ឯកឧត្តម អ៊ុ ម៉ារ៉ា អញ្ជើញប្រកាសតែងតាំងមុខតំណែង អភិបាលរង នៃគណៈអភិបាលខេត្តព្រះវិហារ

នារសៀលថ្ងៃទី១០ ខែកញ្ញា ឆ្នាំ២០២៤ នៅសាលប្រជុំធំសាលាខេត្តព្រះវិហារ មានរៀបចំពិធីប្រកាសតែងតាំងចូលកាន់មុខតំណែងលោក គឹម ចាន់បញ្ញា ជាអភិបាលរងខេត្ត ព្រះវិហារថ្មីក្រោមអធិបតីភាព ឯកឧត្តម អ៊ុ ម៉ារ៉ា រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដោយមានការចូលរួម ពីសំណាក់ក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរអង្គភាពជុំវិញខេត្ត ព្រមទាំងមន្ត្រី រាជការសាលាខេត្តជាច្រើនរូបទៀត។

ក្នុងឱកាសនោះឯកឧត្តម គីម រិទ្ធី អភិបាលខេត្ត បានឡើងមានមតិស្វាគមន៍ និងបានអបអរសាទរការ ប្រកាសចូលកាន់មុខតំណែងរបស់លោក គឹម ចាន់បញ្ញា ដែលត្រូវបានថ្នាក់ដឹកនាំបានផ្តល់នូវ សេចក្តីទុកចិត្តតែងតាំងជាអភិបាលរង ខេត្តព្រះវិហារ ជំនួសលោក អ៊ុង វុទ្ធី ដែលបានផ្ទេរភារកិច្ចទៅ ជាអភិបាលរងខេត្តកំពង់ធំ។

ទន្ទឹមនេះឯកឧត្តមក៏បានផ្តល់អនុសាសន៍ផ្តាំផ្ញើ ដល់លោកអភិបាលរង ខេត្តដែលទើបទទួល​បាន​ការតែងតាំងនាឱកាសនេះ សូមបន្តខិតខំយកចិត្តទុកដាក់បន្តគោរពឋានុ ក្រម និងគោរព​តាមគោលការណ៍គណនេយ្យ ភាពការងារ ពង្រឹងសាមគ្គីភាព និងទំនាក់ទំនងល្អជា មួយថ្នាក់ដឹកនាំ មន្ត្រីរាជការ កងកម្លាំង និងយកចិត្តទុកដាក់អស់ ពីកម្លាំងកាយចិត្តអនុវត្តការងារ ដែលថ្នាក់ដឹកនាំ​ប្រល់ជូន។

ថ្លែងក្នុងឱកាសនោះ ឯកឧត្តម អ៊ុ ម៉ារ៉ា បានកោតសរសើរ និងវាយតម្លៃខ្ពស់ចំពោះក្រុម ប្រឹក្សាខេត្ត គណៈអភិបាលខេត្ត អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងមន្ទីរ-អង្គភាពពាក់ព័ន្ធក្នុងខេត្តតាកែវទាំងអស់ ​ដែលបានរួមសាមគ្គីសហការគ្នាខិតខំប្រឹងប្រែង យ៉ាង​សកម្មក្នុងការអនុវត្តកម្មវិធីនយោបាយរបស់រាជរដ្ឋាភិបាលកម្ពុជា ដោយបានជម្រុញការអភិវឌ្ឍ ខេត្តឲ្យមានការរីកចម្រើនលើគ្រប់វិស័យ និងរក្សាបាននូវសន្តិសុខសណ្ដាប់​សាធារណៈសង្គម​បានល្អ ប្រសើរនាពេលកន្លងមក។

ជាមួយនេះ ឯកឧត្តមក៏បានផ្ដាំផ្ញើលោកអភិបាលរងខេត្តថ្មី ដែលទើបទទួលការតែងតាំងមុខ តំណែងថ្មី ត្រូវអនុវត្តតួនាទីភារកិច្ច និងការទទួលខុសត្រូវរបស់ខ្លួនប្រកបដោយការសហការ សាមគ្គី ភាព និងឯកភាពផ្ទៃក្នុងដើម្បីចូលរួមចំណែកធ្វើឱ្យការអនុវត្តការងារក្នុងជួរគណៈអភិបាលខេត្ត ឲ្យ កាន់តែមានប្រសិទ្ធភាព ជាពិសេសការលើកកម្ពស់ការផ្ដល់ សេវាសាធារណៈជូនប្រជាពលរដ្ឋ និងការ អភិវឌ្ឍខេត្តព្រះវិហារឲ្យកាន់តែមានការរីកចម្រើនថែមទៀត៕