ចិននិយាយថា ខ្លួនបានតាមដានយន្តហោះស៊ើបការណ៍អាមេរិកនៅច្រកសមុទ្រតៃវ៉ាន់

យោធាចិនបាននិយាយថា យន្តហោះចម្បាំងរបស់ខ្លួន បានតាមដានយន្តហោះយោធាអាមេរិកឆ្លងកាត់ច្រកសមុទ្រតៃវ៉ាន់ដ៏រសើបកាលពីថ្ងៃអង្គារសប្ដាហ៍នេះ។

យោងតាមសេចក្តីថ្លែងការណ៍របស់ទីបញ្ជាការភូមិភាគខាងកើតនៃកងទ័ពរំដោះប្រជាជនរំដោះប្រជាជនចិនបានឲ្យដឹងថា យន្តហោះល្បាត និងឈ្លបយកការណ៍ P-8A Poseidon របស់សហរដ្ឋអាមេរិក ប្រភេទនេះមានសមត្ថភាពធ្វើសង្គ្រាមប្រឆាំងនាវាមុជទឹករយៈចម្ងាយឆ្ងាយ ។

លោក Li Xi វរសេនីយ៍ឯកជាន់ខ្ពស់ និងជាអ្នកនាំពាក្យនៃទីបញ្ជាការដ្ឋានខាងលើបាននិយាយថា កងកម្លាំងយោធាចិន បានរៀបចំយន្តហោះចម្បាំង ដើម្បីតាមដាន និងឃ្លាំមើលការហោះហើររបស់យន្តហោះអាមេរិក ហើយបានដោះស្រាយតាមច្បាប់។

លោកបានបន្ថែមថា កងទ័ពបញ្ជាការដ្ឋាននឹងរក្សាការប្រុងប្រយ័ត្នខ្ពស់ជានិច្ច និងការពារយ៉ាងដាច់អហង្ការនូវអធិបតេយ្យភាព និងសន្តិសុខជាតិ ព្រមទាំងសន្តិភាព និងស្ថិរភាពក្នុងតំបន់។

កងទ័ពជើងទឹកអាមេរិក ពុំបានធ្វើអត្ថាធិប្បាយភ្លាមៗអំពីហេតុការណ៍នេះទេ។

កាលពីថ្ងៃសុក្រ ប្រទេសអាល្លឺម៉ង់បានបើកនាវាចម្បាំងពីរគ្រឿងឆ្លងកាត់ច្រកសមុទ្រតៃវ៉ាន់ក្នុងការឆ្លងកាត់លើកដំបូងរបស់ខ្លួនក្នុងដែនទឹកមានជម្លោះក្នុងរយៈពេលជាងពីរទសវត្សរ៍ ដោយទាក់ទាញការរិះគន់ពីទីក្រុងប៉េកាំង។

គួររម្លឹកថាកាលពីឆ្នាំ ២០០១ យន្តហោះស៊ើបការណ៍របស់សហរដ្ឋអាមេរិក និងយន្តហោះចម្បាំងរបស់កងទ័ពជើងទឹកចិនបានបុកគ្នានៅកណ្តាលអាកាសនៅជិតខេត្តកោះហៃណានរបស់ប្រទេសចិន ដែលបណ្តាលឱ្យអ្នកបើកយន្តហោះចិនបានស្លាប់។ សហរដ្ឋអាមេរិកបាននិយាយថា យន្តហោះរបស់ខ្លួនស្ថិតនៅក្នុងដែនអាកាសអន្តរជាតិ ហើយឧបទ្ទវហេតុនេះ កើតឡើងដោយសារការហោះហើរខ្វះការប្រុងប្រយ័ត្នរបស់ភាគីចិន៕