ព្យុះត្រូពិកថ្មីមួយនឹងវាយប្រហារភាគកណ្តាលវៀតណាម នៅល្ងាចថ្ងៃព្រហស្បតិ៍នេះ

ទីភ្នាក់ងារអាកាសធាតុរបស់រដ្ឋាភិបាលបាននិយាយថា ព្យុះត្រូពិកមួយត្រូវបានគេព្យាករថានឹងបោកបក់ដល់ដីនៅភាគកណ្តាលប្រទេសវៀតណាម នៅល្ងាចថ្ងៃព្រហស្បតិ៍ (១៩ កញ្ញា) នេះ ដោយនាំមកនូវភ្លៀងធ្លាក់ខ្លាំងដែលអាចបង្កជាទឹកជំនន់ដ៏គ្រោះថ្នាក់ ភ្លាមៗបន្ទាប់ពីតំបន់ភាគខាងជើងត្រូវបានវាយប្រហារដោយព្យុះទីហ្វុង យ៉ាហ្គី (Yagi) ដ៏ខ្លាំងក្លា។

ទីភ្នាក់ងារនេះបាននិយាយនៅក្នុងរបាយការណ៍មួយថា ព្យុះ ដែលវៀតណាមឱ្យឈ្មោះថា ព្យុះលេខ៤ (Storm No.4) ត្រូវបានគេព្យាករថានឹងវាយបក់លើតំបន់ឆ្នេរពីខេត្ត ក័ងទ្រី (Quang Tri) ទៅកាន់ខេត្ត ក័ងណាម (Quang Nam) នៅពេលល្ងាច ជាមួយនឹងកម្លាំងខ្យល់បក់រហូតដល់ ១០២គីឡូម៉ែត្រក្នុងមួយម៉ោង។

ប្រទេសអាស៊ីអាគ្នេយ៍មួយនេះបាននិងកំពុងរងគ្រោះពីឥទ្ធិពលនៃព្យុះទីហ្វុង Yagi ដែលជាព្យុះខ្លាំងក្លាបំផុតវាយប្រហារអាស៊ីក្នុងឆ្នាំនេះ ដែលបានបោកបក់ដល់ដីនៅភាគខាងជើងវៀតណាមកាលពីជិតពីរសប្តាហ៍មុន និងបានសម្លាប់មនុស្សជិត ៣០០នាក់ និងបណ្តាលឱ្យខូចខាតទ្រព្យសម្បត្តិប្រហែល ១,៦ពាន់លានដុល្លារ។

ទីភ្នាក់ងារនេះបាននិយាយនៅក្នុងរបាយការណ៍ថា ព្យុះលេខ៤ នឹងបង្កឱ្យមានភ្លៀងធ្លាក់ក្នុងចន្លោះពី ១០០ ទៅ ៣០០ មីលីម៉ែត្រ (៤ ទៅ ១២ អ៊ីញ) ពីថ្ងៃព្រហស្បតិ៍ ដល់ថ្ងៃសុក្រ (២០ កញ្ញា) នេះនៅភាគកណ្តាលវៀតណាម រួមទាំងនៅក្នុងតំបន់គោលដៅទេសចរណ៍ ដាណាង (Danang) ផងដែរ។ ទីភ្នាក់ងារបន្ថែមថា ភ្លៀងក៏នឹងធ្លាក់លើតំបន់ខ្ពង់រាបកណ្តាល ដែលជាតំបន់ដាំដុះកាហ្វេដ៏ធំបំផុតរបស់វៀតណាម៕