ប្រាសាទតាមាន់ និងតាក្របីរបស់ខ្មែរ នៅព្រំដែនកម្ពុជា-ថៃ កំពុងមានការចាប់អារម្មណ៍ខ្លាំងពីសំណាក់ពលរដ្ឋមកទស្សនាកម្សាន្ត

នៅរសៀលថ្ងៃទី១២ ម្សិលមិញនេះ ប្រជាពលរដ្ឋខ្មែរយ៉ាងច្រើនកុះករ បានបន្តនាំគ្នាមកទស្សនា​លេងកម្សាន្ត​នៅប្រាសាទតាមាន់ និងប្រាសាទតាក្របី ដែលមានទីតាំងស្ថិតនៅលើជួរភ្នំដងរែក ក្នុងស្រុកបន្ទាយអំពឹល ខេត្តឧត្តរមានជ័យ តាមបណ្តាលខ្សែបន្ទាត់ព្រំដែនកម្ពុជា-ថៃ ដើម្បី​បានស្គាល់ពីស្នាដៃ​កេរដំណែល​របស់​បុព្វបុរស​ដូនតាខ្មែរ​បានបន្សល់ទុកសម្រាប់កូនខ្មែរជំ​នាន់ក្រោយៗ​ទៀត។

ក្រុមយុវជន និងប្រជាពលរដ្ឋ មានការចាប់អារម្មណ៍​បាននាំគ្នាជាក្រុមៗ​ដើម្បី​មកទស្សនា​លេង​កម្សាន្តនៅប្រាសាទខ្មែររួមមាន ប្រាសាទតាមាន់ ​និងប្រាសាទ តាក្របី។

ក្នុងនោះដែរប្អូនស្រី ចរិយា បានបង្ហាញការចាប់អារម្មណ៍ថា នេះគឺជាលើកដំបូង​ហើយរបស់ប្អូន​រួមទាំង​មិត្តភ័ក្ដិ​ដទៃទៀត ​ក៏ដូចជាបងប្អូនប្រជាពលរដ្ឋ ​ដែលបានធ្វើដំណើរ​មកទស្សនា​លេងកម្សាន្ត​នៅប្រាសាទបុរាណខ្មែរទាំងពីរនេះ ដែលជា​កេរដំណែល​ដ៏ល្អ​របស់​បុព្វបុរស​ដូនតាខ្មែរ​បានកសាង និងបន្សល់ទុក​សម្រាប់កូនខ្មែរ​ជំនាញ​ក្រោយ​បានស្គាល់​ពី​វប្បធម៌ អរិយធម៌​ដ៏​អស្ចារ្យមួយនេះ​ផងដែរ៕