ទឹកជំនន់នៅអឺរ៉ុបកណ្តាល បង្កការបំផ្លិចបំផ្លាញដ៏ធំ និងការជម្លៀសកាន់តែច្រើន

ក្រុមអ្នកស្ម័គ្រចិត្ដ និងបុគ្គលិកសង្គ្រោះបន្ទាន់បានប្រឹងប្រែងយ៉ាងសស្រាក់សស្រាំដើម្បីធានាសុវត្ថិភាពកម្រិតទឹកនៅតាមច្រាំងទន្លេក្នុងទីក្រុងប្រវត្តិសាស្ត្រ រ៉ូក្លាវ (Wroclaw) របស់ប្រទេសប៉ូឡូញ កាលពីថ្ងៃអង្គារ (១៧ កញ្ញា) ខណៈតំបន់នានានៅក្បែរនោះបានណែនាំអ្នកស្រុកឱ្យជម្លៀសចេញកាន់តែច្រើន ហើយអាជ្ញាធរនៅទូទាំងអឺរ៉ុបកណ្តាល បានគណនាតម្លៃខូចខាតនៃទឹកជំនន់ ដែលបានធ្វើឱ្យមានការបំផ្លិចបំផ្លាញ និងបានសម្លាប់មនុស្សយ៉ាងហោចណាស់ ២២នាក់។

ទឹកជំនន់បានបង្កការបំផ្លិចបំផ្លាញដ៏ធំចាប់ពីរូម៉ានី ទៅដល់ប៉ូឡូញ។ តំបន់នៅតាមបណ្តោយព្រំដែនឆេក-ប៉ូឡូញ ស្ថិតក្នុងចំណោមតំបន់ដែលរងគ្រោះខ្លាំងបំផុតចាប់តាំងពីចុងសប្តាហ៍មក ខណៈទឹកទន្លេដែលពោរពេញដោយកំទេចកំទី បានបំផ្លាញទីក្រុងប្រវត្តិសាស្ត្រ ធ្វើឱ្យស្ពានបាក់ និងបំផ្លាញផ្ទះសម្បែង។

អ្នកស្លាប់ដោយសារទឹកជំនន់ទាំងនោះគឺនៅប្រទេសរ៉ូម៉ានី ប៉ូឡូញ អូទ្រីស និងសាធារណរដ្ឋឆេក។ អ្នកស្រុកនៅប្រទេសឆេក និងប៉ូឡូញរាប់ម៉ឺនគ្រួសារនៅតែគ្មានថាមពល ឬទឹកសាបប្រើប្រាស់នៅឡើយ ខណៈមនុស្សរាប់ម៉ឺននាក់បានជម្លៀសចេញនៅក្នុងតំបន់ដែលរងផលប៉ះពាល់។

នៅហុងគ្រី ភាគខាងជើងនៃរដ្ឋធានីប៊ុយដាប៉ែស អាជ្ញាធរបានដាក់ពង្រាយទំនប់ទឹកចល័តដើម្បីទប់ស្កាត់ទឹកជំនន់។ នៅប្រទេសស្លូវ៉ាគី រដ្ឋាភិបាលបានព្រមានប្រជាជនអំពីទឹកជំនន់បន្ថែមទៀត ខណៈកម្រិតទឹកឥឡូវនេះនឹងធ្លាក់ចុះបន្តិចម្តងៗ ហើយបាននិយាយថា ការខូចខាតដែលបណ្តាលមកពីទឹកជំនន់ទូទាំងប្រទេសត្រូវបានគេប៉ាន់ប្រមាណថាមានចំនួន ២០លានអឺរ៉ូ៕