របាំងសាច់អួន និងរបាំងស្បៃមុង១៣ខ្សែដាក់ក្នុងរដូវបិទនេសាទ ត្រូវព្រះរាជអាជ្ញាដឹកនាំកម្លាំងចំរុះបង្ក្រាបបំផ្លាញចោល

កំពង់ឆ្នាំង៖ នៅថ្ងៃទី១២ ខែកញ្ញា ឆ្នាំ២០២៤ ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង បានដឹកនាំកម្លាំងនៃមន្ទីរកសិកម្មរុក្ខាប្រម៉ាញ់ និងនេសាទ, ខណ្ឌរដ្ឋបាលជលផលកំពង់ឆ្នាំង, កម្លាំងអាវុធហត្ថខេត្ត, និងរដ្ឋបាលស្រុកបរិបូណ៌ ចុះបង្ក្រាបបំផ្លាញចោលបទល្មើសរបាំងស្បៃមុង និងរបាំងសាច់អួន១៣ខ្សែ ដែលជនសង្ស័យបានលបលួចដាក់នៅចំណុចភូមិកំពង់ព្រះ និងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង។

លោក លី ឡា នាយខ័ណ្ឌរដ្ឋបាលជលផលកំពង់ឆ្នាំង បានអោយដឹងថា៖ នៅតំបន់ភូមិកំពង់ព្រះ និងភូមិឆ្នុកទ្រូនេះ តែងកើតមានបទល្មើសរបាំងស្បៃមុង និងរបាំងសាច់អួនញឹកញាប់ ដែលគិតមកដល់ពេលនេះ កម្លាំងខ័ណ្ឌរដ្ឋបាលជលផលកំពង់ឆ្នាំង បានចុះបង្ក្រាបរហូតដល់៣ដងហើយ តែជនសង្ស័យនៅតែលបលួចដាក់ក្នុងរដូវបិទនេសាទ ក្រោយសមត្ថកិច្ចចេញផុតដដែល។ ក្រោយទទួលព័ត៌មានថាមានរបាំងសាច់អួនវែងៗ និងរបាំងស្បៃមុងដាក់នៅចំណុចដដែល ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង បានដឹកនាំកម្លាំងចំរុះសរុបចំនួន២៥នាក់ និងមធ្យោបាយបាឡាស្មាច់ចំនួន៤គ្រឿង បានចុះប្រតិបត្តការត្រួតពិនិត្យនៅចំណុចទាំង២នោះ និងបានប្រទះឃើញបទល្មើសរបាំងស្បៃមុង និងរបាំងសាច់អួនមានប្រវែង វែងខុស ពីច្បាប់ស្ដីពីជលផល និងបានឯកភាពគ្នារុះរើបំផ្លាញចោលនៅនិងកន្លែងតែម្តង។ ក្នុងប្រតិបត្តិការខាងលើ កម្លាំងចំរុះបានរុះរើរបាំងស្បៃមុងចំនួន០៩ខ្សែ ប្រវែង២៧០ម៉ែត្រ លបលូចំនួន០៩ មាត់ បង្កោលចំនួន១៥០ដើម។ រុះរើរបាំងសាច់អួនចំនួន០៤កន្លែង ប្រវែង៤០០ម៉ែត្រ លបលូចំនួន០៨មាត់ បង្កោលចំនួន២០០ដើម និងបានលែងត្រីចម្រុះចំនួន២៥០ គីឡូក្រាម ក្នុងដែននេសាទវិញ។

កន្លងមក ឯកឧត្តម ឯក ស៊ុនរស្មី តែងបានចុះផ្សព្វផ្សាយច្បាប់ស្តីពីជលផល ពន្យល់ប្រជានេសាទនូវឧបករណ៍នេសាទប្រភេទណាដែលបំផ្លាញដល់ធនធានធម្មជាតិក្នុងទឹក ហើយខុសទៅនឹងច្បាប់ និងបានប្រាប់ពីទោសទណ្ឌដល់ពួកគាត់បានដឹងដល់បងប្អូនប្រជានេសាទនៅតាមដងទន្លេ និងបានសុំអោយពួកគាត់ជួយប្រាប់ពីកន្លែងមានបទល្មើស ដើម្បីបង្ក្រាបបំផ្លាញចោលអោយទាន់ពេល ដើម្បីបងប្អូនទាំងអស់គ្នា។ ក្រោយឯកឧត្តមបានចុះផ្សព្វផ្សាយ ឃើញថាបទល្មើសនេសាទបានថយចុះជាងឆ្នាំកន្លងទៅ គួរអោយកត់សម្គាល់៕ កាំង ហុងវាស្នា