នាយឧត្តមសេនីយ៍ ទៀ សីហា ជួបពិភាក្សាការងារមួយចំនួនជាមួយអនុប្រធានទី១ គណៈកម្មការយោធាមជ្ឈឹមចិន

នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានដឹកនាំគណៈប្រតិភូជាន់ខ្ពស់ ចូលជួបសម្តែងការគួរសម និងពិភាក្សាការងារជាមួយ នាយឧត្តមសេនីយ៍ ចាង យូសៀ អនុប្រធានទី១ គណៈកម្មការយោធា​មជ្ឈឹមចិន នៅក្នុងឱកាសចូលរួមវេទិកាប៉េកាំងសៀនសាន លើកទី១១ នៅទីក្រុងប៉េកាំងប្រទេសចិន។

ថ្លែងនៅក្នុងកិច្ចជំនួបនោះ នាយឧត្តមសេនីយ៍ ចាង យូសៀ បាន​សម្ដែង​ការស្វាគមន៍​យ៉ាងកក់ក្តៅ​ចំពោះឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ​និងគណៈប្រតិភូកម្ពុជា ដែលបាន​ចំណាយពេលជួបពិភាក្សាការងារដើម្បីពង្រឹងទំនាក់ទំនង និង​កិច្ចសហប្រតិបត្តិការ​លើ​វិស័យយោធា​រវាងប្រទេសទាំងពីរ។

នាយឧត្តមសេនីយ៍ ចាង យូសៀ ក៏បានថ្លែងអំណរគុណចំពោះក្រសួងការពារជាតិកម្ពុជា ដែលតែងតែគាំទ្រការរៀបចំធ្វើជាម្ចាស់ផ្ទះវេទិកាប៉េកាំងសៀនសាន។ នាយឧត្តមសេនីយ៍ ចាង យូសៀ ក៏បានមានប្រសាសន៍ថា កម្ពុជា និងចិនគឺជាមិត្តដ៏យូរអង្វែង ហើយកិច្ចសហប្រតិបត្តិការ មិត្តភាពដែកថែបនៃប្រទេសទាំងពីរកាន់តែមានភាពរីកចម្រើនជាបន្តបន្ទាប់។

នាយឧត្តមសេនីយ៍បានបន្ថែមថា ក្រោមការដឹកនាំរបស់ ​ឧបនាយករដ្ឋមន្រ្តី រដ្ឋមន្រ្តី​ក្រសួងការ​ពារជាតិ កិច្ចសហប្រតិបត្តិការរវាងកងទ័ព ទាំងពីរ(កម្ពុជា-ចិន) ក៏កាន់តែរីកចម្រើនជឿនលឿន​ទៅមុខបន្តទៀតផងដែរ ។ នាយឧត្តមសេនីយ៍ ក៏បានអះអាងថា ប្រទេសចិនមានឆន្ទៈធ្វើការជាមួយកម្ពុជា ដើម្បីបន្តពង្រឹងចំណងមិត្តភាព បង្កើនទំនាក់ទំនងជាយុទ្ធសាស្រ្ត និងធ្វើឱ្យស៊ីជម្រៅកិច្ចសហប្រតិបត្តិការជាក់ស្តែង ដើម្បីលើកកម្ពស់ទំនាក់ទំនងយោធាដល់កម្រិតថ្មីមួយផងដែរ។

ថ្លែងនៅក្នុងកិច្ចជំនួបនោះដែរនាយឧត្តមសេនីយ៍ ទៀ សីហា បានសម្តែងនូវសមានចិត្ត និង​ចូលរួម​រំលែក​ទុក្ខចំពោះរាជរដ្ឋាភិបាលចិន និងប្រជាជនចិន ដែលបានទទួលរងគ្រោះដោយ​សារព្យុះ​ទីហ្វុងយ៉ាហ្គី កាលពីពេលថ្មីៗនេះ ហើយនាយឧត្តមសេនីយ៍ឧបនាយករដ្ឋមន្រ្តី បានគូស​បញ្ជាក់​ពី​ការប្តេជ្ញាចិត្តពង្រឹងពង្រីកកិច្ចការងារកិច្ចសហប្រតិបត្តិការល្អរវាងកងយោធពលខេមរភូមិន្ទ និងកងទ័ព​រំដោះប្រជាជនចិន ដែលជាការបន្តនូវស្នាដៃ និង​សមិទ្ធផលដែលបានពូនជ្រុំ​ដោយ​សម្តេចពិជ័យសេនា អតីតឧបនាយករដ្ឋមន្រ្តី រដ្ឋមន្រ្តីក្រសួងការពារជាតិផងដែរ។ នាយឧត្តមសេនីយ៍ ទៀ សីហា ក៏បានថ្លែងអំណរគុណដល់ភាគីចិន ដែលបានខិតខំជួយដល់កម្ពុជា និង​បានផ្តល់អាហារូបករណ៍​ ការបណ្តុះបណ្តាលដល់សិក្ខាកាមកងយោធពលខេមរភូមិន្ទ ដែលពីមួយឆ្នាំៗមានការកើនឡើងជាលំដាប់។

នៅក្នុងកិច្ចជំនួបនោះ ភាគីទាំងពីរ ក៏បានផ្លាស់ប្តូរទស្សនៈលើបញ្ហាថ្មីៗនៅក្នុងតំបន់ និង​សកល​លោក ព្រមទាំងបានព្រមព្រៀងលើកិច្ចសហប្រតិបត្តិការសំខាន់ៗ​មួយចំនួន ដូចជា ការ​ជំរុញនូវកិច្ចសហប្រត្តិបត្តិការជាយុទ្ធសាស្រ្ត ការ​ផ្លាស់ប្តូរ​ទស្សនកិច្ចមន្រ្តីជាន់ខ្ពស់ ការលើក​កម្ពស់ប្រសិទ្ធិភាពជំនួយយោធា និងការ​ពង្រឹងពង្រីក​កិច្ចសហប្រតិបត្តិការជាក់ស្តែង​តាម​យៈសមយុទ្ធយោធារួមគ្នា​ ដូចជាលំហាត់នាគមាសលំហាត់​ទេវតាសន្តិភាពជាដើម។ភាគីទាំងពីរ ក៏បានសម្តែងក្តីសង្ឃឹមថា ​នឹងពង្រីកបន្ថែមទៀតនូវភាពស៊ីជម្រៅ​ និង​វិសាលភាពនៃកិច្ច​សហប្រតិបត្តិការរវាងប្រទេសទាំងពីរ ​ដើម្បីជំរុញសហគមន៍ជោគវាសនារួមគ្នាក្នុងយុគសម័យថ្មី៕អត្ថបទបាន ចក់