មន្ត្រីប្រទេសបេលីហ្ស និងហ្សាម៉ាអ៊ីក មកដល់ហៃទី ដើម្បីចូលរួមការប្រយុទ្ធប្រឆាំងក្រុមជនអន្ធពាល

ក្រុមដំបូងនៃមន្រ្តីប្រទេសហ្សាម៉ាអ៊ីក និងមន្រ្តីប្រទេសបេលីហ្ស បានមកដល់ប្រទេសហៃទី ដើម្បីគាំទ្រដល់បេសកកម្មសន្តិសុខអន្តរជាតិ ដែលមានគោលបំណងជួយប្រទេសហៃទីប្រយុទ្ធប្រឆាំងក្រុមជនអន្ធពាល។

កាលពីខែមីនា ប្រទេសហ្សាម៉ាអ៊ីក បានសន្យាជាផ្លូវការផ្តល់បុគ្គលិកចំនួន២០០នាក់ សម្រាប់បេសកកម្មគាំទ្រដោយអង្គការសហប្រជាជាតិ ប៉ុន្តែកងកម្លាំងសន្តិសុខដែលបានពន្យារពេលជាយូរមក មានភាពយឺតយ៉ាវក្នុងការដាក់ពង្រាយ ហើយអាណត្តិដំបូងរបស់ខ្លួន នឹងផុតកំណត់ក្នុងរយៈពេលតិចជាងមួយខែ ប្រសិនបើមិនត្រូវបានបន្តថ្មី។

បេសកកម្មនេះ ត្រូវបានដឹកនាំដោយប្រទេសកេនយ៉ា ជាប្រទេសតែមួយគត់ដែលបានដាក់ពង្រាយកងកម្លាំងទៅកាន់ប្រទេសហៃទី ដោយមានមន្ត្រីនគរបាលចំនួន៤០០នាក់ ក្នុងចំណោមការសន្យាមន្ត្រីនគរបាលសរុបចំនួន១.០០០នាក់ ។

កងកម្លាំងការពារជាតិប្រទេស បេលីហ្ស បានដាក់ពង្រាយមន្ត្រីជាន់ខ្ពស់មួយចំនួនទៅកាន់ប្រទេសហ្សាម៉ាអ៊ីក មុនពេលការចាត់តាំងភារកិច្ចទៅកាន់ប្រទេសហៃទី ជាផ្នែកមួយនៃការរួមចំណែករបស់ខ្លួន ក្នុងបេសកកម្មសន្តិសុខ។