យមិនទាន់បំពេញកាតព្វកិច្ចយោធា សូមរង់ចាំវគ្គបន្ទាប់ដែលនឹងជូនដំណឹងដោយ គណៈកម្មការរបស់ក្រសួងការពារជាតិ ដែលនឹងបញ្ជាក់លម្អិតជាបន្ដបន្ទាប់ ដើម្បីឱ្យយុវជនចូលមកបំពេញកាតព្វកិច្ចយោធា។

សម្ដេចមហាបវរធិបតី ហ៊ុន ម៉ាណែត បានមានប្រសាសន៍ថា៖ “សូមយុវជនស្ម័គ្រចិត្តឆ្នាំនេះមិនទាន់ដាក់ពាក្យបាន សូមបន្ដចុះឈ្មោះតទៀត ហើយគណៈកម្មការក្រសួងការពារជាតិ នឹងបញ្ជាក់លម្អិតបន្ថែមទៀត។ សង្ឃឹមថា ៥ ០០០នាក់ ដែលចូលនៅឆ្នាំទី១ នេះ នឹងខិតខំតស៊ូរហូតដល់បញ្ចប់កាតព្វកិច្ចរបស់ខ្លួនរយៈពេល ២៤ខែ ដែលជាគំរូដល់យោធិនកាតព្វកិច្ចជំនាន់ក្រោយៗទៀត”។

សម្ដេចមហាបវរធិបតីប្រមុខនៃរាជរដ្ឋាភិបាលកម្ពុជា បានគូសបញ្ជាក់ថា ការអនុវត្តកាតព្វកិច្ចយោធាជាការលត់ដំមិនត្រឹមរូបរាងកាយ តែជាការលត់ដំផ្នែកស្មារតី ហើយក្រោយហ្វឹកហ្វឺនរយៈពេល៣ខែ យោធិនកាតព្វកិច្ច នឹងទៅរស់នៅតាមអង្គភាពនីមួយៗ ហើយជាពេលអនុវត្តការរស់នៅបែបជាយោធា ខណៈយោធិនកាតព្វកិច្ចក្រៅពីការហ្វឹកហាត់ហើយនោះ នឹងត្រូវហ្វឹកហ្វឺនយុទ្ធវិធី វិន័យ អត្តចរិត វិន័យ និងរបៀបរស់នៅជាកងទ័ព។

គួររម្លឹកថា នៅថ្ងៃទី២៣ ខែឧសភា ឆ្នាំ២០២៦ ព្រះរាជក្រមលេខ នស/រកម/០៥២៦/០០៨ ប្រកាសឱ្យប្រើច្បាប់ ស្តីពី កាតព្វកិច្ចយោធា, នៅថ្ងៃទី១២ ខែសីហា ឆ្នាំ២០២៦ រាជរដ្ឋាភិបាលបានចេញ អនុ​ក្រឹត្យ​លេខ ១៧៦អនក្រ.បក ស្ដីពី ការអនុវត្តច្បាប់ ស្តីពី កាតព្វកិច្ចយោធា, នៅថ្ងៃទី​២៤ ខែសីហា ឆ្នាំ២០២៦ រាជរដ្ឋាភិបាល បានចេញសេចក្តីសម្រេចលេខ ១០៤សសរ ស្តីពី ការតែងតាំង​សមាស​ភាពគណៈកម្មាធិការជាតិកាតព្វកិច្ចយោធា និងនៅ ថ្ងៃទី២៧ ខែតុលា ឆ្នាំ២០២៦ រាជរដ្ឋាភិបាល បានចេញអនុក្រឹត្យលេខ ២៣០ អនក្រ.បក ស្តីពី ការជ្រើសរើសប្រជាពលរដ្ឋខ្មែរដើម្បីចូលបំពេញ​កាតព្វកិច្ចយោធាសម្រាប់ ឆ្នាំ២០២៦ ចំនួន ១០ ០០០នាក់។

បន្ទាប់ពីអនុម័តច្បាប់ថ្មី និងលិខិតបទដ្ឋានគតិយុត្តពាក់ព័ន្ធ រាជរដ្ឋាភិបាលបានរៀបចំ​គណៈ​កម្មាធិ​ការជាតិកាតព្វកិច្ចយោធា ដើម្បីដឹកនាំរៀបចំការងារពាក់ព័ន្ធការទទួលយកប្រជាពលរដ្ឋ ចូលបំពេញកាតព្វកិច្ចយោធា ចាប់ពី ឆ្នាំ២០២៦ នេះតទៅ ក្នុងរយៈពេលជិត ៣ខែ ចាប់ពី​ថ្ងៃ​ទី១២ ខែសីហា ឆ្នាំ២០២៦ រហូតមកដល់ថ្ងៃទី៩ ខែវិច្ឆិកា ឆ្នាំ២០២៦ ការងារពាក់ព័ន្ធការអនុវត្តន៍​ច្បាប់​កាតព្វកិច្ចយោធាបានចាប់ផ្តើមជាបន្តបន្ទាប់៕