ព្យុះ Francine បង្កផលប៉ះពាល់ខ្លាំងទូទាំងតំបន់ភាគខាងត្បូងរបស់សហរដ្ឋអាមេរិក

ព្យុះ ហ្វ្រានស៊ីន (Francine) បានបោកបក់ពាសពេញភាគខាងត្បូងសហរដ្ឋអាមេរិក កាលពីថ្ងៃព្រហស្បតិ៍ (១២ កញ្ញា) ដោយបណ្ដាលឱ្យមានភ្លៀងធ្លាក់ខ្លាំង និងខ្យល់បក់បោក ខណៈដែលបង្កឱ្យមានការដាច់ចរន្តអគ្គិសនីសម្រាប់លំនៅឋាន និងអាជីវកម្មរាប់សិបម៉ឺនកន្លែង។

មជ្ឈមណ្ឌលព្យុះសង្ឃរាជាតិ បាននិយាយនៅក្នុងសេចក្ដីណែនាំមួយថា ព្យុះនេះបានថយចុះពីប្រភេទទី២ ទៅជាព្យុះត្រូពិច ខណៈដែលរំកិលទៅភាគឦសានលើតំបន់កណ្តាលនៃរដ្ឋ មីស៊ីស៊ីបពី (Mississippi) ប៉ុន្តែនៅតែមានខ្យល់បក់បោកក្នុងល្បឿន ៥៥គីឡូម៉ែត្រក្នុងមួយម៉ោង និងបានគំរាមកំហែងតំបន់នានាពីឥទ្ធិពលនៃព្យុះដ៏គ្រោះថ្នាក់នៅព្រឹកថ្ងៃព្រហស្បតិ៍។

ភ្លៀងធ្លាក់ខ្លាំងត្រូវបានគេរំពឹងថានឹងកើតមានពេញមួយថ្ងៃនៅក្នុងរដ្ឋ លូអ៊ីសស៊ីអានណា (Louisiana) រដ្ឋ Mississippi រដ្ឋ អាឡាបាម៉ា (Alabama) និងតំបន់ឆ្នេរភាគពាយព្យរដ្ឋ ហ្វ្លរីដា (Florida) បន្ទាប់ពីកន្លែងជាច្រើនត្រូវបានជន់លិចជាមួយនឹងភ្លៀងធ្លាក់ខ្លាំងអស់ជាច្រើនម៉ោង។ សេវាអាកាសធាតុជាតិបាននិយាយថា សរុបទាំងអស់ កន្លែងខ្លះអាចមើលឃើញភ្លៀងធ្លាក់ដល់ទៅ ១២អ៊ីញ (៣០សង់ទីម៉ែត្រ) មុនពេលព្យុះនេះថយចុះទាំងស្រុង។

ការិយាល័យរដ្ឋាភិបាល សាលារៀន និងបណ្ណាល័យត្រូវបានបិទទូទាំងតំបន់ ដោយសារទឹកជំនន់រីករាលដាលត្រូវបានរាយការណ៍។ ព្យុះនេះបានធ្វើឱ្យផ្ទះសម្បែង និងអាជីវកម្មជាង ៤០០.០០០ទីតាំង គ្មានថាមពល ហើយមនុស្សរាប់សិបនាក់ត្រូវបានជួយសង្គ្រោះពីទឹកជំនន់នៅទូទាំងតំបន់ដែលរងផលប៉ះពាល់៕