ប្រមុខការទូតអាមេរិក នឹងទៅអេហ្ស៊ីប តែមិនចូលអ៊ីស្រាអែលទេ បំណងសម្របសម្រួលឲ្យមានបទឈប់បាញ់នៅហ្កាហ្សា

ប្រមុខការទូតអាមេរិកលោក Antony Blinken នឹងត្រឡប់ទៅប្រទេសអេហ្ស៊ីបវិញនៅថ្ងៃពុធសប្ដាហ៍នេះ ប៉ុន្តែដំណើរទស្សនកិច្ចរបស់លោកទៅកាន់តំបន់នោះនឹងលុបចោលការឈប់សំចតក្នុងប្រទេសអ៊ីស្រាអែល ស្របពេលមានការសង្ស័យកាន់តែខ្លាំងថាបទឈប់បាញ់ និងកិច្ចព្រមព្រៀងចំណាប់ខ្មាំងអាចត្រូវបានយល់ព្រមមុនពេលលោកប្រធានាធិបតី Joe Biden ចាកចេញពីតំណែង។

នេះជាលើកដំបូងចាប់តាំងពីការវាយប្រហារថ្ងៃទី ៧ ខែតុលាដែលលោកBlinken នឹងទៅកាន់មជ្ឈិមបូព៌ាដោយពុំចូលអ៊ីស្រាអែល។ អ្នកការទូតកំពូលរបស់សហរដ្ឋអាមេរិករូបនេះ ជាធម្មតាប្រើប្រាស់ដំណើរទស្សនកិច្ចទៅកាន់ប្រទេសអ៊ីស្រាអែល ដើម្បីដាក់សម្ពាធលើរដ្ឋាភិបាលអ៊ីស្រាអែលលើបញ្ហាសំខាន់ៗជុំវិញសង្រ្គាម រួមទាំងកិច្ចព្រមព្រៀងចំណាប់ខ្មាំង និងបទឈប់បាញ់។

នៅពេលនៃដំណើរទស្សនកិច្ចចុងក្រោយរបស់លោកBlinken ក្នុងខែសីហា ក្រុមមន្ត្រីសហរដ្ឋអាមេរិកកំពុងព្យាករណ៍សុទិដ្ឋិនិយមជាសាធារណៈថាពួកគេអាចជិតដល់ការនាំយកកិច្ចព្រមព្រៀងនេះកាន់តែជិតដល់ចំណុចស្របគ្នា តែឥឡូវនេះ ភាពសុទិដ្ឋិនិយមជាសាធារណៈជុំវិញដំណោះស្រាយដ៏ឆាប់រហ័សនោះបានរលាយបាត់ហើយ។

ក្រសួងការបរទេសបាននិយាយនៅក្នុងសេចក្តីប្រកាសរបស់ពួកគេថា លោកBlinken នឹងជួបក្រុមមន្ត្រីអេហ្ស៊ីបដើម្បីពិភាក្សាអំពីកិច្ចខិតខំប្រឹងប្រែងដែលកំពុងបន្តដើម្បីឈានដល់បទឈប់បាញ់នៅហ្គាហ្សា ដែលធានាការដោះលែងចំណាប់ខ្មាំងទាំងអស់ សម្រាលទុក្ខលំបាករបស់ប្រជាជនប៉ាឡេស្ទីន និងជួយបង្កើតសន្តិសុខក្នុងតំបន់កាន់តែល្អប្រសើរ៕