មនុស្សជាង១០នាក់របួសក្នុងការវាយប្រហារដោយយានដ្រូនរបស់អ៊ុយក្រែនលើតំបន់ទ្វែរ (Tver) នៅរុស្ស៊ី

យោងតាមក្រសួងសុខាភិបាលរបស់ប្រទេសរុស្ស៊ីបានឱ្យដឹងថា មនុស្សចំនួន ១៣ នាក់បានរងរបួស ក្នុងតំបន់ ទ្វែរ (Tver) របស់ប្រទេសនេះ បន្ទាប់ពីការវាយប្រហារដោយយានដ្រូនទ្រង់ទ្រាយធំមួយរបស់អ៊ុយក្រែន បានបង្កឱ្យមានអគ្គិភ័យ និងការញ្ជួយមានទំហំប៉ុនការរញ្ជួយដីមួយនៅទីនោះ។

វីដេអូដែលមិនត្រូវបានគេផ្ទៀងផ្ទាត់ បានបង្ហាញពីការផ្ទុះដ៏ធំមួយនៅក្នុងតំបន់ទីក្រុងនេះ។

បទបញ្ជាការជម្លៀសមួយផ្នែកនៃតំបន់នេះ ត្រូវបានប្រកាសបន្ទាប់ពីមានការវាយប្រហារកាលពីព្រឹកព្រលឹមថ្ងៃពុធសប្ដាហ៍នេះ។ ក្រោយមក អភិបាលតំបន់នេះ បានជំរុញឲ្យអ្នកស្រុកវិលត្រឡប់ទៅវិញ ដោយនិយាយថា ហេដ្ឋារចនាសម្ព័ន្ធទាំងអស់ក្នុងក្រុង បានដំណើរការជាធម្មតាឡើងវិញ។

ទីភ្នាក់ងារព័ត៌មាន AFP និង Reuters បានដកស្រង់ប្រភពរបស់អ៊ុយក្រែនដែលនិយាយថាឃ្លាំងគ្រាប់រំសេវមួយត្រូវបានរងការវាយប្រហារដោយដ្រូនរបស់ខ្លួន។

តាមសេចក្តីរាយការណ៍ ទីតាំងយោធានេះបានផ្ទុកដោយធុងសាំង ក៏ដូចជាគ្រាប់កាំភ្លើងធំ មីស៊ីលផ្លោង និងគ្រឿងផ្ទុះជាច្រើនទៀត ។ ទាំងនេះគឺជាអាវុធទាំងអស់ដែលត្រូវបានប្រើប្រាស់ក្នុងការលុកលុយពេញទំហឹងរបស់រុស្ស៊ីលើអ៊ុយក្រែន។

ការវាយប្រហារចុងក្រោយបំផុតរបស់អ៊ុយក្រែននេះ គឺជាប្រភេទដែលខ្លួនចង់ប្រើមីស៊ីលផ្គត់ផ្គង់ដោយសម្ព័ន្ធមិត្តលោកខាងលិចរបស់ខ្លួន។ ទោះគ្មានការអនុម័តពីសហរដ្ឋអាមេរិក និងចក្រភពអង់គ្លេសក៏ដោយ ក៏អ៊ុយក្រែនបានវាយប្រហារគោលដៅរុស្ស៊ីម្តងទៀត ដោយយានដ្រូនផលិតខ្លួនឯងដែរ៕