រុស្ស៊ី បន្តព្រមានលោកខាងលិចពីសង្គ្រាមនុយក្លេអ៊ែរលើអ៊ុយក្រែន ខណៈរិះគន់សម្ដីប្រមុខណាតូ

សម្ព័ន្ធមិត្តជិតស្និទ្ធរបស់លោកប្រធានាធិបតីរុស្ស៊ី វ្ល៉ាឌីមៀ ពូទីន(Vladimir Putin) បានព្រមានរដ្ឋាភិបាលលោកខាងលិចកាលពីថ្ងៃព្រហស្បតិ៍សប្ដាហ៍នេះថា សង្រ្គាមនុយក្លេអ៊ែរ នឹងកើតឡើង ប្រសិនបើពួកគេផ្តល់ភ្លើងខៀវឱ្យអ៊ុយក្រែនប្រើប្រាស់អាវុធរយៈចម្ងាយឆ្ងាយវាយប្រហារគោលដៅជ្រៅនៅក្នុងប្រទេសរុស្ស៊ីមែននោះ។

លោក វីយ៉ាឆេស្លាវ វ៉ូឡូឌីន (Vyacheslav Volodin) ប្រធានសភាជាន់ទាប និងជាសមាជិកក្រុមប្រឹក្សាសន្តិសុខរបស់លោកPutin កំពុងឆ្លើយតបទៅនឹងការបោះឆ្នោតនៅក្នុងសភាអឺរ៉ុប ដែលជំរុញឱ្យបណ្តាប្រទេសសហភាពអឺរ៉ុបផ្តល់ការយល់ព្រមឲ្យក្រុងគីវ ប្រើអាវុធរយៈចម្ងាយឆ្ងាយនោះ។

លោកបានសរសេរនៅលើបណ្ដាញសង្គមTelegram ថា អ្វីដែលសភាអឺរ៉ុបកំពុងអំពាវនាវ រុញឱ្យមានសង្គ្រាមលោក ដោយប្រើអាវុធនុយក្លេអ៊ែរ។

សាររបស់លោកក្រោមចំណងជើងថា “សម្រាប់អ្នកមិនចាប់ផ្ដើមមុន ” ដែលជាការយោងជាក់ស្តែងចំពោះការព្រមានរបស់ប្រធានាធិបតីរុស្ស៊ី កាលពីសប្តាហ៍មុន ថាលោកខាងលិចនឹងធ្វើសង្គ្រាមដោយផ្ទាល់ជាមួយរុស្ស៊ី ប្រសិនបើអនុញ្ញាតឱ្យអ៊ុយក្រែនបាញ់មីស៊ីលរយៈចម្ងាយឆ្ងាយចូលជ្រៅទៅក្នុងទឹកដីរុស្ស៊ីនោះ។

សង្រ្គាមអ៊ុយក្រែនបានបង្កឱ្យមានការប្រឈមដាក់គ្នាដ៏ធំបំផុតរវាងរុស្ស៊ី និងលោកខាងលិច ចាប់តាំងពីវិបត្តិមីស៊ីលគុយបាឆ្នាំ ១៩៦២ ដែលត្រូវបានចាត់ទុកថាជាពេលដែលមហាអំណាចសង្រ្គាមត្រជាក់ទាំងពីរ គឺអតីតសហភាពសូវៀត និងសហរដ្ឋអាមេរិក បានខិតជិតបំផុតទៅនឹងសង្រ្គាមនុយក្លេអ៊ែរដោយចេតនា។ ប្រធានអង្គការណាតូដែលជិតផុតអាណត្តិ លោក Jens Stoltenberg បានប្រាប់សារព័ត៌មាន The Times នៅសប្តាហ៍នេះថា មេដឹកនាំវិមានក្រឹមឡាំងធ្លាប់បានប្រកាស “បន្ទាត់ក្រហមជាច្រើន”ប៉ុន្តែពុំបានបង្កើនជម្លោះជាមួយលោកខាងលិចទេ នៅពេលដែលបន្ទាត់ក្រហមទាំងនោះត្រូវបានឆ្លងកាត់។ អ្នកនាំពាក្យរបស់លោក Putin កាលពីថ្ងៃពុធបាននិយាយថា ការអត្ថាធិប្បាយរបស់ប្រមុខណាតូរូបនេះ គឺមានគ្រោះថ្នាក់ និងជាសកម្មភាពបង្ករឿង៕